Same 58 - Ai Vola Tabu (Vakadewa Makawa Vakavoutaki 2021)（FRV21）

A Masu me ra Totogitaki na Tamata Ca Vua nai liuliu ni sere: Kakua ni Vakarusa. A nei Tevita. A Mikitami.

1Dou sa vosa dodonu vakaidina li, oi kemudou nai soqosoqo?

Dou sa lewa vakadodonu li, oi kemudou na luve ni tamata?

2E sega, e na lomamudou dou sa caka cala tiko;

a ligamudou sa vakarautaka na ka sa sega ni dodonu e na vanua oqo.

3O ira nai valavala ca era sa lako cala voli mai na kete i tinadra;

era sa lako sese, ka vosa lasu tiko, mai na siga era sucu kina.

4A nodra weli gaga sa vaka na weli gaga ni gata,

era vaka na gata didivara sa vakadidivarataka na daligana,

5ka sa bese ni vakarorogo ki na domodra era dau-uvu bitu,

io kevaka sa uvuca vakavuku sara.

6Kemuni na Kalou, mo ni doloka na batidra e gusudra;

i Jiova, mo ni doloka sara na batidra lelevu na laione kaukauwa!

7Me ra waicala yani me vaka na wai sa dave tiko;

ni ra sa navuca na nodra dakai me vanataka na gasau, me ra sa mucu kecega.

8Me ra waicala ka oti yani, me vaka na la dregadregata;

me ra vaka na lutudole ni yalewa, sa sega ni kunea na mata-ni-siga.

9Ni sa bera ni kila na buka kau vakavotona na nomudou kuro,

ena kauti ira tani ko koya me vaka e na covulaca, ni ra sa bula tiko, ka ni sa cudru ko koya!

10Era na reki na yalododonu ni ra kunea na veisausaumi;

ena lomoca na yavana e na kedra dra nai valavala ca.

11Era na qai kaya kina na tamata, “E dina era na saumi ko ira na yalododonu;

e dina ni sa tiko na Kalou ka sa lewa e vuravura.”