Vakarua 28 - Ai Vola Tabu (Vakadewa Makawa Vakavoutaki 2021)（FRV21）

Na Veivakalougatataki e na Vuku ni Talairawarawa(Vunau ni Soro 26.3-13; Vakarua 7.12-24)

1 Vrua 11.13-17 “Kevaka ko ni na vakarorogo vakaidina ki na vosa i Jiova na nomuni Kalou, mo ni vakabauta ka cakava na nona i vakaro kecega ka'u sa vakarota vei kemuni edaidai, ena qai laveti kemuni cake ko Jiova na nomuni Kalou mo ni uasivi vei ira kecega na matanitu e vuravura.

2Ia ena yacovi kemuni na ka ni veivakalougatataki kecega oqo, ka vauci kemuni, kevaka ko ni na vakarorogo ki na vosa i Jiova na nomuni Kalou.

3Ko ni na kalougata e na koro, ko ni na kalougata talega e na veiwere.

4Ena kalougata na vua ni ketemuni, kei na vuata ni nomuni vanua, kei na vua ni nomuni manumanu e yavai va, na luve ni nomuni bulumakau, kei na nomuni qele ni sipi.

5Ena kalougata na nomuni sova kei na nomuni lololo.

6Ko ni na kalougata ni ko ni curu mai, ko ni na kalougata talega ni ko ni sa curu yani.

7“A nomuni meca era vala kei kemuni, ena soli ira ko Jiova me ra moku e matamuni. Era na lako mai e na dua na sala me ia na veisaqasaqa kei kemuni, ka ra na dro tani e matamuni e na vitu na sala.

8Ena vakarota ko Jiova mo ni kalougata e na nomuni lololo, kei na ka kecega sa kitaka na ligamuni; ia ena vakalougatataki kemuni e na vanua sa solia vei kemuni ko Jiova na nomuni Kalou.

9Ena vakataudeitaki kemuni ko Jiova mo ni nona matanitu tabu, me vaka ka bubului kina vei kemuni ko koya, kevaka ko ni na vakabauta na vunau i Jiova na nomuni Kalou, ka lako e na nona sala.

10A ra na raica na matanitu kecega e vuravura ni sa vakatokai vei kemuni na yaca i Jiova; a ra na rerevaki kemuni.

11Ia ena vakalevutaka na nomuni yau ko Jiova, e na vua ni ketemuni, kei na vua ni nomuni manumanu e yavai va, kei na vuata ni nomuni vanua, e na vanua sa bubului kina ko Jiova vei ira na nomuni qase me solia vei kemuni.

12Ena dolava vei kemuni ko Jiova na nona lololo vinaka, na lomalagi, me vakatauca na uca ki na nomuni vanua e na vula e dodonu, ka me vakalougatataka na cakacaka kecega ni ligamuni. Ka ko ni na soli-ka me talevaki ki na matanitu e vuqa, ia ko ni na sega ni kerea e dua na ka.

13Ia ena qisi kemuni ko Jiova mo ni uludra, ka sega ni buidra; ia ko ni dau cecere ka sega ni lolovira—kevaka ko ni na vakarorogo ki nai vakaro i Jiova na nomuni Kalou, ka'u sa vakarota vei kemuni edaidai, mo ni vakabauta ka cakava,

14ka kevaka ko ni na sega ni lako tani mai na dua na vosa ka'u sa vakarota vei kemuni edaidai, ki nai matau, se nai mawi, ka muria na kalou tani mo ni qaravi ira.

Na Veicudruvi e na Vuku ni Talaidredre(Vunau ni Soro 26.14-26)

15“Ia kevaka ko ni na sega ni vakarorogo ki na vosa i Jiova na nomuni Kalou mo ni vakabauta ka cakava na nona vunau kecega kei na nona i lesilesi ka'u sa vakaroti kemuni kina edaidai, ena qai yacovi kemuni ka vauci kemuni na ka ca kecega oqo:

16Ko ni na cudruvi e na koro, ko ni na cudruvi talega e na veiwere.

17Ko ni na cudruvi e na nomuni sova kei na nomuni lololo.

18Ena cudruvi na vua ni ketemuni, kei na vuata ni vanua, na luve ni nomuni bulumakau, kei na nomuni qele ni sipi.

19Ko ni na cudruvi ni ko ni curu mai, ko ni na cudruvi talega ni ko ni curu yani.

20“Ena vakayacora vei kemuni ko Jiova na rarawa, kei na veilecayaki, kei na cudru e na ka kecega ko ni sa cakava e na ligamuni, ka mo ni kawaboko sara mada, ka rusa vakasauri, e na vuku ni ca ni nomuni valavala, baleta ni ko ni sa biuti au.

21Ena vakabita vei kemuni ko Jiova na mate ca, ka me vakaoti kemuni sara ko koya mai na vanua ko ni sa lako kina mo ni taukena.

22Ena yaviti kemuni ko Jiova e na lila balavu, kei na katakata, kei na karovisa katakata, kei na waqawaqa ni yago, kei nai seleiwau, kei na cagi todra, kei na vu ni malai; a ra na muri kemuni tiko mo ni rusa mada.

23Ia na lomalagi e cake sa donuya na ulumuni ena parasa, kei na qele e yavamuni ena kaukamea.

24Ena cakava ko Jiova na uca ni nomuni vanua me nuku ka kuvu ni qele. Ena tauci kemuni mai lomalagi, ka mo ni vakarusai mada.

25“Ena soli kemuni ko Jiova mo ni moku e na matadra na nomuni meca; ko ni na lako yani e na dua na sala me vala kei ira, ka kubu e na sala e vitu e matadra. Ia ko ni na veikauyaki ki na matanitu kecega e vuravura.

26Ia na yagomuni mate ena kedra kakana na manumanu vuka kecega, kei na manumanu kila ni vanua, ka sega na tamata me vakasava tani.

27Ena vakayacora vei kemuni ko Jiova na bo ni Ijipita, kei na somunadara, kei na bu ca, kei na milamila, ko ni na sega ni vakabulai rawa kina.

28Ena yaviti kemuni ko Jiova mo ni lialia, ka mataboko, me kidacala talega na lomamuni;

29ia ko ni na vakayayamo voli e na siga levu, me vaka sa vakayayamo voli na mataboko e na butobuto, ia ena sega ni yaco na ka ko ni cakava. Ia ko ni na vakasaurarataki, ka daukovei tikoga, ia ena sega nai vakabula.

30O ni na vosaka na yalewa me watimuni, ia ena moce kaya na tamata tani. Ko ni na tara na vale, ia ko ni na sega ni tiko kina. Ko ni na tea na veivaini, ia ko ni na sega ni tauca na vuana.

31A nomuni bulumakau ena vakamatei e matamuni, ia ko ni na sega ni kana kina. A nomuni asa ena koveraki tani e matamuni, ka sega ni vakasukai vei kemuni. A nomuni sipi ena soli yani vei ira na nomuni meca, ia ena sega e dua me kauta tale mai vei kemuni.

32A luvemuni tagane kei na luvemuni yalewa era na soli ki na kai tani, ia ena rai matua tiko na matamuni ka na oca e na vukudra e na siga ka bogi; ia ena malumalumu na ligamuni.

33Era na kania na vuata ni nomuni vanua, kei na nomuni cakacaka kecega, e dua na matanitu ko sa sega ni kila; ia ko ni na vakasaurarataki ga ka butuqaqi tikoga,

34ia ko ni na lialia mai e na vuku ni ka ena rairai ki na matamuni, a veika ko ni na raica.

35Ena yavita na durumuni kei na yavamuni ko Jiova e na bo rarawa sa sega ni vakabulai rawa, mai na qeteqete ni yavamuni ka cavaraka na buradelamuni.

36“Ena kauti kemuni ko Jiova, kei na nomuni tui ko ni na bulia me lewai kemuni, ki na dua na matanitu ko sa sega ni kila, koi kemuni, se ko ira na nomuni qase; ia ko ni na qarava mai kina na kalou tani, na kau kei na vatu.

37Ia ko ni na yaco me ka ni veivakurabuitaki, nai bole ca, kei na ka e dredrevaki, e na kedra maliwa na matanitu kecega sa kauti kemuni kina ko Jiova.

38E levu na sore ni sila ko ni na kauta yani ki na nomuni were, ka lailai na ka ko ni na yauta tale mai; ni ra na kania na vodre.

39O ni na tea na veivaini, ka samaka, ia ko ni na sega ni gunuva na waini, se kumuna vata na vuana; ni na kania na baca.

40Ena so na nomuni vu ni olive e na nomuni yasana kecega, ia ko ni na sega ni lumuti kemuni e na kena waiwai; ni na qeqera na vua ni nomuni olive.

41Ena sucu vei kemuni na gonetagane kei na goneyalewa, ia era na sega ni tiko dei vei kemuni; ni ra na kau vakabobula.

42Ena kania na nomuni kau kecega kei na vuata ni nomuni vanua na vodre.

43Na kai tani sa tiko kei kemuni ena tubu cake me cecere sara vei kemuni, ia koi kemuni, ko ni na lako sobu me lolovira sara.

44Ena solia vei kemuni ko koya me talevaki, ka ko ni na sega ni solia vua me talevaki. Ena ulumuni ko koya, ia koi kemuni ko ni na buina.

45“Na ca kecega oqo ena yacovi kemuni, ka muri kemuni, ka vauci kemuni, ka mo ni vakarusai mada; ni ko ni a sega ni vakarorogo ki na vosa i Jiova na nomuni Kalou, mo ni vakabauta na nona i vakaro kei na nona i lesilesi sa vakarota vei kemuni ko koya.

46Ia era na tiko vei kemuni mei vakatakilakila, kei na ka ni veivakidacalataki, vei ira talega na nomuni kawa ka tawa mudu.

47Ni ko ni a sega ni qaravi Jiova na nomuni Kalou e na marau, kei na reki ni yalomuni, e na vuku ni sa levu tu na ka kecega,

48o koya ko ni na qaravi ira kina na nomuni meca sa tala ko Jiova me vala kei kemuni, ni ko sa viakana, ka viagunu, ka sa luvawale, ka sa dravudravua e na ka kecega. Ia era na vauca ki domomuni nai vau kaukamea, ka me vakarusai kemuni mada.

49Ena kauta mai ko Jiova e dua na matanitu mai na vanua yawa me vala kei kemuni, io mai nai yalayala kei vuravura, me vaka na vuka ni ikeli, a matanitu ko ni sa sega ni kila na kena vosa,

50a matanitu sa mata lisoliso, sa na sega ni dokai ira na qase, se lomani ira na cauravou.

51Ia era na kania na nomuni luve ni bulumakau, kei na vuata ni nomuni vanua, ka mo ni vakarusai mada, ena sega talega ni vakavoca vei kemuni na sila, na waini, se na waiwai, se na nomuni luve ni bulumakau, se na nomuni qele ni sipi, ka me vakarusai kemuni mada.

52“Ia era na bukuya na druadrua e na nomuni veikoro kecega, ka me bale sobu mada na nomuni bai cecere ka kaukauwa, na ka ko ni a vakararavi kina, e na nomuni vanua taucoko. Ia era na bukuya na druadrua vei kemuni e na nomuni veikoro kecega e na nomuni vanua kecega, sa solia vei kemuni ko Jiova na nomuni Kalou.

53Ia ko ni na kania na vua ni ketemuni, na lewe ni luvemuni tagane kei na luvemuni yalewa, ko ira sa solia vei kemuni ko Jiova na nomuni Kalou, ni sa buku na druadrua e na vuku talega ni leqa era na vakaleqaleqai kemuni kina na nomuni meca.

54Na tamata vei kemuni sa daurere ka bati digidigi sara, ena duatani na matana vua na wekana, vei koya talega na watina sa dau lomana sara, ka vei ira na luvena era sa vo tiko vua,

55sa sega kina ni solia vua e dua vei ira e dua na tiki ni luvena sa kana kina ko koya, ni sa sega ni vo vua e dua na ka e na vuku ni buku ni druadrua, kei na leqa sa na vakaleqai kemuni kina ko ira na nomuni meca e na nomuni veikoro kecega.

562Tui 6.28,29; Lele 4.10Na yalewa vei kemuni sa dauyalolokomi ka bati digidigi, sa sega ni via tara na qele e na qeteqete ni yavana e na vuku ni daulumaluma kei na dauyalolokomi, ena ca na matana vua na watina sa daulomana, vua talega na luvena tagane, kei na luvena yalewa,

57ki nai tokatoka-ni-gone talega sa lako mai na ketena, vei ira talega na luvena sa vakasucuma ko koya, ni na kania vuni ko koya ni sa dravudravua e na ka kecega, e na vuku ni buku ni druadrua, kei na leqa sa na vakaleqai kemuni kina na nomuni meca e na nomuni veikoro.

58“Kevaka ko ni sa bese ni vakabauta ka cakava na vosa kecega ni vunau oqo sa volai e nai vola oqo, ka mo ni rerevaka na yaca rogo ka rerevaki oqo, ko Jiova na nomuni Kalou,

59ena qai cakava ko Jiova me ka e veivakidacalataki na ka ko ni yaviti kina kei na ka ena yaviti kina na nomuni kawa, ni ko ni sa yaviti vakalevu ka vakadede, ka mate rarawa ka vakadede.

60Ena vakayacora talega vei kemuni na mate kecega ni Ijipita ko ni sa daurerevaka, ia ena kabiti kemuni.

61Ia na mate kecega, kei na rarawa kecega, sa sega ni volai e nai vola ni vunau oqo, ena vakayacora vei kemuni ko Jiova, ka mo ni vakarusai mada.

62Ia koi kemuni ka vo tiko ena lewe lailai, ia eliu ko ni sa vaka na veikalokalo ni lomalagi e na kemuni lewe vuqa; ni ko ni a bese ni vakarorogo ki na vosa i Jiova na nomuni Kalou.

63Ia me vaka ka rekitaki kemuni eliu ko Jiova me caka vinaka vei kemuni, ka me vakalewevuqataki kemuni; ena qai reki vakakina ko Jiova me vakarusai kemuni, ka vakawabokotaki kemuni; ia ko ni na cavuraki tani mai na vanua ko ni sa lako kina mo ni taukena.

64“Ia ena dui vakasevi kemuni ko Jiova vei ira na matanitu kecega, mai na dua nai yalayala kei vuravura ka yacova na kenai yalayala kadua; ia ko ni na qarava mai kea na kalou tani, ko ni a sega ni kila, koi kemuni se ko ira na nomuni qase, io na kau kei na vatu.

65Ia ko ni na sega ni tiko vinaka e na veimatanitu oqo, ka na sega ni vakacegu na qeteqete ni yavamuni. Ia ena vakayacora vei kemuni ko Jiova na yalo e sautaninini, kei na mata e rai cala, kei na loma rarawa.

66Ia kemuni na vakabekataka na nomuni bula. Ia ko ni na rere e na siga kei na bogi, ka sega ni dinata ni kemuni na bula.

67E na mataka ko ni na kaya, ‘Kevaka me yakavi mada ga!’ ia e na yakavi ko ni na kaya, ‘Kevaka me mataka mada ga!’ e na vuku ni rere ni lomamuni ko ni sa rere kina, kei na veika eso ena raica na matamuni.

68Ia ena kauti kemuni tale ki Ijipita ko Jiova e na veiwaqa ki na sala ka'u a kaya kina vei kemuni ni ko ni na sega ni raica tale; ia ko ni na qai soli kemuni mo ni volitaki mai kea vei ira na nomuni meca me tagane bobula, ka yalewa bobula, ia ena sega e dua me voli kemuni.”