Lako Yani 27 - Ai Vola Tabu (Vakadewa Makawa Vakavoutaki 2021)（FRV21）

Nai Cabocabo-ni-soro(Lako Yani 38.1-7)

1“Mo cakava talega e dua nai cabocabo-ni-soro e na kau sitimi, me lima na kiupiti na kena balavu, ka lima na kiupiti na kena raraba; me takiveilevu nai cabocabo-ni-soro e na yasana vava; ka tolu na kiupiti na kena cecere.

2Ia mo cakava na tutuna vava me balavu cake; ka me dua ga na tolo ni kau sa caka kina nai cabocabo-ni-soro kei na tutuna vava, ia mo botana e na parasa.

3Mo cakava talega na kena sedre me biu kina na kena dravusa, kei nai sivi sa taki kina na dravusa, kei na kena beseni me kau kina na dra me kureitaki, kei na kenai cula ni lewe ni manumanu, kei na kena dari ni de-ni-buka waqa; a kenai yaya kecega mo cakava e na parasa.

4Mo cakava talega kina e dua na kena bai parasa sa cicila; ia mo cakava ki na bai oqo e va na mama parasa e na tutuna vava.

5Ia mo virikotora ki ruku ni bati ni cabocabo-ni-soro, me yaco cake na bai cicila ki na veimama ni cabocabo-ni-soro.

6Mo cakava talega eso nai vua ni cabocabo-ni-soro e na kau sitimi, ka botana e na parasa.

7Ia me ra daramaki nai vua ki na veimama, ia me ra tu nai vua mai na yasa ruarua ni cabocabo-ni-soro, me colati kina.

8Mo cakava e na veipapa me vakalomalomana. Me vaka ka vakaraitaki vei iko e na ulunivanua, me caka vakakina.

Na Lomanibai ni Vale ni Kalou(Lako Yani 38.9-20)

9“Ia mo cakava e dua na rara sa vakabai me volita na vale ni Kalou. Ki na yasana sa donuya na ceva, me so nai sulu lineni ni wa muloci matailalai me bai ni rara, ka me dua na drau na kiupiti na kena balavu e na yasa e dua;

10kei na kena duru me ruasagavulu, kei na kedra qara parasa me ruasagavulu; ia nai ruberube e na veiduru kei na kedra veivau, me siliva.

11Ia me vakakina e na yasana sa donuya na vualiku e na kena balavu, me so nai sulu e dua na drau na kiupiti na kedra balavu, kei na kedra duru e ruasagavulu, kei na kedra qara parasa e ruasagavulu; ai ruberube e na veiduru, kei na kedra veivau, me siliva.

12Ia e na raraba ni rara sa vakabai e na yasana sa donuya na ra, me so nai sulu me limasagavulu na kiupiti; na kedra duru me tini, ka tini na kedra qara.

13Ia na raraba ni rara sa vakabai vaka ki na tokalau me limasagavulu na kiupiti.

14Ia nai sulu ki na dua na yasa ni katuba me tinikalima na kiupiti, na kedratou duru me tolu, ka tolu na kedratou qara.

15Ia nai sulu ki na yasana kadua me tinikalima na kiupiti, me tolu na kedratou duru, ka tolu na kedratou qara.

16Ia nai sogo ni rara sa vakabai me ruasagavulu na kiupiti ka me caka e na ka karakarawa ka lokaloka, ka kulakula, kei na lineni matailalai ni wa muloci, sa caka e na talitali sulu; ka me va na kedratou duru, ka va na kedratou qara.

17A duru kecega sa volita na rara sa vakabai ena vakaivau siliva; me siliva na kedrai ruberube, ka parasa na kedra veiqara.

18A balavu ni rara sa vakabai me dua na drau na kiupiti, kei na kena raraba kece me limasagavulu na kiupiti e na yasana ruarua, ka lima na kiupiti na kena cecere, me lineni matailalai ni wa muloci, ka parasa na kedra qara.

19Me parasa ga nai yaya kecega ni vale ni Kalou e na kenai valavala kecega, kei na kenai vakadei kecega, kei nai vakadei kecega ni rara sa vakabai.

Na Kena Qaravi na Cina(Vunau ni Soro 24.1-4)

20“Ia mo vakaroti ira na Isireli, me ra kauta mai vei iko na waiwai olive e makare sa lauvutu, me rarama vinaka, ka caudre tikoga kina na cina.

21Me vakarautaka ko Eroni kei iratou na luvena, e na vale ni veitavaki, mai taudaku ni lati, sa donuya na kato ni vunau, me caudre mai na yakavi me yacova na mataka, e na mata i Jiova; me sa kenai lesilesi ka tawa mudu e na nodra i tabatamata kecega e na vukudra na Isireli.