Cakacaka 19 - Ai Vola Tabu (Vakadewa Makawa Vakavoutaki 2021)（FRV21）

Ko Paula Mai Efeso

1Ia ni sa tiko mai Korinica ko Apolosa, sa lako ko Paula ki na yasana vaka ki na loma ni vanua ka yaco ki Efeso. A sa kunea mai kea eso na tisaipeli.

2A sa kaya vei ira, “Dou sa ciqoma li na Yalo Tabu ni dou sa yaco me tamata vakabauta, se segai?” A ra sa kaya vua, “Keitou sa sega mada ni rogoca se sa soli na Yalo Tabu, se segai.”

3A sa kaya vei ira ko koya, “Dou sa papitaisotaki beka e na cava?” A ra sa kaya, “E na papitaiso i Joni.”

4Maciu 3.11; Mari 1.4,7,8; Luke 3.4,16; Joni 1.26,27Sa qai kaya ko Paula, “E dina ga sa dauveipapitaisotaki ko Joni e na papitaiso ni veivutuni, ka kaya vei ira na tamata, me ra vakabauti koya ena muri koya mai, ko koya oqo ko Jisu.”

5Ia ni ra sa rogoca era sa papitaisotaki e na yaca ni Turaga ko Jisu.

6Ia ni sa tabaki ira ko Paula e na ligana, sa yaco kivei ira na Yalo Tabu; a ra sa vosataka na vosa ni veivanua tani ka parofisai.

7Ko ira kecega na tagane e rauta ni ra lewe tinikarua taucoko.

8A sa lako ko koya ki na valenilotu ka sa vosa doudou tikoga ka vula tolu, ka sa vakatavuvuli ka veivakauqeti vei ira e na veika ni matanitu ni Kalou.

9Ia ni ra sa vakalomaqataki eso ka sega ni vakabauta, ka sa vosavakacacataka na Sala e matadra nai vavakoso, sa qai lako tani mai vei ira ko koya, ka kauti ira vata na tisaipeli, ka dau laki vakatavuvuli tiko e na veisiga e na vale ni wili vola nei Tirano.

10A sa kitaka vakakina ka yabaki rua; ia era sa rogoca kina na vosa ni Turaga ko Jisu ko ira kecega era sa tiko mai Esia, ko ira na Jiu, kei ira talega na kai Kirisi.

Ko Iratou na Luve i Siva

11A sa kitaka na Kalou na ka-mana vakaidina eso e na liga i Paula,

12a ra sa kauta tani mai na yagona nai tavoi eso kei nai sulu eso vei ira era tauvi-mate, a sa takali kina na nodra mate, a sa lako tani mai vei ira ko ira na yalo ca.

13Ia ka so na Jiu era sa dauveilakoyaki, ka dauia me vakasevi ira na tevoro, eratou sa bolea me ratou cavuta na yaca ni Turaga ko Jisu vei ira ka curumi ira na yalo ca, a ratou sa kaya, “Keitou sa vakatalai kemudou tani e na yaca i Jisu, ko koya sa vunautaka ko Paula.”

14A ratou sa lewe vitu na luve i Siva na Jiu, ka bete levu, eratou sa kitaka vakakina.

15Sa qai vosa na yalo ca, ka kaya, “Ko Jisu ka’u sa kila, ko Paula talega ka’u sa kila; ia ko cei koi kemudou?”

16A sa rika vei iratou na tamata sa tiko vua na yalo ca, a sa rawai iratou, ka sa kaukauwa vei iratou, a ratou sa dro tani kina mai na vale ko ya, a ratou sa luvawale ka mavoa.

17A sa kila na ka oqo ko ira kecega, na Jiu kei na kai Kirisi talega, era sa tiko mai Efeso; a sa kani ira kecega na rere, a sa vakabekabei na yaca ni Turaga ko Jisu.

18A sa lewe vuqa vei ira sa vakabauta era sa lako mai, ka vakatusa, ka vakatakila na nodra i valavala.

19A sa lewe vuqa talega vei ira era daukitaka eliu nai lawaki vakatevoro eso, era sa kumuna vata na nodra i vola, ka visa e na matadra kecega; a ra sa wilika vata na kedrai voli, a ra sa kunea ni sa limasagavulu na udolu nai lavo siliva.

20Sa tubu vakaukauwa vakaoqo na vosa ni Turaga, ka sa gumatua.

Ko Paula Mai Efeso

21Ia ni sa oti na veika oqo, sa nakita ko Paula e lomana, me lakovi Masitonia mada kei Akaia, ka qai lako ki Jerusalemi, a sa kaya, “Ni ka’u sa tiko mada ki kea, e dodonu me’u qai raici Roma talega.”

22A sa qai tala ki Masitonia e lewe rua vei ira sa dauqaravi koya, ko Timoci kei Erasito; a sa tiko vakadede vakalailai ko koya mai Esia.

23Ia e na gauna ko ya sa tubu vakalevu na ue me baleta na Sala.

24Ni sa dua, na yacana ko Timitirio, a matai ni siliva, sa dau cakava e na siliva nai vakatakarakara ni burekalou nei Atemisa, a sa vakalevutaka kina na nodra i yau na matai.

25Ni sa kacivi ira vata, kei ira na tamata era sa daucakacaka vakakina, sa kaya ko koya, “Oi kemudou na turaga, dou sa kila sa cakacaka oqo eda sa vakaiyau kina.

26Ia dou sa qai raica ka rogoca e Efeso kei na wase levu ni vanua ko Esia ni ko Paula sa rawa ka saumaki ira lesu e lewe vuqa sara na tamata ni sa kaya sa sega ni kalou na ka sa caka e na liga.

27Ia sa voleka ni beci kina na noda cakacaka oqo, ka sega ni koya duaduaga oqo, sa voleka talega me vakawaletaki na bure i Atemisa na kalouyalewa levu, ka me lutu mai na nona i tutu lagilagi, ko koya ka sa soro vua ko Esia taucoko kei vuravura.”

28Ia ni ra rogoca, sa ka tani sara na nodra cudru, ka ra sa qoqolou, ka kaya, “Sa levu ga ko Atemisa na kalou ni kai Efeso!”

29A sa ka levu na ue e na koro taucoko; a ra sa curu vakaukauwa vata yani ki na bure levu, ka ra kauti Keio vakaukauwa ki loma vata kei Arisitako, koi rau na kai Masitonia ka rau daulako voli kei Paula.

30Ia ni sa via curu ko Paula, vei ira na tamata, era sa tarovi koya ko ira na tisaipeli.

31O ira talega eso era sa turaga mai Esia, era sa nona i to, era sa talaki vua, ka masuta me kakua ni doudou me curu ki na bure levu.

32A ra sa dui qoqolou, ni ra sa ue nai soqosoqo era lewe vuqa; ia sa lewe levu vei ira era sega ni kila se cava era a soqoni vata kina.

33Eso vei ira na lewe vuqa era sa vakaturi Alekisada cake, ni sa cikevi koya ko ira na Jiu. A sa vakatabataba ko Alekisada, a sa via tusanaki koya vei ira na tamata.

34Ia ni ra sa kila ni sa Jiu ko koya, sa sosoraki vata na domodra ka oti e rua na aua, ka qoqolou vaka, “Sa levu ga ko Atemisa na nodra kalou na kai Efeso!”

35Ia ni sa tarovi ira na lewe vuqa na vunivola ni koro, sa kaya, “Oi kemudou na kai Efeso, ko cei na tamata sa sega ni kila ni sa vakatau ki na lewe ni koro ko Efeso na burekalou ni kalouyalewa levu ko Atemisa, kei na matakau sa lutu sobu mai lomalagi?

36Ia ni sa sega ni vakatitiqataki rawa na veika oqo, sa dodonu mo dou tiko malua, ka kua ni kitaka vakailoa e dua na ka.

37Ni dou sa kauti ira mai ki ke na tamata oqo, era sa sega ni daubutako mai na vale-ni-soro, se vosavakacacataka na noda kalouyalewa.

38Ia kevaka sa via beitaka e dua ko Timitirio kei ira na matai era sa nona i to, sa dola na veilewai, ka sa tiko na turaganilewa. Me ra kauta mai kina na nodra veibeitaki.

39Ia kevaka sa dua tale na ka dou sa taroga, ena lewai e na dua na soqoni me vaka na kena i vakarau.

40Ni sa rawa ni beitaki vei keda na ue, e na vuku ni ka sa yaco edaidai, ka ni da sa sega ni tukuna rawa e dua na ka e vuna na soqoni vata oqo.”

41Ia ni sa vosa oti vakaoqo, sa qai vakasukai ira nai soqosoqo.