1Sa kalougata ko ira era sa dodonu sara e na sala,
era muria na vunau i Jiova.
2Sa kalougata ko ira era vakabauta na nona vosa,
era qarai koya e na lomadra taucoko.
3Era sa sega talega ni caka cala,
ia era lako ga e na nona sala.
4O ni sa vakaroti keimami
me keimami vakabauta sara na nomuni vakaro.
5Me vakadodonutaki mada na noqu sala
me'u vakabauta na veika ko ni a lesia me caka!
6Au na qai sega ni madua,
ni'u sa qarava na nomuni vakaro kecega.
7Au na vakavinavinaka vei kemuni e na yalododonu,
ni'u sa vulica oti na nomuni lewa dodonu.
8Au na vakabauta na nomuni lesilesi;
mo ni kakua ni biuti au laivi yani.
Talairawarawa ki na Vunau i Jiova (Beta)9Ena vakasavasavataka vakaevei na nona i valavala na cauravou?
Ni sa qarauna ga me vaka na nomuni vosa.
10E na yaloqu taucoko ka'u sa qarai kemuni;
me'u kakua mada ni lako sese tani mai na nomuni vakaro.
11Au sa vunia na nomuni vosa ki lomaqu,
me'u kakua kina ni cala vei kemuni.
12O ni sa kalougata, i Jiova;
mo ni vakavulica vei au na nomuni lesilesi.
13Au sa tukuna oti e na tebenigusuqu
na ka kecega sa lewa na gusumuni.
14Au sa reki e nai valavala ni nomuni tukutuku,
me vaka e nai yau kecega.
15Au na vakanananu ki na nomuni vakaro,
ka goleva tiko na nomuni sala.
16Au na reki sara e na vuku ni nomuni vunau;
au na sega ni guilecava na nomuni vosa.
Marau e na Vunau i Jiova (Qimela)17Mo ni caka vinaka vua na nomuni tamata,
me'u bula ka vakabauta kina na nomuni vosa.
18Mo ni dolava na mataqu, me'u kunea kina
na ka e veivakurabuitaki e na nomuni vunau.
19Au sa bula me vaka na vulagi e vuravura;
mo ni kakua ni vunia vei au na nomuni vakaro.
20Sa ramusu na yaloqu ni'u sa gadreva
e na veisiga kecega na nomuni lewa.
21O ni sa vunauci ira na viavialevu, era sa cudruvi
ko ira era sa lako sese tani mai na nomuni vunau.
22Mo ni kauta tani vei au na veivakalialiai kei na veibeci,
ni'u sa qarava oti na nomuni tukutuku.
23Era sa dabe talega na turaga ka vosacataki au,
ia na nomuni tamata e na vakanananu ga ki na nomuni lesilesi.
24A nomuni tukutuku sa ka talei ka'u sa marautaka,
ka sa noqu i vakavuvuli.
Yalodina ena Kena Muri nai Vunau (Daleca)25Sa kabita na kuvu-ni-soso na yaloqu;
mo ni vakabulabulataki au me vaka na nomuni vosa.
26Ni'u a tukuna na noqu i valavala, ia ko ni a vakarorogo vei au;
mo ni vakavulica vei au na nomuni lesilesi.
27Mo ni vakavukui au me'u kila nai valavala ni nomuni vunau,
au na tukuna kina na nomuni cakacaka e veivakurabuitaki.
28Sa waicala yani na yaloqu ni sa bitaki;
mo ni vakaukauwataki au me vaka na nomuni vosa.
29Mo ni kauta tani vei au nai tovo lasulasu;
ka solia ga vei au na nomuni vunau.
30Au sa digitaka oti nai valavala dina;
au sa tauca e mataqu na nomuni lewa.
31Au sa kabita na nomuni vosa,
mo ni kakua ni laivi au, i Jiova, me'u vakamaduataki.
32Au na cici e na sala ni nomuni vakaro,
ni kemuni na vakalevutaka na yaloqu.
A Masu ni Kere Vuku Vakayalo (He)33Mo ni vakavulica vei au, i Jiova, nai valavala ni nomuni lesilesi;
ka'u na qai vakabauta ka yacova nai vakataotioti.
34Mo ni vakavukui au kina, ka'u na qai cakava na nomuni vunau;
io, ka'u na vakabauta e na lomaqu taucoko.
35Mo ni kauti au e na sala ni nomuni vakaro;
ni'u sa rekitaka.
36Mo ni vaqara na lomaqu ki na nomuni tukutuku,
ia me kakua ki nai yau.
37Mo ni tarova na mataqu me'u kakua ni raica na ka lasu;
mo ni vagumatuataki au e na nomuni sala.
38Mo ni vakayacora na nomuni vosa vua na nomuni tamata,
o koya sa rerevaki kemuni tikoga.
39Mo ni kauta tani na noqu rogorogo ca, ko ya ka'u sa rerevaka,
ni sa vinaka na ka ko ni sa lewa.
40Raica, ka'u sa daugadreva na nomuni vunau;
mo ni vakabulabulataki au e na nomuni yalododonu.
Vakadinata na Vunau i Jiova (Vau/Wau)41Kemuni Jiova, me yacovi au na nomuni yalololoma;
na bula ko ni sa solia me vaka na nomuni vosa.
42Ena qai dua na vosa me'u saumi koya kina sa vosacataki au,
ni ka'u sa vakararavi ki na nomuni vosa.
43Ia mo ni kakua ni kauta laivi na vosa dina mai na gusuqu;
ni'u sa nuitaka tiko na nomuni lewa.
44Ia ka'u na vakabauta tikoga kina na nomuni vunau,
ka sega ni mudu.
45Au na lako e na galala,
ni'u sa qarava na nomuni vunau.
46Ia ka'u na vosataka talega na nomuni tukutuku e matadra na tui,
ia ka'u na sega ni madua kina.
47Ia ka'u na vakamarautaki au e na nomuni vakaro,
o koya ka'u sa dau lomana.
48Ia ka'u na dulaka talega na ligaqu ki na nomuni vakaro,
o koya ka'u sa dau lomana;
ia ka'u na vakanananu ki na nomuni lesilesi.
Nuidei ena Vunau i Jiova (Sayini)49Mo ni nanuma na vosa vua na nomuni tamata,
ko ni sa vakavuna na noqu nuitaka.
50Oqo na ka ka'u sa vakacegu kina e na noqu rarawa,
ni sa vakaukauwataki au na nomuni yalayala.
51Era sa vakalialiai au vakalevu na viavialevu,
ia ka'u sa sega ni gole tani mai na nomuni vunau.
52Au sa nanuma na nomuni lewa eliu, i Jiova;
ka'u sa vakacegui au kina.
53Sa tauvi au na rise ni kete,
e na vukudra nai valavala ca era sa biuta na nomuni vunau.
54A nomuni lesilesi na ka ka'u sa seretaka tiko
e na noqu vale ka'u vulagi kina.
55Au sa daunanuma na yacamuni, i Jiova, e na bogi,
ia ka'u sa vakabauta na nomuni vunau.
56Ia sa noqu vu ni kalougata ga oqo,
ni'u a cakava na nomuni vakaro.
Yalodina ki na Vunau i Jiova (Keca)57Oi kemuni na noqu i votavota, i Jiova;
au sa yalataka me'u maroroya na nomuni vosa.
58Au a kerea na nomuni loloma e na yaloqu taucoko;
mo ni lomani au me vaka na nomuni vosa.
59Au a vakanananu ki na noqu i valavala,
ka vakalesuya na yavaqu ki na nomuni vosa.
60Au a vakusakusa, ka sega ni vakaberabera
me'u vakabauta na nomuni vunau.
61A nodra i vau nai valavala ca sa voliti au,
ia ka'u sa sega ni guilecava na nomuni vunau.
62E na lomaloma ni bogi ka'u na tucake ka ia na vakavinavinaka vei kemuni,
e na vuku ni nomuni lewa dodonu.
63Au sa nodra i tokani ko ira kecega era sa rerevaki kemuni,
kei ira era sa vakabauta na nomuni vakaro.
64Sa roboti vuravura, i Jiova, na nomuni yalololoma;
mo ni vakavulica vei au na nomuni lesilesi.
Na Yaga ni Vunau i Jiova (Teca)65O ni sa caka vinaka, Jiova, vua na nomuni tamata,
me vaka na nomuni vosa.
66Mo ni vakavulici au e na lewa vinaka kei na kila-ka,
ni'u sa vakabauta na nomuni vunau.
67Eliu, ni'u a sega ni tauvi mate, ka'u a lako sese,
ia oqo, ka'u sa qai vakabauta na nomuni vosa.
68Ko ni sa yalovinaka, ka caka vinaka;
mo ni vakavulica vei au na nomuni lesilesi.
69O ira na viavialevu, era sa tulia na lasu vei au,
ia ka'u na cakava ga na nomuni vakaro e na lomaqu taucoko.
70Sa vaka dina na uro na yalodra;
ia koi au ka'u sa rekitaka na nomuni vunau.
71Sa yaga vei au ni'u a tauvi mate,
me'u vulica kina na nomuni lesilesi.
72Sa vinaka vei au na vunau ni gusumuni
ka ca na tiki ni siliva kei na koula e vakaudolu.
Na Dodonu ni Vunau i Jiova (Yota)73Sa susugi au na ligamuni, ka buli au;
mo ni vakavukui au me'u vulica na nomuni vunau.
74O ira sa rerevaki kemuni era na reki ni ra raici au;
ni'u sa nuitaka me yaco na nomuni vosa.
75Au sa kila, Jiova, ni sa dodonu na nomuni lewa,
kei na nomuni yalodina ko ni a vakararawataki au.
76Me vakacegui au na nomuni yalololoma
me vaka na nomuni vosa vua na nomuni tamata.
77Me yacovi au na nomuni yalololoma, me'u bula rawa kina;
ni sa noqu vu ni reki na nomuni vunau.
78Me ra vakamaduataki ko ira na viavialevu,
ni ra sa cakacaka vakailasu walega vei au;
ia koi au ka'u na vakanananu tiko ki na nomuni vunau.
79Me ra lesu mai vei au ko ira era rerevaki kemuni,
kei ira talega era sa kila na nomuni vosa.
80Me dodonu sara na lomaqu e na nomuni lesilesi;
me'u kakua ni madua kina.
A Masu ni Kere Veisereki (Kafa)81Sa ceguoca na yaloqu mo ni vakabulai au;
ia ka'u na nuitaka ga na nomuni vosa me yaco.
82Sa oca na mataqu e na waraka na nomuni vosa ni yalayala;
ka'u sa taroga, “Ko ni na qai vakacegui au ninaica?”
83Ni'u sa vaka na tavaya kuli-ni-manumanu e na kubou,
ia ka'u sa sega ga ni guilecava na nomuni lesilesi.
84E vica beka na nona siga na nomuni tamata?
O ni na cudruvi ira ninaica era sa vakacacani au?
85Era kelia nai keli me'u lutu kina ko ira na viavialevu,
ko ira era sa sega ni vaka na nomuni vunau.
86Sa ka dina na nomuni vakaro kecega;
era sa vakacacani au vakatawadodonu; mo ni vukei au!
87Sa vo vakalailai me ra vakaotia na noqu bula e vuravura;
ia koi au ka'u a sega ni biuta na nomuni vunau.
88Mo ni vakaukauwataki au me vaka na nomuni yalololoma;
au na vakabauta tiko kina na vosa ni gusumuni.
Vakadinata na Vunau i Jiova (Lameta)89I Jiova na nomuni vosa sa vakataudeitaki mai lomalagi
me sega ni oti rawa.
90A nomuni lomadina sa yacova nai tabatamata kecega;
o ni a vakataudeitaki vuravura, ka sa tu ga.
91Sa tu ga edaidai me vaka na nomuni lewa;
ni sa qaravi kemuni na ka kecega.
92Kevaka ka'u a sega ni rekitaka na nomuni vunau,
ka'u a rusa sara e na noqu rarawa.
93Au na sega sara ni guilecava na nomuni vakaro,
ni kemuni sa vakaukauwataki au kina.
94Ka'u sa nomuni; mo ni vakabulai au,
ni'u sa qara na nomuni vunau.
95Era waraki au nai valavala ca me ra vakarusai au;
ia ka'u na vakanananu ki na nomuni vosa.
96Au sa raica nai cavacava ni ka talei kecega;
ia na nomuni vakaro ga sa rabailevu sara.
Taleitaka na Vunau i Jiova (Memi)97A ka vakaidina na noqu loloma ki na nomuni vunau!
Au sa vakanananu kina e na siga taucoko ka bogi.
98Na nomuni vakaro sa vakavukui au cake vei ira na noqu meca,
ni ra sa tikotiko ga vei au.
99Au sa vuku cake vei ira kecega era vakavulici au,
ni'u sa vakanananu ki na nomuni tukutuku.
100Au sa vuku cake vei ira na qase,
ni'u sa muria na nomuni vunau.
101Au sa dauvakadaroya na yavaqu mai na sala ca kecega,
me'u vakabauta kina na nomuni vosa.
102Au sa sega ni gole tani mai na ka ko ni a lewa,
ni kemuni sa vakavulici au.
103A kena kamikamica na nomuni vosa ki na gusuqu!
Io, na oni sa sega ni kamikamica e na gusuqu!
104E na vuku ni nomuni vunau ka'u sa vuku mai;
o koya ka'u sa cata kina nai valavala vakailasu kecega.
Na Rarama mai na Vunau i Jiova (Nuni)105A nomuni vosa na cina ki na yavaqu,
kei na rarama ki na noqu sala.
106Au sa bubului oti, ka'u na vakayacora talega,
ka me'u vakabauta na nomuni lewa dodonu.
107Au sa rarawa vakalevu sara;
mo ni vakaukauwataki au, Jiova, me vaka na nomuni vosa.
108Mo ni vakadonuya mada, Jiova, nai madrali ni gusuqu ka'u sa cabora,
ka vakavulica vei au na nomuni lewa.
109Sa tutu ga e ligaqu na noqu bula,
ia ka'u sa sega ni guilecava na nomuni vunau.
110Era sa birika vei au na dai ko ira nai valavala ca,
ia ka'u a sega ni lako sese mai na nomuni vunau.
111Au sa taura na nomuni tukutuku me noqu i votavota ka sega ni mudu;
ni ra sa ka ni reki ki na lomaqu.
112Au sa vaqara na lomaqu me'u cakava tiko na nomuni lesilesi,
ka yacova nai vakataotioti.
Maroroi ka Taqomaki e na Vunau i Jiova (Sameki)113Au sa cati ira era sa lomalomarua,
ia ka'u sa lomana na nomuni vunau.
114Oi kemuni na noqu i vunivuni kei na noqu i sasabai;
au sa vakararavi ki na nomuni vosa.
115Dou lako tani vei au, koi kemudou nai valavala ca,
ni ka'u na vakabauta na vunau ni noqu Kalou.
116Mo ni tokoni au me vaka na nomuni vosa, me'u bula;
ia me'u kakua ni vakamaduataki e na noqu i nuinui.
117Mo ni tauri au tiko, ka'u na qai vinaka;
ia ka'u na vakabauta tikoga na nomuni lesilesi.
118O ni sa buturaki ira kecega era sa lako sese mai na nomuni lesilesi;
ni sa ka lasu na nodra dauveivakaisini.
119O ni sa biuti ira tani nai valavala ca kecega e vuravura me vaka na de-ni-kaukamea;
o koya ka'u sa lomana kina na nomuni tukutuku.
120Sa sautaninini na lewequ ni'u rere vei kemuni;
ka'u sa rerevaka na nomuni lewa.
Talairawarawa ki na Vunau i Jiova (Ayini)121Au sa ia na lewa dodonu kei na cakacaka dodonu;
mo ni kakua ni laivi au vei ira era vakasaurarataki au.
122Mo ni totaki koya na nomuni tamata me'u vinaka;
me ra kakua ni vakasaurarataki au ko ira na viavialevu.
123Sa oca na mataqu ni'u sa waraka na bula sa mai vei kemuni,
kei na vosa ni nomuni caka dodonu.
124Mo ni cakacaka vua na nomuni tamata me vaka na nomuni yalololoma,
ka vakavulica vei au na nomuni lesilesi.
125Ka'u sa nomuni tamata; mo ni vakavukui au
me'u kila na nomuni tukutuku.
126Sa kena gauna oqo, Jiova, e dodonu mo ni cakacaka kina,
ni ra sa vakacataka na nomuni vunau.
127O koya ka'u sa lomana kina na nomuni vakaro
ka cata na koula; io, na koula dina sara.
128Ni'u sa vakadonuya na nomuni vunau kecega e na vuku ni ka kecega;
ia ka'u sa cata nai valavala lasu kecega.
Gadreva mo Muria na Vunau i Jiova (Pe)129A ka vakurabui na nomuni tukutuku,
o koya sa vakabauta kina na yaloqu.
130Ni sa vakamacalataki na nomuni vosa sa qai rarama mai;
sa vakavukui kina ko ira era sega ni vuku.
131Au a dalaga sara, ka'u sa ceguoca,
ni'u a gadreva na nomuni vakaro.
132Mo ni golevi au mai, ka lomani au;
me vaka ko ni sa dau cakava vei ira era dau lomana na yacamuni.
133Mo ni vakarautaka na noqu i lakolako e na nomuni vosa,
ia me kakua ni gumatua vei au e dua nai valavala ca.
134Mo ni vakabulai au mai nai valavala kaukauwa ni tamata,
au na vakabauta kina na nomuni vunau.
135Me cilavi koya na nomuni tamata na matamuni;
ka vakavulica vei au na nomuni lesilesi.
136Na uciwai sa dave mai na mataqu,
ni ra sa sega ni vakabauta na nomuni vunau.
Na Dodonu ni Vunau i Jiova (Sade)137O ni sa yalododonu, Jiova,
ka sa dodonu na nomuni lewa.
138A vunau ko ni sa vakarota sa dodonu
ka dinadina sara.
139Sa kani au na noqu lomakatakata,
ni ra sa guilecava na nomuni vosa ko ira na noqu meca.
140Sa savasava sara na nomuni vosa,
o koya sa lomana kina na nomuni tamata.
141Au sa ka lailai ka beci,
ia ka'u sa sega ni guilecava na nomuni vunau.
142A nomuni yalododonu sa sega ni mudu,
ia na nomuni vunau na ka dina.
143Sa kani au na rarawa kei na yaluma,
ia ka'u sa rekitaka ga na nomuni vakaro.
144A kena dodonu na nomuni vosa sa sega ni mudu rawa;
mo ni vakavukui au, ka'u na bula kina.
A Masu ni Kere Veisereki (Kofa)145Au a tagi e na yaloqu taucoko; mo ni rogoci au, Jiova.
Au na vakabauta na nomuni lesilesi.
146Au a tagi vei kemuni; mo ni vakabulai au,
ka'u na vakabauta kina na nomuni vosa.
147Au sa tagi vei kemuni ni se bera ni kida na mataka;
au a nuitaka na nomuni vosa.
148Na mataqu sa yadrava na veitiki ni bogi ni veivuke yadra,
me'u vakanananu ki na nomuni vosa.
149Mo ni rogoca na domoqu, me vaka na nomuni yalololoma;
i Jiova, mo ni vakaukauwataki au me vaka na nomuni lewa.
150Era toro voleka mai ko ira era muria nai lawaki ca;
era sa yawa ki na nomuni vunau.
151Ko ni sa voleka, i Jiova,
ka sa dina na nomuni vakaro kecega.
152E na vuku ni nomuni vunau au sa kila makawa kina
ni ko ni a vakataudeitaka me sega ni oti rawa.
Kerea na Veivakabulai (Resi)153Mo ni raica na noqu rarawa, ka vakabulai au;
ni'u sa sega ni guilecava na nomuni vunau.
154Mo ni vosa e na vukuqu, ka vakabulai au;
mo ni vakabulabulataki au me vaka na nomuni vosa.
155Sa yawa vei ira nai valavala ca na bula,
ni ra sa sega ni qara na nomuni lesilesi.
156Sa vuqa na nomuni yalololoma, i Jiova;
mo ni vakaukauwataki au me vaka na nomuni lewa.
157Era lewe vuqa era sa vakacacani au, ka ra sa noqu meca;
ia ka'u sa sega ni gole tani mai na nomuni vosa.
158Au a raici ira na caka cala, ia ka'u sa rarawa;
ni ra sa sega ni vakabauta na nomuni vosa.
159Mo ni raica na noqu loloma ki na nomuni vunau;
mo ni vakaukauwataki au, Jiova, me vaka na nomuni yalololoma.
160Sa ka dina mai liu sara na nomuni vosa;
ka sa sega ni mudu rawa e dua na nomuni lewa dodonu.
Yalodina ki na Vunau i Jiova (Sini)161Era sa vakacacani au walega na turaga,
ia sa rerevaka na nomuni vosa na lomaqu.
162Ka'u sa rekitaka na nomuni vosa,
me vaka e dua sa kunea nai yau levu.
163Au sa cata ka vakasisilataka na lasu,
ia na nomuni vunau ka'u sa lomana.
164Au sa vakavinavinaka vei kemuni vakavitu e na veisiga
e na vuku ni nomuni lewa dodonu.
165A ka levu na nodra vakacegu era lomana na nomuni vunau;
ka sa sega na ka me ra bale kina.
166I Jiova, ka'u sa nuitaka na bula mai vei kemuni,
ka sa dau cakava na nomuni vakaro.
167Sa vakabauta na nomuni vosa na yaloqu;
ia ka'u sa lomana vakalevu.
168Au sa dauvakabauta na nomuni vunau kei na nomuni tukutuku,
ni sa macala vei kemuni na noqu i valavala kecega.
A Masu ni Kere Veivuke (Tau)169Me yaco kivei kemuni na noqu tagi, i Jiova;
mo ni vakavukui au me vaka na nomuni vosa.
170Me lako cake kivei kemuni na noqu vakamamasu;
mo ni vakabulai au me vaka na nomuni vosa.
171Ena cavuta na vakavinavinaka na tebenigusuqu,
ni kemuni sa vakavulici au e na nomuni lesilesi.
172Ena vosataka na nomuni vosa na yamequ,
ni sa dodonu na nomuni vakaro kecega.
173Me vukei au na ligamuni;
ni'u sa digitaka oti na nomuni vunau.
174Au sa daugadreva na bula mai vei kemuni, Jiova;
au sa rekitaka talega na nomuni vunau.
175Me bula na yaloqu, ena qai vakavinavinaka vei kemuni;
ia me vukei au na nomuni lewa.
176Au sa daulako sese me vaka na sipi sa yali; mo ni qara na nomuni tamata,
ni'u sa sega ni guilecava na nomuni vakaro.
Who We AreWhat We EelieveWhat We Do
2025 by iamachristian.org,Inc All rights reserved.
