2 Veigauna 17 - Ai Vola Tabu (Vakadewa Makawa Vakavoutaki 2021)（FRV21）

Sa Tui Juta ko Josefati

1A sa lewa ko Josefati na luvena, me kenai sosomi, ka sa vakaukauwataki koya me vala kei ira na Isireli.

2A sa lesia na mataivalu ki na veikoro vakabai kecega e Juta, a sa lesia nai valu i vakatawa e na vanua ko Juta, kei na veikoro i Ifereimi, ka rawa ko Esa na tamana.

3A sa tiko vata kei Josefati ko Jiova, ni sa muria nai valavala eliu ni nona qase ko Tevita, ka sega ni qaravi ira na Peali;

4ia sa qaravi koya na Kalou ni tamana, ka muria na nona vunau, ka sega ni muria na nodra i valavala na Isireli.

5A sa vakataudeitaka kina vua ko Jiova na matanitu. A ra sa kauta na ka-ni-loloma kivei Josefati ko ira kecega na Juta, ka sa ka levu na nona i yau ka sa dokai vakalevu.

6A sa vakauqeti na yalona me muria na sala i Jiova. Sa kauta tani talega ko koya na tikina cecere kei na kalouyalewa ni veikau mai Juta.

7Ia e na kenai katolu ni yabaki ni nona lewa, sa talaki vei ira na nona tamata turaga, ia vei Peni-eili, kei Opetaia, kei Sakaraia, kei Nicaneli, kei Mekaia, me ra sa vakatavuvuli e na veikoro i Juta;

8ka sa lako vata kei ira eso na Livai, ko Semaia, kei Necanaia, kei Sepataia, kei Asaeli kei Simiramoci, kei Jonacani, kei Atonaia, kei Topaia, kei Topi-atonaia, ko iratou na Livai; a sa lako vata kei ira ko Ilisama kei Jiorami, erau sa bete.

9A ra sa vakatavuvuli e Juta, ka ra sa kauta nai vola ni vunau i Jiova, a ra sa lako voli e na veikoro kecega e Juta, ka vakavulici ira na tamata.

10A ra sa rerevaki Jiova ko ira na matanitu kecega ni veivanua ka vakavolivoliti Juta, ka ra sa sega kina ni vala kei Josefati.

11Sa ra kauta na ka-ni-loloma kivei Josefati ko ira talega eso na kai Filisitia, kei nai vakacavacava siliva; a ra sa kauta vua eso na manumanu ko ira na kai Arapea, e vitu na udolu ka vitu na drau na sipi tagane, ka vitu na udolu ka vitu na drau na me tagane.

12A sa tubu ko Josefati me levu sara; a sa tara e Juta na veivale ni valu, kei na veikoro ni yau.

13Ka sa levu na cakacaka e qisia e na nodra veikoro na Juta. Ia ko ira na nona tamata i valu, ko ira na nona tamata kaukauwa ka qaqa, era a tiko mai Jerusalemi.

14Ia oqo na kedrai wiliwili me vaka na veimataqali ni nodra qase: Mai vei ira na Juta, ko ira na turaga ni yayaudolu: ko Atina sa liu, ka tiko vata kaya e le tolusagavulu na oba (300,000) na tamata i valu qaqa.

15A sa taravi koya ko Jioanani na turaga, ka tiko vata kaya e le ruasagavulu ka walu na oba (280,000).

16A sa taravi koya na luve i Sikiri ko Amasaia, ko koya sa soli koya vakayalodina kivei Jiova; a sa tiko vata kaya e le ruasagavulu na oba (200,000) na tamata i valu qaqa.

17Mai vei Penijamini talega: ko Elaiata, e dua na tamata i valu qaqa, a sa tiko vata kaya e le ruasagavulu na oba (200,000) na tamata era vakaiyaragi e na dakai dina kei nai sasabai.

18A sa taravi koya ko Jiosevata, ka sa tiko vata kaya e le tinikawalu na oba (180,000) na tamata era sa vakarau tu ki nai valu.

19Sa qarava na tui ko ira oqo, a sa vo ko ira sa lesia ko koya na tui ki na veikoro vakabai e na veiyasana e Juta.