Jeremaia 45 - Ai Vola Tabu (Vakadewa Makawa Vakavoutaki 2021)（FRV21）

Na Vosa ni Veivakacegui vei Baruki

1 2Tui 24.1; 2Vei 36.5-7; Tani 1.1,2 Ni sa vola oti ko Baruki na luve i Neraia, e na dua nai vola, na vosa oqo mai na gusu i Jeremaia, sa qai kaya vua ko Jeremaia e nai kava ni yabaki i Jioiakimi na luve i Josaia na tui Juta, ka vaka,

2“Sa vosa vakaoqo ko Jiova, na nodra Kalou na Isireli, vei iko, Baruki:

3Ko sa kaya, ‘Ulei koi au oqo! Ni sa vakaikuritaka na noqu rarawa e na yaluma ko Jiova; au sa oca e na noqu vutugu, ia ka'u sa sega ni kunea na vakacegu.’

4Mo vosa vakaoqo vua, Sa vaka ko Jiova: Raica, na ka ka'u sa tara ka'u na basuka sobu, kei na ka ka'u sa tea ka'u na cavuta cake—oqori na vanua taucoko.

5Ia ko iko ko sa dauqara beka eso na ka levu me nomu? Mo kakua ni dauqara; raica, au na vakayacora na ca vei ira na tamata kecega, sa kaya ko Jiova. Ia ka'u na solia vei iko na nomu bula me nomu i toki-ni-valu e na veiyasana kecega ko sa lako voli kina.”