Vunau ni Soro 21 - Ai Vola Tabu (Vakadewa Makawa Vakavoutaki 2021)（FRV21）

Nai Vakaro me Baleti Ira na Bete

1A sa kaya vei Mosese ko Jiova, “Mo vosa vei iratou na bete na luve i Eroni, ka kaya vei iratou, Me kakua ni vakatawasavasavataki koya e dua e na vuku ni tamata mate vei ira na kai nona,

2ia e na vuku ni wekana dina ga, e na vuku i tinana, se tamana, se na luvena tagane, se na luvena yalewa, se na tuakana, se na tacina,

3se na ganena sa goneyalewa ka tabu-tagane, sa wekana dina, o koya sa sega ni vakawati, io e na vukuna, e tara me vakatawasavasavataki koya kina.

4Me kakua ni vakatawasavasavataki koya ni sa turaga vei ira na nona tamata, me sega ni savasava kina.

5Vsoro 19.27,28; Vrua 14.1Me ra kakua ni tasia na uludra, se tasia na tutu ni kumidra, se tava na yagodra.

6Me ra savasava vua na nodra Kalou, ka kakua ni vosavakacacataka na yaca ni nodra Kalou. Ni ra sa vakacabora tiko na ka sa cabo e na bukawaqa vei Jiova, na kena kakana na nodra Kalou; o koya oqo era sa savasava kina.

7Me ra kakua ni vakawati kei na dua na yalewa sa dautagane, se sa vaqasei; me ra kakua talega ni vakawati kei na dua na yalewa sa veibiu kei na watina. Ni sa savasava ko koya vua na nona Kalou.

8Mo vakasavasavataki koya kina, ni sa vakacabora ko koya na kakana me nei koya na nomu Kalou. Mo nanumi koya me savasava, ni'u sa savasava koi au ko Jiova, o koya sa vakasavasavataki kemudou.

9Ia na luvena yalewa e dua na bete sa vakacacani koya ni sa dautagane, sa vakacacani tamana; ena vakamai ko koya e na bukawaqa.

10“Ia ko koya na bete levu mai vei ira na wekana, sa livi ki na uluna na waiwai ni veilumuti, a sa buli me sulumaka nai sulu tabu, me kakua ni biuta na nona i sala, se dresulaka na nona i sulu.

11Me kakua talega ni torova e dua na yago sa mate; me kakua ni vakatawasavasavataki koya e na vuku i tamana, se tinana.

12Me kakua talega ni curu tani e na vale tabu, se vakacacana na vale tabu ni nona Kalou; ni sa vakatabui oti e na waiwai ni veilumuti sa nei koya na nona Kalou: Koi au ko Jiova.

13Ia me vakawati ga kei na dua sa goneyalewa tabu-tagane.

14A yada, se yalewa sa biu, se yalewa sa vaqasei, se na dautagane, me kakua ni vakawati kei na dua sa vakaoqo. Ia me vakawati ga kei na dua sa goneyalewa tabu-tagane mai vei ira na kai nona,

15ka me kakua talega ni vakacacana na nona kawa e na kedra maliwa na kai nona; ni sai au ko Jiova, ka vakasavasavataki koya.”

16Sa vosa talega vei Mosese ko Jiova, ka kaya,

17“Mo vosa vei Eroni, ka kaya: O koya vei ira na nomu kawa e na dua nai tabatamata, sa dua na tikina vua e ca, me kakua ni toro yani ko koya me vakacabora na kakana me nei koya na nona Kalou.

18Ia na tamata kecega sa dua na tikina e ca me kakua ni toro mai, a tamata mataboko, se lokiloki, se ucu raraba, se dua na tikina sa vakatani,

19se sa ramusu na yavana, se ramusu na ligana,

20se sa dakupusi, se na leka, se ca e dua na matana, se sa bu ca se vakanana, se ceke.

21A tamata kecega vei ira na luve i Eroni na bete, sa dua na tikina e ca, me kakua ni toro mai me vakacabora na ka sa cabo vei Jiova e na bukawaqa; me vaka ni sa dua na tikina vua sa ca, me kakua kina ni toro mai ko koya me vakacabora na kakana me nei koya na nona Kalou.

22Me kania ga ko koya na kakana sa nei koya na nona Kalou, se ka tabu se ka tabu sara.

23Ia me kakua ga ni curu ki loma ni lati, se torova nai cabocabo-ni-soro, ni sa dua na tikina vua e ca; me kakua kina ni vakacacana na noqu veivale tabu; ni sai au ko Jiova ka vakasavasavataki ira.”

24A sa tukuna ko Mosese vei Eroni, kei iratou na luvena, kei ira kece na Isireli.