Lele i Jeremaia 3 - Ai Vola Tabu (Vakadewa Makawa Vakavoutaki 2021)（FRV21）

Na Loloma sa Sega ni Mudu ni Kalou sa Veivakataudeitaki

1Koi au na tamata sa kune ka rarawa

e na kuita ni nona cudru.

2Sa tuberi au ko koya, ka kauti au

ki na butobuto, ka segai ki na rarama.

3Sa vuki tani vei au ko koya,

ka sa duatani vei au na ligana e na siga ka bogi.

4Sa vakavucataka ko koya na lewequ kei na kuliqu;

sa musuka na suiqu.

5Sa viribai vei au ko koya,

ka sa vakavolivoliti au e na ka gaga kei na oca.

6Sa vakatikori au ko koya e na veitikina butobuto,

me'u vakataki ira sa mate makawa.

7Sa viribaiti au ko koya, me'u kua ni lako tani rawa;

sa vakabibitaka na sinucodo ka'u sa vesu kina.

8Io ni'u sa tagi ka qoqolou,

sa latia tani na noqu masumasu.

9Sa vakalatia na noqu sala e na vatu sa ta,

a noqu sala sa vakavevetaka ko koya.

10Sa lawavaki au ko koya vaka e dua na bea,

ka vaka na laione e na yasana vuni.

11A noqu i lakolako sa vukica ko koya, ka sa dresudresuki au;

sa vakaluveniyalitaki au.

12Sa loqata na nona dakai ko koya,

a sa vakaturi au me'u ka me vanataka kina na gasau.

13Sa vakacoba ki na noqu i ivi

na gasau ni nona taga gasau.

14Au a ka ni veivakalialiai vei ira kecega na kai noqu,

ka ra seretaki au e na siga ka bogi.

15Sa vakamamautaki au ko koya e na duva gaga,

sa vakamatenitaki au e na wai gaga sara.

16Sa voroka talega na batiqu e na laqere,

sa buluti au e na dravusa.

17Ia ko sa biuta tani vakayawa na vakacegu mai na yaloqu;

au sa guilecava na vinaka.

18Ia ka'u a kaya, “Sa takali na noqu kaukauwa,

kei na ka ka'u nuitaka mai vei Jiova.”

19Mo ni nanuma na noqu rarawa kei na noqu tiko sese,

sa duva gaga kei na wai gaga!

20Sa daunanuma tiko kina na yaloqu

ka'u sa yalomalumalumu ga e loma.

21A ka oqo ka'u sa vakananuma e lomaqu,

o koya ka'u sa nuitaka kina na vinaka:

22A loloma tudei ga i Jiova eda sa sega ni tamusuki tani kina,

ka ni sa sega ni mudu rawa na nona yalololoma.

23Sa ka vou e na veimataka,

sa ka levu na nomuni yalodina.

24“Sa noqu i votavota ko Jiova,” sa kaya na yaloqu,

“o koya oqo ka'u na nuitaki koya kina.”

25Sa yalovinaka ko Jiova vei ira era sa waraki koya,

io ki na yalo sa qarai koya.

26Sa kilikili kaya na tamata me nuitaka,

ka me waraka vakayalomalua talega na veivakabulai mai vei Jiova.

27Sa kilikili kaya na tamata me vakataqara vua

nai vua ni sa cauravou tiko ko koya.

28Me sa tiko duadua ko koya ka galu toka,

ka ni sa virikotora vua na Turaga.

29Me vunia na gusuna e na qele,

de dua beka na ka me vakanuinui kina.

30Me vagolea na baluna vua sa yaviti koya,

me sa oso sara ko koya e na veivakalialiai.

31Ni na sega ni biuti keda ko koya na Turaga

ka sega ni mudu.

32Ia ke sa ia na veivakararawataki ko koya,

ena ia talega na loloma me vaka na kena levu ni nona yalololoma.

33Ni sa sega ni vu mai na lomana me cudruvi ira na tamata,

se me vakararawataka na lomadra.

34E na gauna era sa butuki sobu kina

ko ira era vesuki tu e vuravura,

35ni sa vakatanitaki na dodonu ni tamata yadua

e na mata i Koya sa Cecere Sara,

36ni sa caka vakatawadodonu na nona kisi ni veilewai e dua,

—e sega li ni raica na ka oqori ko koya na Turaga?

37O cei li sa vosa ka sa mana na nona vosa,

kevaka e se sega ni vakarota ko koya na Turaga?

38Sa sega li ni lako mai na gusu i Koya sa Cecere Sara

na ca kei na vinaka?

39A cava sa kudruvaka kina na tamata sa bula

na nona cudruvi e na vuku ni nona i valavala ca?

40Me da dikeva mada na noda i valavala,

ka vakataroga, ka lesu tale vei Jiova!

41Me da laveta cake na yaloda kei na ligada

ki vua na Kalou mai lomalagi:

42“Koi keimami, keimami sa talaidredre ka sa yalovakatani,

ka ko ni sa sega ni ia na veivosoti.

43“Ko ni sa ologi kemuni e na cudru ka sa vakasavi keimami,

ka ko ni sa ia na veivakamatei, ka sega ni yalololoma;

44ko ni sa tabonaki kemuni e na o,

me kakua ni basika yani na neimami masu.

45Ko ni sa vakayacori keimami me veika duka ka benu

e na kedra maliwa na tamata.

46“Era sa dalaga vei keimami

ko ira na neimami meca kecega;

47na rere kei nai cori sa yacovi keimami,

na veivakalalataki kei na veivakarusai.

48Sa dave mai mataqu na uciwai ni tagi

e na vuku ni nodra vakarusai na luvedra na kai noqu.

49“A wai ni mataqu sa drodro vakayauyau,

ka sega ni mudu, ka sega ni cegu vakalailai,

50me yacova ni sa rai sobu mai ko Jiova

ka raica mai lomalagi.

51Sa vakavuna na rarawa ni lomaqu na mataqu

e na vukudra kecega na goneyalewa ni noqu koro.

52“Era sa vakasasataki au na noqu meca

me vaka na manumanu vuka, ka sega na vuna;

53era sa kolotaki au bulabula ki na loma ni qara

ka vakaviriki au e na vatu;

54sa luvuca na uluqu na wai;

au a qai kaya, ‘Au sa muduki laivi.’

55“Au a kaciva na yacamuni, i Jiova,

mai na boto ni qara;

56ko ni sa rogoca na domoqu, ‘Ni kakua ni sogota

na daligamuni ki na noqu tagi ni kere veivuke!’

57Ko ni sa toro voleka mai e na siga ka'u a kacivi kemuni kina;

ko sa kaya, ‘Mo kakua ni rere!’

58“Ko ni sa totaka na yaloqu e na veilewai, na Turaga;

io ko ni sa vakabulai au.

59Ko ni sa raica, i Jiova, na noqu vakacacani,

mo ni lewa ga e na vukuqu.

60Ko ni sa raica kecega na nodra cudru,

kei na nodra vere kecega era bukia vei au.

61“Ko ni sa rogoca na nodra veivakalialiai, Jiova,

na nodra vere kecega era bukia vei au;

62Na tebenigusudra era tucake me ra bolei au,

kei na nodra i naki ca vei au e na siga ka bogi.

63A nodra tiko sobu kei na nodra tucake,

mo ni vakaraica matua; sai au ga era seretaka.

64“Ko ni na sauma vei ira, Jiova,

me vaka na cakacaka ni ligadra.

65Ko ni na soli ira me kaukauwa na lomadra,

oqo na nomuni cudruvi ira.

66Ko ni na vakasavi ira e na nomuni cudru,

ka vakarusai ira tani mai na ruku ni lomalagi i Jiova.”