Vunau ni Soro 15 - Ai Vola Tabu (Vakadewa Makawa Vakavoutaki 2021)（FRV21）

Na Veika e Sega ni Savasava kina na Tagane kei na Yalewa

1A sa vosa vei Mosese kei Eroni ko Jiova, ka kaya,

2“Drau vosa vei ira na Isireli, ka kaya vei ira, Ni sa turi na yagona e dua na tagane, sa qai sega ni savasava e na vuku ni nona turi.

3Ia oqo na ka sa sega ni savasava kina ko koya ni sa dua na nona turi: ni kevaka sa turi na yagona, se sa muduki, oqo na nona sa sega ni savasava.

4Ai mocemoce kecega sa koto kina ko koya sa turi, sa sega ni savasava; kei na ka kecega sa dabe kina ko koya, sa sega ni savasava.

5O ira kecega sa tara na nona i mocemoce, me sava nodra i sulu, ka sili e na wai, ia ena sega ni savasava ka yacova na yakavi.

6Ia ko koya sa dabe e na dua na ka e dabe kina ko koya sa turi, me sava nona i sulu, ka sili e na wai, ia ena sega ni savasava ka yacova na yakavi.

7Kei koya sa tara na yagona sa turi, me sava na nona i sulu, ka sili e na wai, ia ena sega ni savasava ka yacova na yakavi.

8Ia kevaka sa kasivita na tamata savasava ko koya sa turi, me qai sava nona i sulu, ka sili e na wai, ia ena sega ni savasava ka yacova na yakavi.

9Kei nai vodovodo kecega sa vodo lako kina ko koya sa turi, ena sega ni savasava.

10Kei ira kecega sa tara e dua na ka e toka kina ko koya, ena sega ni savasava ka yacova na yakavi; kei koya sa colata na ka vakaoqori, me sava na nona i sulu, ka sili e na wai, ia ena sega ni savasava ka yacova na yakavi.

11Kei ira kecega sa tara ko koya sa turi, a sa sega ni vuya e na wai na ligana, me sava na nona i sulu, ka sili e na wai, ia ena sega ni savasava ka yacova na yakavi.

12Kei na bilo qele sa tara ko koya sa turi, me vorolaki; kei na bilo kau kecega me vui e na wai.

13“Ia ni sa savasava mai ko koya ka turi mai na nona turi, me qai wilika e vitu na siga me vakasavasavataki kina; ka me savata na nona i sulu, ka sili e na wai drodro, ena qai savasava.

14Ia e na kenai kawalu ni siga me kauta e rua na soqe, se rua na ruve gone, ka lako ki na mata i Jiova, ki na katuba ni vale ni veitavaki, ka solia vua na bete.

15Ena qai vakacabora na bete e dua mei soro ni valavala ca, ka dua mei soro kama; ia me sorovaki koya kina na bete e na mata i Jiova e na vuku ni nona turi.

16“Ia kevaka sa bura loa na nona wai e dua na tagane, me qai sili kece na yagona e na wai, ia ena sega ni savasava ka yacova na yakavi.

17Kei nai sulu kecega, kei na kuli ni manumanu kecega, sa buraci wai ni tagane, me sava e na wai, ia ena sega ni savasava ka yacova na yakavi.

18A yalewa talega erau sa koto kaya na tagane sa bura loa na nona wai, me rau sili e na wai, ia me rau sega ni savasava ka yacova na yakavi.

19“Ia kevaka sa turi e dua na yalewa, ka sa dra ka turi mai yagona, me na tawase tani ko koya ka bogi vitu; ia ko koya sa tarai koya ena sega ni savasava ka yacova na yakavi.

20Ia na ka kecega sa koto kina ko koya ni sa tawase tani, ena sega ni savasava. Na ka kece talega sa dabe kina ena sega ni savasava.

21O koya sa tara na nona i kotokoto, me savata na nona i sulu, ka sili e na wai, ia ena sega ni savasava ka yacova na yakavi.

22O koya sa tara e dua na ka e dabe kina ko koya, me savata na nona i sulu, ka sili e na wai, ia ena sega ni savasava ka yacova na yakavi.

23Ia kevaka sa dua na ka sa no e nona i kotokoto, se ena ka sa dabe kina ko koya, ni sa tara e dua na tamata, ena sega ni savasava ka yacova na yakavi.

24Ia kevaka sa koto kaya e dua na tagane, a sa tauvi koya na nona dra, ena sega ni savasava ko koya ka bogi vitu; kei nai mocemoce taucoko sa koto kina na tagane ko ya, ena sega ni savasava.

25“Ia kevaka sa turi dra e dua na yalewa ka bogi vuqa, ka sa sega ni kena gauna dodonu, se sa turi tiko ni sa oti na bogi me tawase tani kina, na siga kecega sa turi kina sa sega ni savasava; ka me vaka na bogi sa tawase tani kina ko koya, ena sega ni savasava ko koya.

26Ai kotokoto kecega sa koto kina ko koya e na veisiga kece sa turi kina, ena tautauvata vua kei na nona i kotokoto ni sa tawase tani; kei na ka kecega sa dabe kina ko koya ena sega ni savasava, me vaka na nona sega ni savasava ni sa tawase tani.

27Kei koya sa tara e dua na ka oqori ena sega ni savasava, ia me savata na nona i sulu, ka sili e na wai, ia ena sega ni savasava ka yacova na yakavi.

28Ia kevaka sa savasava mai na nona turi, me wawa mada bogi vitu, ena qai savasava.

29Ia e na kenai kawalu ni siga me kauta ko koya e rua na soqe, se rua na ruve gone, ka kauta vua na bete, ki na katuba ni vale ni veitavaki.

30Ia me cabora ko koya na bete e dua mei soro ni valavala ca, kei na kenai karua mei soro kama; ia me sorovaki koya na bete e na mata i Jiova, e na vuku ni turi ka sega ni savasava kina.

31“Ia dou tawasei ira tani vakaoqo na Isireli mai na ka era sega ni savasava kina, me ra kakua ni mate e na nodra sega ni savasava, ni ra sa vakadukadukalitaka na noqu vale sa tu e na kedra maliwa.”

32Oqo na lewa e na vuku i koya sa turi, kei koya sa bura loa na nona wai, a sa sega ni savasava kina;

33kei koya na yalewa sa tauva na mate vakavula; kei koya sa turi, se tagane se yalewa; kei koya erau sa mocera na yalewa sa sega ni savasava.