2 Samuela 7 - Ai Vola Tabu (Vakadewa Makawa Vakavoutaki 2021)（FRV21）

Tukutuku ko Necani na Parofita vei Tevita(1 Veigauna 17.1-15)

1Ia ni sa mai tiko na tui e nona vale ka sa solia vua ko Jiova me vakacegu mai vei ira kecega na nona meca era tiko volita,

2sa kaya na tui vei Necani na parofita, “Mo raica mada, oi au, ka'u sa tiko e na vale sitari, ia na kato ni Kalou sa tiko e loma ni valelaca.”

3A sa kaya vua na tui ko Necani, “A ka kecega sa tu e lomamuni mo ni la'ki cakava, ni sa tiko vata kei kemuni ko Jiova.”

4Ia e na bogi ko ya sa lako mai na vosa i Jiova vei Necani, ka kaya:

5“Mo la'ki kaya vua na noqu tamata ko Tevita, ‘Sa vosa vakaoqo ko Jiova: O iko beka ko na tara e dua na noqu vale me'u tiko kina?

6Ni'u sa sega ni tiko e na dua na vale mai na siga ka'u a kauti ira cake kina na Isireli mai Ijipita, ka yacova na siga edaidai, ia ka'u a lako voli ga e na valelaca kei na vale vakacevaceva.

7E na tikina kecega ka'u a lako voli kina kei ira kecega na Isireli, ka'u a vosataka li e dua na vosa vua e dua vei ira na veiyavusa i Isireli, o ira ka'u a vakarota me lewai ira na noqu tamata na Isireli, ka vaka, “A cava dou sa sega kina ni tara e dua na vale sitari me noqu?” ’

8Ia mo vosa kina vakaoqo vua na noqu tamata ko Tevita, ‘Sa vosa vakaoqo ko Jiova-ni-lewevuqa: Au a kauti iko mai na bai ni sipi, ni ko a muria na sipi, mo turaga vei ira na noqu tamata na Isireli;

9ka'u a tiko vata kei iko e na vanua kecega ko a lako kina; ka'u a muduka tani na nomu meca kecega, ka'u na vakarogoya na yacamu, me vaka na yacadra na tamata rogo e vuravura.

10Ka'u na lesia e dua na tikina vei ira na noqu tamata na Isireli, ka vakataudeitaki ira, me ra tiko e na nodra tikina dina ka sega ni yavala tale; ka me kakua ni vakamalumalumutaki ira tale ko ira na tamata ca, me vaka eliu,

11me vaka mai na siga ka'u a lesi ira kina eso na turaganilewa me lewai ira na noqu tamata na Isireli; ia ka'u a vakacegui iko mai na nomu meca kecega. A sa tukuna vei iko ko Jiova ni na vakatuburi iko ko Jiova mo qase ni dua na vuvale.

12Same 89.3-4; 132.11; Joni 7.42; Caka 2.30Ni sa oti na nomu gauna, ka ko sa moce vata kei ira na nomu qase, ka'u na vakataudeitaka na nomu kawa, o koya ka lako mai na yagomu, ia ka'u na vakataudeitaka na nona matanitu.

13O koya ga ena tara na vale ki na yacaqu, ia ka'u na vakataudeitaka nai tikotiko ni nona matanitu ka tawa mudu.

14Same 89.26,27; 2Kori 6.18; Ipe 1.5Au na tamana koi au, ia ena luvequ ko koya. Kevaka sa kitaka na ka ca ko koya, ka'u na cudruvi koya me vaka sa daucudruvi ko ira na tamata, kei na ka era sa dauyaviti kina ko ira na luve ni tamata.

15Ia na noqu loloma ena sega ni kau tani mai vua, me vaka ka'u a kauta tani mai vei Saula, o koya ka'u a vakasivoya e matamu.

16Same 89.36,37Na nomu vuvale kei na nomu matanitu ena vakataudeitaki e matamu, ka sega ni oti. Ena vakataudeitaki ka tawa mudu na nomu i tikotiko vakaturaga.’ ”

17Sa vosa vei Tevita ko Necani me vaka na vosa kecega oqo, kei na raivotu kecega oqo.

Na Masu ni Vakavinavinaka i Tevita(1 Veigauna 17.16-27)

18A sa lako ko Tevita na tui, ka tiko e na mata i Jiova, a sa kaya, “O cei koi au, kemuni na Turaga ko Jiova, ka cava na noqu vuvale, ko ni sa kauti au mai kina ka yacova na gauna oqo?

19Ia sa ka lailai talega oqo e matamuni, kemuni na Turaga ko Jiova; ni kemuni sa vosa talega me baleta na noqu vuvale, na nomuni tamata, e na gauna sa bera sara ni yaco. Kemuni na Turaga ko Jiova, me qai vakaoqo nai vakasala vei ira tamata!

20Ia ka cava tale me kaya vei kemuni ko Tevita? Ni kemuni sa kilai koya na nomuni tamata, Turaga Jiova!

21E na vuku ni nomuni vosa, ka me vaka na lomamuni, ko ni sa cakava na ka levu kecega oqo, ka vakatakila vei au na nomuni tamata.

22O koya sa levu kina koi kemuni, Jiova na Kalou. Ni sa sega e dua sa tautauvata kei kemuni, ka sa sega na Kalou, koi kemuni duaduaga, me vaka na ka kecega keimami sa rogoca e na daliga i keimami.

23Vrua 4.34Ia sa dua li na matanitu e vuravura me tautauvata kei ira na nomuni tamata na Isireli, o ira ka lako kina na Kalou me volia me ra nona tamata, me vakarogoya talega na yacana, ka cakava vei kemuni na ka levu kei na ka rerevaki, e na vuku ni nomuni vanua, e na matadra na nomuni tamata, o ira ko ni a volia me nomuni mai Ijipita, mai na veimatanitu kei na nodra kalou?

24Ia ko ni sa vakataudeitaki ira vei kemuni na nomuni tamata na Isireli me ra nomuni tamata ka tawa mudu. Ia koi kemuni, Jiova, ko ni sa yaco me nodra Kalou.

25Ia oqo, kemuni Jiova na Kalou, na vosa ko ni a vosataka e na vuku ni nomuni tamata, kei na vuku ni nona vuvale, mo ni vakataudeitaka mada, ka tawa mudu, ka kitaka me vaka ko ni a kaya.

26Ia me vakalevulevui na yacamuni ka tawa mudu, ka vaka, Ko Jiova-ni-lewevuqa sa nodra Kalou na Isireli; ia me vakataudeitaki e matamuni na vuvale i Tevita na nomuni tamata.

27Io koi kemuni, Jiova-ni-lewevuqa, na nodra Kalou na Isireli, ko ni sa vakatakila vua na nomuni tamata, ka vaka, ‘Au na vakatuburi iko mo qase ni dua na vuvale’; o koya oqo sa doudou kina na yaloqu na nomuni tamata me'u cabora kina vei kemuni na masu oqo.

28Ia oqo, na Turaga Jiova, sai kemuni ga na Kalou, ka sa dina na nomuni vosa, ka ko ni sa yalataka na ka vinaka oqo vei au na nomuni tamata.

29Ia oqo, me sa yalomuni, mo ni vakalougatataka na vuvale ni nomuni tamata, me tu ga e matamuni, ka tawa mudu. Ni kemuni sa vosa oti kina, na Turaga ko Jiova, me na kalougata ka tawa mudu mai vei kemuni na nona vuvale na nomuni tamata.”