Aisea 34 - Ai Vola Tabu (Vakadewa Makawa Vakavoutaki 2021)（FRV21）

Na Nodra Lewai na Veimatanitu

1Dou toro mai, na lewe ni veimatanitu, mo dou rogoca;

ia dou vakarorogo, na veimataqali!

Me rogoca ko vuravura, kei na ka sa sinai kina;

na veivanua, kei na ka kece sa tubu mai kina.

2Ni sa cudru sara ko Jiova vei ira kecega na veimatanitu,

a sa lesavi ira na nodra mataivalu kecega;

sa lesi ira me ra rusa sara, sa soli ira me ra vakamatei.

3Ena biu ki tautuba na tamata sa vakamatei,

ena kuvu cake na bona ni yagodra;

ia na veiulunivanua ena waicala e na kedra dra.

4 Maciu 24.29; Mari 13.25; Luke 21.26; Vtaki 6.13,14 Ena waicala yani na kalokalo kecega ni lomalagi,

ka na vivigi vata na lomalagi me vaka nai vola balavu sa vivigi tu.

Ena lutu mai na kalokalo kecega,

me vaka sa mira mai na drau ni vaini,

ka vaka sa qeqera mai na vua ni lolo.

5 Aisea 63.1-6; Jere 49.7-22; Isi 25.12-14; 35.1-15; Emo 1.11,12; Ope 1.1-14; Mala 1.2-5 Ni sa lomoci mai lomalagi na noqu i seleiwau;

raica, ena lutuki Itomi,

kei ira na tamata ka'u sa lesia me rusa.

6Sa mamau nai seleiwau i Jiova e na dra;

sa boro e na uro,

e na dra ni lami kei na dra ni me,

e na uro ni ivi ni sipi tagane.

Ni sa dua nai madrali vei Jiova mai Posira,

kei na veivakamatei levu mai na vanua ko Itomi.

7Ia na iunikoni ena bale vata kei ira,

kei na bulumakau sa sele kei na bulumakau tagane.

Ena to na nodra vanua e na dra,

ka vakabulabulataki na nodra qele e na uro.

8Ni sa kena siga ni nona veicudruvi ko Jiova,

na yabaki ni veisausaumi e na vuku i Saioni.

9Ia na kena uciwai ko Itomi ena vuki me makadre,

kei na kena qele me sulifure,

ia ena yaco me makadre sa waqa tu na kena vanua.

10 Vtaki 14.11; 19.3 Ena sega ni bokoci e na siga se na bogi;

ena kuvu cake na kena kubou ka sega ni mudu.

Ena lala tu e na veitabatamata kecega;

ena sega ni dua me na lako voli vakadua tale kina.

11Ena qai kenai taukei na pelikani kei na belo;

ena tiko kina na lulu kei na reveni.

Ena dreta e delana ko koya na dali i vakarau ni veivakarusai,

kei na vatu i vakarau ni veivakalalataki.

12A kena turaga era na kacivi mai ki na matanitu,

ka na sega kina e dua;

a ra sa yali kecega na nona gone vakaturaga.

13Ena tubu e na kena vale vakaturaga na wa-vakavotona,

na salato kei na soni e na kena veikoro ni valu.

Ena nodra i tikotiko na wolifa,

kei na nodra rara na ositeriji.

14Ena sota kina na manumanu ni vanua dravuisiga kei na koli kila;

ena tagica na kenai sa na me-tevoro;

ena tiko talega mai kea na lulu,

ka na kunea na nona i vakavakacegu.

15Ena cakava mai kea na nona i oviovi na lulu levu,

ka vakalutulutu, ka saulaka, ka ovica;

ena soqoni talega mai kea na vulituri yadua

kei na kenai sa.

16Dou qara e nai vola i Jiova, ka wilika:

Ena sega ni yali e dua vei ira oqo;

ena sega e dua me yali na kenai sa.

Ni sa vakarota na gusui Jiova,

ka sa vakasoqoni ira mai na Yalona.

17A sa ia na vakawiri madigi vei ira ko koya,

a sa vota vei ira na ligana e na dali i vakarau;

era na taukena ka tawa mudu,

era na tiko kina mai na dua nai tabatamata ka yacova e dua tale nai tabatamata.