Same 54 - Ai Vola Tabu (Vakadewa Makawa Vakavoutaki 2021)（FRV21）

A Masu ni Kere Veitaqomaki Vua nai liuliu ni sere: kei nai yaya ni qiriqiri vaka-wa. A Masikili i Tevita, ni ra sa lako mai vei Saula na kai Sifi ka kaya vua, Ko Tevita e vunitaki koya tiko ena keimami maliwa.

1Mo ni vakabulai au na Kalou, e na vuku ni yacamuni,

ka lewa e na vukuqu e na nomuni kaukauwa.

2Mo ni rogoca na noqu masu, na Kalou;

mo ni vakatu daligamuni ki na vosa ni gusuqu.

3Ni ra sa tu mai me noqu meca na kai tani,

a ra sa segata me'u mate ko ira era dauvakacaca;

era sa sega ni raici koya na Kalou ni tu e matadra. Sela

4Raica, sa noqu dauniveivuke na Kalou;

sa tiko vata na Turaga kei ira era tokona na yaloqu.

5Ena sauma ko koya na ca vei ira na noqu meca.

Mo ni muduki ira laivi e na nomuni yalodina.

6Au na vakacabora vei kemuni nai madrali mai na vu ni lomaqu;

au na vakavinavinaka ki na yacamuni, Jiova; ni sa ka vinaka oqo.

7Ni sa vakabulai au ko koya mai na ka rarawa kecega,

ka sa raica na mataqu na ka sa yaco vei ira na noqu meca.