1A sa kaya vei Mosese ko Jiova,
2“Mo vosa vei ira na Isireli, ka taura mai vei ira nai titoko, me dua nai titoko me baleta na vale ni nodra qase yadua, ka mai vei ira yadua na turaga ni nodra qase, me tinikarua nai titoko. Mo vola na yaca ni tamata yadua e na nona i titoko,
3ka mo vola na yaca i Eroni e na nodra i titoko na Livai, ni na dua ga nai titoko mai vei ira na turaga yadua ni vale ni nodra qase.
4Ia mo qai virikotora e na vale ni veitavaki e na mata ni kato ni vunau, ka'u sa veitavaki kina kei kemudou.
5Ia ena kubu mai nai titoko ni tamata ka'u sa digitaka. Ia ka'u na vakaotia me kua ni rogo tiko vei au na nodra didi na Isireli, era didivaki kemudrau kina.”
6A sa kaya vei ira na Isireli ko Mosese, a ra sa solia vua nai titoko ko ira na turaga, era tauyadua ko ira na turaga, me vaka na nodra qase, sa tinikarua nai titoko; a sa tu vata kei na nodra i titoko nai titoko i Eroni.
7A sa virikotora na veititoko ko Mosese e na mata i Jiova, e na vale ni vunau.
8 Ipe 9.4 Ia e na mataka sa curu ki na vale ni vunau ko Mosese; ka raica sa kubu tu nai titoko i Eroni e na vuku ni vale i Livai, a sa kubu tiko, ka seraka na sena, ka vuataka eso na amodi sa matua.
9A sa kauta mai nai titoko kecega ko Mosese mai na mata i Jiova kivei ira kecega na Isireli. A ra sa raica, ka taura na tamata yadua na nona i titoko.
10A sa kaya vei Mosese ko Jiova, “Mo kauta tale nai titoko i Eroni ki na mata ni kato ni vunau, me maroroi tu mei vakatakilakila vei ira na tamata dautalaidredre; mo muduka laivi kina vei au na nodra didi, me ra kakua ni mate kina.”
11A sa kitaka ko Mosese; me vaka sa vakarota vua ko Jiova, sa kitaka vakakina ko koya.
12A ra sa kaya vei Mosese na Isireli, “Raica, keimami sa voleka ni mate, keimami sa na kawaboko, io keimami sa na kawaboko kecega!
13Ko ira kecega sa toro voleka ki na vale i Jiova ena mate. Keimami na mate kece beka?”
Who We AreWhat We EelieveWhat We Do
2025 by iamachristian.org,Inc All rights reserved.
