Same 5 - Ai Vola Tabu (Vakadewa Makawa Vakavoutaki 2021)（FRV21）

Na Masu ni Kere Veitaqomaki Vua nai liuliu ni sere: baleta na bitu ni vakatagi. A Same i Tevita.

1Kemuni Jiova, mo ni vakalakala daligamuni ki na noqu vosa;

ni kila na noqu nanuma.

2Ni vakarogoca na noqu tagi,

noqu Tui kei na noqu Kalou,

ni'u sa masu ga vei kemuni.

3I Jiova ko ni na rogoca na domoqu, e na mataka;

e na mataka ka'u na vakarautaka na noqu masu vei kemuni, ka rai cake.

4Ni kemuni sa sega ni Kalou sa rekitaka na ka e sega ni dodonu;

ena sega na ca me tiko vata kei kemuni.

5Ena sega ni wavu tu e matamuni ko ira na lialia;

ko ni sa cati ira kecega era sa kitaka nai valavala ca.

6Kemuni na vakarusai ira era sa vosa lasu;

na tamata e vakadave-dra kei na dauveivakaisini ena cata sara ko Jiova.

7Ia koi au, e na vuku ni nomuni loloma levu,

ka'u na curu ki na nomuni vale,

ka'u na cuva vaka ki na nomuni vale tabu

ni'u sa rerevaki kemuni.

8I Jiova, ni tuberi au e na nomuni yalododonu

e na vukudra na noqu meca;

ni vakadodonutaka e mataqu na nomuni sala.

9 Roma 3.13 Ni sa sega na ka dina e na gusudra;

sa ca sara na lomadra;

ai bulubulu sa dola tu na nodra i tilotilo;

era sa dauveicavilaki e na yamedra.

10Na Kalou, mo ni vakacalai ira;

me vu ni nodra bale na nodra bose;

vakasevi ira e na vuku ni nodra i valavala ca e vuqa,

ni ra sa dautalaidredre vei kemuni.

11Ia me ra reki ga ko ira kece sa vakararavi vei kemuni;

me ra sere vakadomoilevu ga ka sega ni mudu.

Ni kemuni na vakarurugi ira,

me ra marautaki kemuni ko ira era sa lomana na yacamuni.

12Ni sai kemuni, Jiova, ena vakalougatataka na yalododonu;

ko ni na vakavolivoliti koya e na loloma me vaka e nai sasabai.