Sakaraia 8 - Ai Vola Tabu (Vakadewa Makawa Vakavoutaki 2021)（FRV21）

Na Yalayala ni Kalou me Baleti Saioni

1A sa yaco tale vei au na vosa i Jiova-ni-lewevuqa, ka vaka:

2“Sa kaya vakaoqo ko Jiova-ni-lewevuqa: Au sa vuvu e na vuku i Saioni e na vuvu levu, io, au sa vuvu e na vukuna e na cudru levu.

3Sa kaya vakaoqo ko Jiova: Au sa qai lesu mai ki Saioni, ia ka'u na tiko ga e na loma i Jerusalemi. Ena vakatokai talega ko Jerusalemi me koro daudina, kei na ulunivanua i Jiova-ni-lewevuqa me ulunivanua tabu.

4Sa kaya vakaoqo ko Jiova-ni-lewevuqa: Ena tiko tale e na saqata mai Jerusalemi na tagane qase kei na yalewa qase, ia era na dui vakaititoko voli baleta ni ra sa qase sara.

5Ia na saqata ni koro ena oso e na gonetagane kei na goneyalewa era qito voli e na kena saqata.

6Sa kaya vakaoqo ko Jiova-ni-lewevuqa: Kevaka ena ka ni veivakurabui ki na matadra na vo-ni-bula ni matatamata oqo e na gauna ko ya, ena yaco me ka ni veivakurabui beka talega ki mataqu, sa kaya ko Jiova-ni-lewevuqa?

7Sa kaya vakaoqo ko Jiova-ni-lewevuqa: Raica, au na vakabulai ira na noqu tamata mai na vanua e cadra kina na siga, kei na vanua e dromu kina na siga,

8ka'u na kauti ira mai me ra na tiko e loma i Jerusalemi. Era na vakabau me noqu tamata, ia koi au, ka'u na nodra Kalou, e na yalodina kei na yalododonu.”

9Sa kaya vakaoqo ko Jiova-ni-lewevuqa: “Me kaukauwa na ligamudou, oi kemudou sa rogoca e na gauna oqo na veivosa oqo mai na gusudra na parofita era a tiko e na siga ka tauyavutaki kina na vale i Jiova-ni-lewevuqa, io, na vale tabu me sa tara rawa.

10Ia eliu, ni se bera ni yaco na gauna ko ya, sa sega na kenai voli na tamata, se na kenai voli na manumanu; ka sa sega ga na vakacegu vua sa curu yani se vua sa curu mai e na vuku ni meca, ni'u sa vakavuna na nodra dui veimecaki kece na tamata yadua.

11Ia e na gauna oqo ena sega ni vaka e na gauna eliu na noqu i valavala ki na vo-ni-bula ni matatamata oqo, sa kaya ko Jiova-ni-lewevuqa.

12Ni na yaco na gauna ni sautu. Na vaini ena vua tiko, ia na qele ena vuataka na vuana, kei lomalagi talega ena solia na kena tegu. Ia ka'u na solia vei ira na vo-ni-bula ni matatamata oqo me ra taukena na ka kecega oqo.

13Ia ena yaco, me vaka dou a vu ni veivakarusai vei ira na veimatanitu, oi kemudou na vale i Juta kei na vale i Isireli; au na vakabulai kemudou, ka dou na yaco vaka talega kina mo dou vu ni veivakalougatataki. Dou kakua ni rere, ia me kaukauwa ga na ligamudou.”

14Ni sa kaya vakaoqo ko Jiova-ni-lewevuqa: “Me vaka ka'u a nakita me'u cudruvi kemudou, ni ra sa vakacudrui au ko ira na nomudou qase, ia ka'u a sega ni veivutuni, sa kaya ko Jiova-ni-lewevuqa,

15sa vaka talega kina ni ka'u sa nakita e na gauna oqo me'u caka vinaka kivei Jerusalemi kei na vale i Juta; dou kakua ni rere.

16Efe 4.25Oqo na veika mo dou cakava: Dou dui vosa dina yadudua vua na kai nona; ka mo dou ia e na nomudou veimatamata-ni-koro na lewa dina kei na tiko veilomani;

17ka mo dou kakua ni dui nanuma ca e na lomamudou vua na kai nona, ka mo dou kakua ni vinakata na bubului vakailasu, ni ka'u sa cata na ka kecega oqo sa kaya ko Jiova.”

Na Lolo e Rekitaki

18A sa yaco vei au na vosa i Jiova-ni-lewevuqa, ka vaka,

19“Sa kaya vakaoqo ko Jiova-ni-lewevuqa: Na lolo e nai kava ni vula, kei na lolo e nai kalima, kei na lolo e nai kavitu, kei na lolo e nai katini ni vula, ena ka ni reki ga kei na marau ki na vale i Juta, ka solevu vinaka. Ia mo dou vinakata ga na ka dina kei na veilomani.

Na Lewe Vuqa Era na Vakayarayarataki ki Jerusalemi

20“Sa kaya vakaoqo ko Jiova-ni-lewevuqa: Ena lako mai na veimataqali, kei na lewe ni veikoro e vuqa;

21ka ra na lako mai na lewe ni koro e dua ki na lewe ni koro ka dua, ka kaya, ‘Me da mai lako kusarawa me kere loloma vei Jiova, ia me da qaravi Jiova-ni-lewevuqa: au na lako talega koi au.’

22Io, ena lako mai na veimataqali e vuqa kei na veimatanitu kaukauwa, me mai qaravi Jiova-ni-lewevuqa e Jerusalemi, ka masuta na veivakalougatataki i Jiova.

23Sa kaya vakaoqo ko Jiova-ni-lewevuqa: E na gauna ko ya, era na mai taura na tutu ni nona i sulu e dua na Jiu e lewe tini na tamata era duivosavosa mai na veivanua kecega, ka kaya, ‘Me keitou lako vata kei kemudou, ni keitou sa rogoca sa tiko vata kei kemudou na Kalou.’ ”