2 Korinica 8 - Ai Vola Tabu (Vakadewa Makawa Vakavoutaki 2021)（FRV21）

Na Soli-ka Vakarisito

1 Roma 15.26 Ia keitou sa vakatakila vei kemudou, na veiwekani, na loloma ni Kalou sa soli vei ira na veisoqosoqo lewe ni lotu mai Masitonia,

2ni ra sa vakatovolei tiko e na ka rarawa sara sa levu sara na nodra reki, ka sa ka tani na nodra dravudravua, ia sa uasivi cake vakalevu kina na nodra lomasoli.

3Ni'u sa kena i vakadinadina, ni ra sa dausoli me vaka na ka era rawata, ka sa dausivia na ka era rawata, ka sa yalodra kina,

4ka ra sa vakamamasu ka cikevi keitou vakalevu me keitou kauta na ka-ni-loloma, ka veitokani kei ira e na cakacaka loloma vei ira era sa lotu—

5ka oqo, sa sega ni vaka na ka keitou namaka, ia era sa soli ira taumada vua na Turaga, vei keitou talega me vaka na loma ni Kalou;

6ka keitou sa masuti Taito kina, me vaka sa vakatekivuna ko koya, me tinia vaka talega kina vei kemudou na cakacaka loloma talega oqo.

7Ia me vaka ni sa levu sara vei kemudou na ka kecega—e na vakabauta, e na vosa, e na vuku, e na gugumatua kecega, kei na nomudou loloma vei keitou—raica me levu talega vei kemudou na cakacaka loloma oqo.

8Au sa sega ni cavuta nai vakaro, au vosa ga e na vukudra eso era sa gumatua cake, me'u vakatovolea talega na kena dina ni nomudou loloma.

9Ni dou sa kila na loloma ni noda Turaga ko Jisu Karisito, ni sa vutuniyau ko koya, ia sa yaco me dravudravua e na vukumudou, mo dou vutuniyau mai e na vuku ni nona dravudravua.

10Ia ka'u sa vakatavuvuli ga e na ka oqo: ni sa kilikili kei kemudou na ka oqo, dou a vakatekivuna eliu, ia dou a sega ni cakava walega, dou a gumatua cake talega kina ka sa oti yani e dua na yabaki.

11Ia oqo, mo dou qai vakaotia sara; me vaka dou a gumatua kina e na kena caka, me qai vakacavari kina mai na veika sa tu vei kemudou.

12Kevaka sa tu na yalo e lomasoli, ena ciqomi me vaka na veika sa tu vua e dua—ka sega ni vaka na ka sa sega ni tu vua.

13E sega ni kena i balebale oqo me na vakamamadataki vei ira eso ka vakaicolacolataki ga vei kemudou, ia ke mani raici vakatautauvata ga,

14me qai sotava na nodra dravudravua nai yau levu dou sa taukena e na gauna oqo, ka me rawa kina ni qai sotava talega na nomudou dravudravua na nodra i yau levu, me qaravi vakatautauvata kina.

15Lako 16.18Me vaka na ka sa volai,

“O koya sa kumuna vakalevu sa sega na ka e vo vua,

kei koya sa kumuna vakalailai sa sega na ka e yali vua.”

Ko Taito kei Ira na Nona i Tokani

16Ia me ia na vakavinavinaka vua na Kalou, o koya sa vakatubura e na loma i Taito na daunanumi kemudou vakaoqo.

17E dina ga sa vakabauta na neitou vakamamasu; ia ni sa gumatua sara vakai koya ga, sa lako kina vei kemudou.

18Ia keitou sa tala vata kaya na wekada, ko koya sa rogo vinaka vei ira kecega na veisoqosoqo lewe ni lotu e na vuku ni tukutuku-vinaka;

19ia ka sa sega ni koya walega oqo, sa digitaki koya talega ko ira na veisoqosoqo lewe ni lotu me lako vata kei keitou ni keitou sa ia na cakacaka loloma oqo, me vakarokorokotaki kina na Turaga, ka me rairai kina na noda gumatua talega.

20Ia keitou sa via tarova oqo, me kakua e dua me beitaki keitou e na vuku ni yau levu oqo keitou sa oga kina,

21Vbale 3.4ni keitou sa nanuma na ka e dodonu, e segai walega e na mata ni Turaga, e na matadra talega na tamata.

22Keitou sa tala na wekada talega kei rau, o koya keitou sa kunea wasoma ni sa gumatua e na ka e vuqa, ia ka sa qai gumatua vakalevu cake, ni sa vakadinati kemudou vakalevu.

23Ke tarogi ko Taito, sa noqu i tokani ko koya, a sa vukei au e na cakacaka e na vukumudou. Koi rau talega na wekada, erau sai talatala ni veisoqosoqo lewe ni lotu, oi rau sa vakarokorokotaki kina na Karisito.

24O koya oqo mo dou qai vakatakila vei iratou, e na matadra talega na veisoqosoqo lewe ni lotu, nai vakadinadina ni nomudou loloma, kei na neitou vakacaucautaki kemudou.