1A nona vosa na Dauvunau, na luve i Tevita na tui Jerusalemi.
2Sa kaya na Dauvunau, Sa ka wale sara! Sa ka wale sara!
Sa ka wale na ka kecega!
3A cava na kena yaga vua na tamata na nona cakacaka kecega
sa cakava e ruku ni mata-ni-siga?
4Sa lako yani e dua nai tabatamata, ka sa lako mai e dua tale nai tabatamata,
ia ko vuravura sa tu ga ka sega ni mudu.
5Sa dau cadra talega na mata-ni-siga, a sa daudromu na mata-ni-siga;
ka sa lako vakusakusa ki na yasana ka cadra mai kina.
6Sa lako vaka ki na ceva na cagi,
ka lako voli vaka ki na vualiku.
Sa veilakoyaki tikoga na cagi,
ka sa suka tale me vaka na kenai lakolako.
7Sa dave tiko ki waitui na uciwai kecega;
ia sa sega ni sinai na wasawasa;
ki na tikina sa dau dave mai kina na veiuciwai,
sa dau lesu tale kina.
8Sa levu na oca e na ka kecega;
sa dredre vua na tamata me tukuna;
sa sega ni mamau na matada ni da sa raica,
se na daligada ni da sa rogoca.
9A ka sa tiko eliu, sai koya ga ena tiko mai muri;
kei na ka sa caka eliu sai koya ga ena caka mai muri;
ka sa sega na ka vou e ruku ni mata-ni-siga.
10E dua li na ka me kainaki kina,
“Raica, oqo na ka vou”?
Sa ka mai liu sara ga,
io e na gauna ka liu vei keda.
11Sa sega ni nanumi na ka makawa;
ia na ka sa na tubu e muri
era na sega ni nanuma kina ko ira era na muri mai.
A Nona i Vakavuvuli na Dauvunau12Koi au na Dauvunau ka'u a tui Isireli mai Jerusalemi.
13Ia ka'u a segata e na lomaqu me'u qara ka vakatarotaroga vakavuku na ka kecega sa caka e ruku ni lomalagi; na ogaoga dredre oqo sa solia na Kalou vei ira na luve ni tamata me ra vakaogai kina.
14Au sa raica oti na cakacaka kecega sa caka e ruku ni mata-ni-siga; ka raica, sa ka wale kecega kei na ka ni ocaoca wale.
15Na ka sa takelo sa sega ni vakadodonutaki rawa,
kei na ka sa yali sa sega ni wili rawa.
16 1Tui 4.29-31 Au a veinanuyaka e yaloqu, ka kaya, “Raica, ka'u sa tamata yaco, ka'u sa vuku vakalevu cake vei ira kecega era sa liu vei au e Jerusalemi. Io na lomaqu sa kunea vakalevu na vuku kei na kila-ka.”
17Ia ka'u a solia na yaloqu me'u kila nai valavala vuku, kei nai valavala lialia ka sesewa. Ka'u sa kunea ni sa ka ni oca wale na ka talega oqo.
18Ni sa levu na vuku sa levu kina na rarawa,
ia ko koya sa vakaikuritaka na vuku sa vakaikuritaka na rarawa.
Who We AreWhat We EelieveWhat We Do
2025 by iamachristian.org,Inc All rights reserved.
