2 Samuela 19 - Ai Vola Tabu (Vakadewa Makawa Vakavoutaki 2021)（FRV21）

Sa Vunauci Tevita ko Joape

1A sa tukuni vei Joape, “Raica, sa tagicaki Apisalome ka lolosivaka tiko ko koya na tui.”

2Ka sa yaco kina na siga ni qaqa ko ya me vukici me siga ni tagi vei ira kecega na tamata, ni ra sa rogoca ko ira na tamata e na siga ko ya, “Sa rarawa na tui e na vuku ni luvena.”

3Ka ra sa lako lo yani ki na koro e na siga ko ya ko ira na tamata, me vaka na nodra lako lo na tamata era sa madua ni ra dro e nai valu.

4A sa ubia na matana na tui, ka qoqolou vakadomoilevu na tui, “Isa Apisalome na luvequ! Isa Apisalome, na luvequ, na luvequ!”

5A sa qai lako mai ki vale vei koya na tui ko Joape, ka kaya, “O ni sa vakamaduataka edaidai na matadra kecega na nomuni tamata, o ira ka vakabulai kemuni, kei iratou na luvemuni tagane, kei iratou na luvemuni yalewa, kei iratou na watimuni, kei iratou na watimuni lalai,

6ni kemuni sa lomani ira era sa cati kemuni, ka cati ira era sa lomani kemuni. Ni kemuni sa tukuna edaidai, ni sa ka walega vei kemuni ko ira na turaga kei ira na tamata; ni'u sa qai kila edaidai ke sa bula ko Apisalome, ka mate edaidai koi keimami kecega, ke sa vinaka vei kemuni.

7Ia oqo, mo ni tucake, mo ni curu yani, ka vosa vakayalovinaka vei ira na nomuni tamata; ni'u sa bubului vei Jiova, kevaka ko ni sa sega ni curu yani, ena sega ni tiko kei kemuni e dua na tamata e na bogi edaidai; ia ena ca vakalevu vei kemuni na ka oqo, ka vakalailai na ka ca kecega sa yacovi kemuni ni kemuni a cauravou, ka yacova na gauna oqo.”

8A sa qai tucake na tui, ka la'ki tiko mai na matamata-ni-koro. A sa tukuni vei ira kecega na tamata, ka vaka, “Raica, sa tiko na tui mai na matamata-ni-koro.” A ra sa lako kece mai na tamata kivei koya na tui.

Sa Lesu Tale ki Jerusalemi ko Tevita

Ia oqo era sa dro ko ira na Isireli, na tamata yadua ki na nona vale.

9A ra sa veileti na tamata kecega e na veiyavusa kecega ni Isireli, ka kaya, “Sa vakabulai keda na tui mai na ligadra na noda meca kecega, ka vakabulai keda mai na ligadra na kai Filisitia, ia oqo sa qai dro mai na vanua e na vuku i Apisalome.

10Ia ko Apisalome, o koya eda a lumuta me noda tui, sa mate e nai valu. Ia oqo, a cava dou sa sega kina ni kaya e dua na ka me baleta na nona kau lesu tale mai na tui?”

11Sa qai talaki ko Tevita na tui kivei rau na bete, ko Setoki kei Epaiaca, ka kaya, “Drau kaya mada vei ira na qase ni Juta, ‘A cava dou sa berabera sara kina ni kauta tale mai na tui ki na nona vale? Sa rogo oti mai vua na tui, io ki nona vale, na nodra vosa kecega na Isireli.

12Oi kemudou na wekaqu, na suiqu kei na lewequ koi kemudou. Ia ka cava dou sa berabera sara kina ni kauta tale mai na tui?’

13Ia drau kaya vei Amasa, ‘Ko sa sega li ni suiqu kei na lewequ, ko iko? Me cakacaka vakaoqo vei au ko Jiova, ka vakaikuritaka, kevaka ko sa sega ni mai kavetani ni valu tikoga e mataqu, mei sosomi kei Joape.’ ”

14A sa vagolea ko koya na lomadra kecega na tamata i Juta me vaka era sa dua bauga na tamata, ka ra sa tukuna kina vua na tui, “Mo ni lesu mai koi kemuni, kei ira kecega na nomuni tamata.”

15A sa lesu tale yani kina na tui ki na Joritani, ka ra sa lako mai ki Kilikali ko ira na Juta me ra tavaki koya na tui, ka me ra kauti koya na tui ki tai kadua ni Joritani.

Sa Vosoti Ira na Nona Meca ko Tevita

16 2Samu 16.5-13 Ia sa vakatotolo ko Semeai na luve i Kira, na Penijamini, o koya mai Peurimi, ka lako sobu kei ira na Juta, me tavaki Tevita na tui.

17A ra sa tiko vata kaya e le dua na udolu na tamata vei ira na Penijamini. E vaka talega kina ko Sipa, e dua na tamata vei ira na lewe-ni-vuvale i Saula, kei ira na luvena tagane e le tinikalima vata kei na nona tamata e le ruasagavulu, era sa lako vakusakusa yani e liu vua na tui ki tai kadua ni Joritani,

18ka ra takosova na wai me ra vakaleleca kina na nona lewe-ni-vuvale na tui, ka kitaka na veika sa vinaka vua.

Na Yaloveivosoti nei Tevita kivei Semeai

A sa cuva sobu ko Semeai na luve i Kira e na mata ni tui, ni sa vakarau takoso ki tai kadua ni Joritani ko koya,

19ka sa kaya vua na tui, “Mo ni kakua mada ni okati au me'u cala se nanuma nai valavala ca ka kitaka koi au na nomuni tamata e na siga ko ni a lako tani kina mai Jerusalemi. Mo ni kakua mada ni nanuma oqori kemuni na noqu turaga na tui.

20Ni ka'u sa kila koi au na nomuni tamata ni'u a kitaka na ka ca. O koya oqo, au sa liu mai kina edaidai vei ira kecega na yavusa i Josefa ka lako sobu mai me tavaki kemuni na noqu turaga na tui.”

21A sa vosa mai ko Apisai na luve i Seruwaia, ka kaya, “Me sega li ni vakamatei ko Semeai e na vuku ni ka oqo, ni sa rukaki koya nai lumuti i Jiova?”

22Ia sa kaya ko Tevita, “A cava li vei kedatou, oi kemudrau na luve i Seruwaia, mo drau sa vuki me noqu meca edaidai? Me dua li na tamata vei ira na Isireli me vakamatei edaidai? Au sa sega beka ni kila ni'u sa nodra tui na Isireli edaidai?”

23Ka sa kaya na tui vei Semeai, “O na sega ni mate.” A sa bubului kina vua ko koya na tui.

Rau Sota ko Tevita kei Mefiposeci

24 2Samu 9.1-13; 16.1-4 A sa lako sobu mai ko Mefiposeci na luve i Saula me tavaki koya na tui. A se sega mada ni vuya na yavana, se kotiva na kumina, se savata na nona i sulu me tekivu mai na siga ka lako tani kina na tui ka yacova na siga ka lesu bula tale mai kina.

25Ia ni sa lako mai ki Jerusalemi me tavaki koya na tui, sa kaya vua ko koya na tui, “A cava ko a sega ni lako vata kina kei au, Mefiposeci?”

26A sa kaya ko koya, “Noqu turaga na tui, sa cakacaka vakailasu vei au na noqu tamata, ni'u sa kaya koi au na nomuni tamata, ‘Au na vauca nai vodovodo ki na asa, me'u vodo kina, ka lako vata kei na tui.’ Ni'u sa lokiloki koi au na nomuni tamata.

27A sa la'ki beitaka vakailasu na nomuni tamata ko koya vei kemuni na noqu turaga na tui. Ia sa vaka e dua na agilosi ni Kalou na noqu turaga na tui; mo ni vakayacora ga kina na ka e vinaka vei kemuni.

28Ni ra sa vaka na tamata mate e matana na noqu turaga na tui ko ira kece mai na vale nei tamaqu, ia ko ni a lesia na nomuni tamata me'u tiko vata kei ira era kana mai na nomuni tepeli. Na dodonu cava tale beka e tu vei au, ka me'u tagi tale kina vua na tui?”

29A sa kaya vua ko koya na tui, “A cava ko sa vosa tale kina e na vuku ni veika me baleti iko? Au sa lewa oti: mo drau wasea na vanua kei Sipa.”

30A sa kaya vua na tui ko Mefiposeci, “Me taura kecega ko koya, ni sa qai lako vakacegu tale mai ki na nona vale na noqu turaga na tui.”

Na Yalovinaka i Tevita vei Pasiliai

31 2Samu 17.27-29 A sa lako sobu mai Rokilimi ko Pasiliai na kai Kiliati, ka lako vata kaya na tui ki tai kadua ni Joritani, ka me kauti koya ki tai kadua ni Joritani.

32A sa tamata qase sara ko Pasiliai, e walusagavulu na nona yabaki. A sa vakania na tui ni sa tiko mai Meeneimi, ni sa tamata vutuniyau sara ko koya.

33Ka sa kaya na tui vei Pasiliai, “Mo lako mai vata kei au, ka'u na vakani iko ni daru sa tiko mai Jerusalemi.”

34Ia sa kaya vua na tui ko Pasiliai, “Ena yabaki vica tale li na dede ni noqu bula, me'u lako cake kina kei na tui ki Jerusalemi?

35Sa walusagavulu na noqu yabaki e na siga oqo. Au sa kila rawa beka na ka vinaka kei na ka ca? Sa kila rawa beka na nomuni tamata na kenai kanakana ni ka ka'u sa kania se na ka ka'u sa gunuva? Au sa rogoca rawa tiko li na domodra na tagane dausere kei na yalewa dausere? Ia ka cava me'u vakaocataki kemuni kina noqu turaga na tui koi au na nomuni tamata?

36Ena lako vakalailai ga na nomuni tamata kei na tui ki tai kadua ni Joritani. Ia me sauma e na cava vei au na tui e na ka levu vakaoqo?

37Me'u lesu mada na nomuni tamata, me'u mate e na noqu koro, ka voleka ki nai bulubulu i tamaqu kei tinaqu. Ia sa tiko ga oqo na nomuni tamata ko Kimami. Me lako vata yani ko koya kei na noqu turaga na tui, ka mo ni cakava vua na ka e vinaka vei kemuni.”

38A sa kaya na tui, “Ena lako vata kei au ko Kimami, ka'u na cakava vua na ka e vinaka vei iko; ia na ka kece talega ko na kerea vei au, ka'u na kitaka vei iko.”

39A ra sa lako kece yani na tamata ki tai kadua ni Joritani. Ia ni sa yaco ki tai kadua na tui, sa reguci Pasiliai ko koya na tui, ka vosavakalougatataki koya; a sa lesu tale ko koya ki na nona vanua.

40A sa lako yani ki Kilikali na tui, ka sa lako vata kaya ko Kimami. A ra sa kauta na tui ko ira kecega na Juta, ka vakakina e veimama na kedra i wasewase na Isireli.

41Ka raica, era sa qai lako mai vua na tui ko ira kecega na Isireli, ka ra sa kaya vua na tui, “A cava era sa butakoci kemuni kina ko ira na weka i keimami, na Juta, ka ra sa kauti kemuni na tui kei ira na nomuni lewe-ni-vuvale, kei ira vata kecega na nomuni tamata, ki tai kadua ni Joritani?”

42A sa sauma vei ira na Isireli ko ira kecega na Juta, “Baleta ni sa weka i keimami dina na tui. A cava na vuna ko ni sa cudru kina e na vuku ni ka oqo? Keimami sa bau kana li vakalailai vua na tui? Se sa solia beka vei keimami ko koya e dua nai solisoli?”

43A ra sa vosa na Isireli vei ira na Juta, ka kaya, “Sa neimami e tini nai votavota e na tui, ka sa neimami vakalevu ko Tevita, ka sa nomuni vakalailai ga. Ka cava kemuni sa beci keimami kina, ni keimami sa sega ni tarogi mada eliu e na vuku ni nona kau tale mai na neimami tui?” Ia sa kaukauwa cake na nodra vosa na Juta, ka malumalumu na nodra vosa na Isireli.