Same 6 - Ai Vola Tabu (Vakadewa Makawa Vakavoutaki 2021)（FRV21）

Na Masu ni Kere Veivuke ni Yaco na Leqa Vua nai liuliu ni sere: kei nai vakatagi vakawa; me vaka na Seminica. A Same i Tevita.

1 Same 38.1 I Jiova, mo ni kakua ni vunauci au e nomuni cudru;

kakua ni cudruvi au e na nomuni cudru katakata.

2I Jiova mo ni yalololoma mai vei au; ni'u sa malumalumu;

ni vakabulai au, Jiova, ni sa rarawa na suiqu.

3A yaloqu talega sa rarawa vakalevu,

ia koi kemuni, i Jiova—ena vakaevei na kena dede?

4I Jiova, ni lesu tale mai, ni vakabula na yaloqu;

ni vakabulai au e na vuku ni nomuni loloma.

5Ni sa sega ni rawa ni vakananumi kemuni na mate;

o cei ena vakamolimoli vei kemuni mai nai bulubulu?

6Au sa oca e na noqu vutugu;

ka'u sa vakanawa na noqu i mocemoce e na bogi kecega;

au sa vakasuasuataka na noqu i davodavo e na wai ni mataqu.

7Sa buawa na mataqu e na vuku ni noqu rarawa;

ka sa qase mai e na vukudra kecega na noqu meca.

8 Maciu 7.23; Luke 13.27 Dou lako tani vei au, koi kemudou kecega sa kitaka na ca;

ni sa rogoca ko Jiova na domo ni noqu tagi.

9Sa rogoca ko Jiova na noqu kerekere;

ena ciqoma na noqu masu ko Jiova.

10Me ra madua kecega na noqu meca ka me ra velavela sara;

me ra lesu tale, ka me ra madua vakasauri sara.