Efeso 4 - Ai Vola Tabu (Vakadewa Makawa Vakavoutaki 2021)（FRV21）

Na Duavata ni Yago i Karisito

1O koya oqo ka'u masuti kemudou kina oi au sa vesu tu e na vuku ni Turaga, mo dou ia tiko nai valavala sa kilikili kei nai tutu dou sa kacivi kina,

2Kolo 3.12,13mo dou yalomalumalumu sara ka yalomalua, mo dou vosota vakadede ka veivosoti vakai kemudou e na loloma;

3mo dou gumatua sara mo dou maroroya na lomavata ni Yalo Tabu, ni dou sa vauci vata e na veivinakati.

4Sa dua bauga na yago, ka dua bauga na Yalo Tabu, me vaka dou sa kacivi, ki nai nuinui e dua bauga ni nomudou kacivi,

5na Turaga e dua bauga, na vakabauta e dua bauga, na veipapitaisotaki e dua bauga,

6na Kalou na Tamada kecega e dua bauga, o koya sa lewa na ka kecega, a sa curuma na ka kecega ka sa tiko e na lomamudou kecega.

7Ia ka sa soli vei keda yadua na loloma me vaka nai vakarau ni solisoli nei Karisito.

8Same 68.18O koya oqo sa kainaki kina vakaoqo,

“Ni sa lako cake ko koya, sa vakabobulataki ira e lewe vuqa me ra bobula;

a sa solia nai solisoli eso vei ira na tamata.”

9(Ni sa tukuni, “Sa lako cake ko koya,” a cava na kena i balebale oqo ka vakakina ni sa lako sobu talega ko koya ki na boto ni vuravura e ra?

10O koya ga sa lako sobu ki ra sai koya talega ka lako cake me yawasivita kece na lomalagi, me vakasinaita kina na ka kecega.)

11Ka sai koya sa solia na veisolisoli me ra apositolo eso, ka so me ra parofita, ka so me ra tamata dauvunau voli, ka so me ra i vakatawa kai vakavuvuli,

12me ra vakaiyaragitaki kina ko ira sa lotu e na cakacaka ni veiqaravi vakalotu, ka me vakatataki cake kina na yago i Karisito,

13me da yaco sara koi keda kecega me da duavata e na vakabauta, ka kila sara na Luve ni Kalou, me da matua sara, ka me da tautauvata kei nai vakarau ni tamata dina sa sinai sara e na Karisito,

14me da kakua kina ni vagonegonea tiko, ka veitosoyaki ka veikauyaki voli e na cagi kecega ni vakavuvuli, e nai lawaki ca ni tamata, e na dauveivaqaseni sa nakiti kina na veivakacalai.

15Ia, ni'u sa tukuna ga na ka dina e na yalololoma, e dodonu me da tubu cake vei koya e na ka kecega, vei koya ga na uluda, na Karisito,

16Kolo 2.19o koya sa sema vata mai vua na yago taucoko, ka vauci vata, e na vuku ni kena yaga nai sema yadua, me vaka na ka sa cakava sara na tikina kecega ni sa dui vakaitavi, a sa vakatuburi cake ki na yago tabu ni sa vakatataki cake vakai koya e na loloma.

Na Bula Makawa kei na Bula Vou

17O koya oqo ka'u sa vosa kina, ka vakarota matua e na vuku ni Turaga, mo dou kakua ni valavala tiko me vakataki ira na veimatanitu tani, e na lomadra lialia,

18ni sa vakabutobutotaki na lomadra, ka ra sa sega ni veiriti kei na bula sa mai vua na Kalou, e na vuku ni lialia sa tu e na yalodra, ka ni sa kaukauwa na lomadra.

19Ia ni ra sa sega ni madua rawa, era sa soli ira ki na cakacaka vakasisila, me ra cakava na ka kecega sa tawa-savasava ni ra sa daugarova.

20Ia koi kemudou, dou a sega ni vuli vei Karisito mo dou vakakina!

21Kevaka dou a rogoci koya, ka sa vakatavulici vei koya, me vaka na dina sa tu vei Jisu,

22Kolo 3.9e na vuku ni valavala eliu, mo dou biuta tani kina na tamata makawa, o koya sa ca mai e na vuku ni gagadre ca sa veivakaisini,

23mo dou vakavoui mai e na yalomudou kei na lomamudou,

24Vteki 1.26; Kolo 3.10ka mo dou vakaisulu e na tamata vou, o koya sa caka me vaka na Kalou e na yalododonu kei na yalosavasava.

Nai Vakarau ni Bula Vou

25 Saka 8.16 O koya ga oqo ni dou sa biuta tani kina na lasu, me vosa dina na tamata yadua vua na kai nona, ni da sa tikina vata vakai keda.

26Same 4.4Ni dou sa cudru, kakua ni dou cala kina; me kakua ni dromu na mata-ni-siga ni dou sa cudru tiko,

27ka kakua talega ni vakarawarawataki kemudou vua na tevoro.

28Me kakua ni butako tiko ko koya ka daubutako, ka me daucakacaka ga, ka kitaka e na ligana na ka sa yaga, me so kina na nona ka me soli vei koya sa dravudravua.

29Me kakua ni lako mai na gusumudou e dua na vosa velavela, o koya ga sa vinaka me ia kina na veivakatataki, me vaka sa rauta, me yaco kina na vinaka vei ira era sa rogoca.

30Ia dou kakua ni vakararawataka na Yalo Tabu ni Kalou, o koya dou sa dregati kina me yaco mada na siga ni bula.

31Me biu tani kece vei kemudou na yalo ca, kei na yalokatakata, kei na cudrucudru, kei na veiba, kei na vosavakacaca, kei na ca kecega sa vakakina.

32Kolo 3.13Ia dou veilomani vakai kemudou, dou lomavinaka, dou veivosoti vakai kemudou, me vaka ni sa vosoti kemudou na Kalou e na vuku i Karisito.