Vakarua 14 - Ai Vola Tabu (Vakadewa Makawa Vakavoutaki 2021)（FRV21）

Vakatabui nai Valavala ni Qaravi Kalou Tani

1 Vsoro 19.28; 21.5 “Oi kemuni sa luve i Jiova na nomuni Kalou. Mo ni kakua ni tavai kemuni, se tasia na yadremuni, e na vukudra na mate.

2Lako 19.5,6; Vrua 4.20; 7.6; 26.18; Taito 2.14; 1Pita 2.9Ni ko ni sa matanitu savasava vei Jiova na nomuni Kalou, a sa digitaki kemuni ko Jiova mai vei ira na matanitu kecega sa tiko e dela i vuravura, mo ni nona matanitu talei.

Na Kakana e Savasava kei na Tawa Savasava(Vunau ni Soro 11.1-47)

3“Mo ni kakua ni kania e dua na ka sa vakasisila.

4Oqo na manumanu e yavai va mo ni kania: na bulumakau, na sipi kei na me,

5na dia, na kaseli, na ropuki, na me kila, na paisoni, na anitilope, kei na samoi.

6Kei na manumanu e yavai va kecega sa wase na kena ququ, ka sa sei sara me wase rua, ka sa mama vakarua na kena, mo ni kania oqo vei ira na manumanu e yavai va.

7Ia ko ira oqo vei ira sa mama vakarua na kena, kei ira sa wase na kena ququ, dou kakua ni kania: na kameli, kei na eri, kei na koni, ka ni ra sa mama vakarua na kedra, ka sa sega ni wase na kedra ququ; era sa tabu vei kemuni.

8Kei na vuaka, ni sa wase na kena ququ, ka sa sega ni mama vakarua na kena, sa tabu vei kemuni. Mo ni kakua ni kania na lewedra, mo ni kakua talega ni tara na yagodra ni sa mate.

9“Me baleta na veika era bula e loma ni wai, oqo e tara mo ni kania: na ika kecega sa vakatutuna ka vakavarina mo ni kania.

10Ia na ika kecega sa sega ni vakatutuna ka sega ni vakavarina mo ni kakua ni kania; sa tabu vei kemuni.

11“A manumanu vuka kecega sa savasava mo ni kania.

12Ia na manumanu oqo mo ni kakua ni kania: na veimataqali ikeli,

13kei na veimataqali vulituri,

14kei na mataqali reveni kecega;

15na ositeriji, kei na lulu, kei na manulevu, e na kena veimataqali kecega;

16io na lulu tabu, kei na lulu tani,

17kei na lulu ni vanua dravuisiga, kei na vulituri vula, kei na komorati,

18kei na veimataqali belo; na upupa kei na beka.

19Ia na manumanu lalai dauvuka kecega sa tawa savasava vei kemuni; e tabu mo ni kania.

20Na manumanu vuka kecega sa savasava e tara mo ni kania.

21 Lako 23.19; 34.26 “E tabu mo ni kania e dua na ka sa mate ga vakataki koya. E rawa mo ni solia vua na vulagi sa tiko e nomuni lomanibai, me kania ko koya, se mo ni volitaka vua na kai tani. Ni ko ni sa kawa tamata savasava vei Jiova na nomuni Kalou.

“Mo ni kakua ni vakasaqara na luve ni me e na wai-ni-sucu i tinana.

Nai Vakarau ni Soli Katini

22 Vsoro 27.30-33; Tiko 18.21 “Mo ni solia vakaidina na kenai katini ni vua ni nomuni teitei kecega ka sa vuataka na veiwere e na veiyabaki.

23Ia mo ni kania nai katini ni nomuni sila, kei na nomuni waini, kei na nomuni waiwai, kei na ulumatua ni nomuni bulumakau kei na nomuni sipi, e na mata i Jiova na nomuni Kalou, e na yasana sa digitaka ko koya me vakatikora kina na yacana, ka oqo mo ni vakavulici kina mo ni daurerevaki Jiova tikoga na nomuni Kalou.

24Ia kevaka sa balavu vei kemuni na sala ka sa dredre kina mo ni kauta nai katini, ni sa yawa vei kemuni na yasana sa digitaka ko Jiova na nomuni Kalou me vakatikora kina na yacana, ni sa vakalougatataki kemuni ko Jiova na nomuni Kalou,

25mo ni qai volitaka me saumi vakailavo. Mo ni vauca nai lavo e na ligamuni, ka lako ki na yasana sa digitaka ko Jiova na nomuni Kalou;

26mo ni qai solia nai lavo ko ya me rawa kina na ka kecega sa garova na yalomuni—se na bulumakau, se na sipi, se na waini, se na yaqona kaukauwa, se na ka tani kecega sa garova na yalomuni. Ia mo ni kana mai kea e na mata i Jiova na nomuni Kalou, ka reki, koi kemuni kei ira na nomuni lewe-ni-vuvale.

27Me baleti ira na Livai sa tiko e nomuni lomanibai, mo ni kakua ni guilecavi ira, ni sa sega na nodra tikina se nodra i votavota vata kei kemuni.

28“E na mua ni veiyatolu na yabaki, mo ni kauta mai nai katini ni nomuni vuata kecega e na yabaki ko ya, ka binia e nomuni lomanibai.

29Ia ko ira na Livai, me vaka ni sa sega na nona tikina se nona i votavota vata kei kemuni, kei na kai tani, kei ira sa sega ni vakatamani, kei na yada, sa tiko e nomuni lomanibai, me ra lako ga mai me ra mai kana ka mamau, me vakalougatataki kemuni kina ko Jiova na nomuni Kalou e na cakacaka kecega ko ni sa kitaka.