Same 101 - Ai Vola Tabu (Vakadewa Makawa Vakavoutaki 2021)（FRV21）

A Vosa ni Yalayala ni Tui A nei Tevita. A Same.

1Au na seretaka na loloma kei na lewa dodonu;

vei kemuni Jiova, ka'u na ia na sere.

2Au na muria vakavuku nai valavala savasava.

O ni na lako mai vei au ninaica?

Au na ia nai valavala e noqu vale e na yalododonu.

3Au na sega ni viritura e mataqu e dua na ka ca;

au sa cata na nodra i valavala era sa gole vakatani;

ena sega ni kabiti au.

4Ena lako tani vei au na yalotakelo;

au na sega ni kila e dua na ka ca.

5O koya sa kaseta vakavuni na kai nona,

ka'u na muduka laivi.

O koya sa mataviavialevu ka yaloviavialevu,

ka'u na sega ni vosota.

6Au na raici ira na tamata era yalodina e na vanua,

me ra tiko vata kei au;

o koya sa muria nai valavala dodonu

ena qaravi au.

7O koya sa cakacaka vakaveivakaisini,

ena sega ni tiko e noqu loma ni vale;

o koya sa vosa lasu,

ena sega ni tiko dei e mataqu.

8Au na vakaoti ira kece tani vakasauri

na tamata i valavala ca ni vanua,

me'u muduki ira laivi kecega

na daucaka cala mai na koro i Jiova.