Lako Yani 34 - Ai Vola Tabu (Vakadewa Makawa Vakavoutaki 2021)（FRV21）

Taya Vou Tale o Mosese e Rua na Vatu Raraba(Vakarua 10.1-5)

1A sa kaya vei Mosese ko Jiova, “Mo taya e rua na vatu raraba, me vaka na kena eliu, ia ka'u na vola e na vatu raraba na vosa ka tu e na vatu raraba, na kena ko a vorolaka.

2Ia mo vakarau e na mataka, ka cabeta na Ulunivanua ko Saineai e na mataka, ka tu e mataqu mai kea e na dela ni ulunivanua.

3Ia me kakua e dua na tamata drau cabe vata kaya, me kakua talega ni raici e dua na tamata e na ulunivanua taucoko; ia me kakua ni kana voli na sipi se na bulumakau e na mata ni ulunivanua ko ya.”

4A sa taya ko koya e rua na vatu raraba me vaka na kena eliu. A sa sou e na mataka ko Mosese ka cabeta na Ulunivanua ko Saineai, me vaka ka vakarota vua ko Jiova, ka sa kauta e ligana e rua na vatu raraba.

5A sa lako sobu ko Jiova e na o, ka tu vata kaya mai kea, ka kacivaka na yaca i Jiova.

6Lako 20.5,6; Tiko 14.18; Vrua 5.9,10; 7.9,10A sa lako tu e matana ko Jiova, ka kacivaka,

“Ko Jiova, ko Jiova na Kalou,

sa yalololoma ka daulomasoli,

sa dauvosota vakadede,

ka levu na nona yalovinaka kei na dina,

7sa dauyalovinaka tiko vei ira na veiudolu,

sa dauvosota voli na caka ca kei na talaidredre kei nai valavala ca,

ia sa sega ga ni vakadonui ira na cala;

sa cudruvaka na nodra caka ca na qase vei ira na luvedra,

kei na makubudra,

ka yacova nai katolu kei nai kava ni tabatamata.”

8A sa cuva kusarawa ki na qele ko Mosese, ka masu.

9Ka kaya, “Kemuni na Turaga, kevaka ko sa lomani au, me lako mada kei keimami na noqu Turaga. Me vaka ni ra sa tamata domoqa ko ira, mo ni kakua talega ni cudruvaka na neimami caka ca kei na neimami caka cala, ia mo ni taukeni keimami.”

Sa Vakavoui na Veiyalayalati(Lako Yani 23.14-19; Vakarua 7.1-4; 16.1-17)

10A sa kaya ko koya, “Raica, ka'u sa ia na veiyalayalati; au na kitaka na cakacaka mana e na matadra kecega na nomu tamata, sa sega ni caka e vuravura taucoko me tautauvata, se e na dua na matanitu. Ia ko ira na tamata kece ko sa tiko e na kedra maliwa, era na raica na cakacaka i Jiova, ni sa ka vakadomobula ka'u na kitaka vei iko.

11“Mo muria na ka ka'u sa vakarota vei iko edaidai. Raica, ka'u sa vakasevi ira tani e matamu na Amoraiti, kei ira na kai Kenani, kei ira na Itaiti, kei ira na Perisaiti, kei ira na Aivaiti, kei ira na Jepusaiti.

12Mo qarauni iko, de ko ia na veiyalayalati kei ira na lewe-ni-vanua ko sa lako kina, de sa dua nai cori e na kemudou maliwa.

13Vrua 16.21Ia mo dou vakacacana na nodra i cabocabo-ni-soro, ka musumusuka na nodra matakau, ka taya laivi na nodra kalouyalewa ni veikau

14(ni sa tabu mo dou qarava na kalou tani, ni sa Kalou vuvu ko Jiova, ni sa yacana ko Vuvu).

15Dou kakua ni ia na veiyalayalati kei ira na lewe-ni-vanua ko ya, de ra sa la'ki dauyalewa ni ra muri ira na nodra kalou ka vakacabora nai soro vei ira na nodra kalou, ka sa kacivi iko e dua, ka ko sa qai la'ki kana e na nona i soro.

16Ko na qai kauta na nodra goneyalewa me watidra na luvemu, ka sa lako tani ko ira na nodra goneyalewa ka dautagane ni ra muri ira na nodra kalou, ka kauti ira na luvemu tagane me la'ki dauyalewa ni ra muri ira na nodra kalou.

17 Lako 20.4; Vsoro 19.4; Vrua 5.8; 27.15 “Mo kakua ni cakava vei iko na kalou e na ka sa vakawaicalataki.

18 Lako 12.14-20; Vsoro 23.6-8; Tiko 28.16-25 “Mo vakayacora tiko na solevu ni kana madrai sa sega ni vakaleveni. Sa bogi vitu mo kania kina na madrai sa sega ni vakaleveni, me vaka ka'u a vakarota vei iko, e na kena gauna e na vula ko Epipi; ni ko a lako tani mai Ijipita e na vula ko Epipi.

19 Lako 13.2 Sa noqu na ulumatua kecega, kei na ulumatua tagane kecega ni nomu manumanu, se bulumakau, se sipi.

20Lako 13.13Ia na ulumatua ni asa mo volia e na lami, ia kevaka ko sa sega ni via volia, mo qai musuka na domona. A ulumatua kecega vei ira na luvemu tagane mo volia.

Ia me kakua e dua me lako wale mai vei au.

21 Lako 20.9,10; 23.12; 31.15; 35.2; Vsoro 23.3; Vrua 5.13,14 “E ono na siga mo cakacaka kina, ia e na kenai kavitu ni siga mo vakacegu; e na vula i teitei kei na vula i tamusuki sila mo vakacegu.

22Vsoro 23.15-21; 23.39-43; Tiko 28.26-31Mo qarava na soqoni levu ni veiwiki, e nai sevu ni witi, kei na soqoni levu ni kumukumuni ni sa cava na yabaki.

23Ko ira kecega na nomu tagane me ra rairai vakatolu e na veiyabaki e na mata i Jiova na Turaga, na Kalou i Isireli.

24Ni ka'u na vakasevi ira e matamu na veimatanitu, ka vakalevutaka na nomu vanua; ia ena sega e dua na tamata me kocova na nomu vanua, ni ko sa lako cake vakatolu e na veiyabaki me rairai e na mata i Jiova na nomu Kalou.

25 Lako 12.10 “Mo kakua ni vakacabora vata kei na madrai sa vakaleveni na dra ni noqu i soro; me kakua talega ni vo nai soro ni solevu ni Lako-sivia me yacova na mataka.

26Vrua 24.21; 26.2Ai matai ni sevu ni nomu vanua mo kauta ki na vale i Jiova na nomu Kalou. Mo kakua ni vakasaqa na luve ni me e na wai-ni-sucu i tinana.

27A sa kaya vei Mosese ko Jiova, “Mo vola na vosa oqo, ni ka'u sa ia e dua na veiyalayalati kei iko kei ira na Isireli me vaka na vosa oqo.”

28A sa tiko mai kea kei Jiova ko koya ka siga vasagavulu ka bogi vasagavulu. A sa sega ni kania e dua na kakana se gunu wai. A sa vola e na vatu raraba ko Jiova na vosa ni veiyalayalati, io na vunau e tini.

Na Serau ni Mata i Mosese

29 2Kori 3.7-16 Ia, ni sa siro sobu ko Mosese mai na Ulunivanua ko Saineai, a sa taura ko Mosese na vatu raraba ruarua ni vunau, ni sa siro sobu mai na ulunivanua ko koya, sa sega ni kila ko Mosese ni sa serau na kuli ni matana ni rau sa veivosaki kaya ko Koya.

30A sa raici Mosese ko Eroni kei ira kecega na Isireli, ka raica, sa serau na kuli ni matana; a ra sa rere ni torovi koya.

31A sa kacivi ira ko Mosese; a sa lesu vua ko Eroni kei ira kece na turaga ni soqosoqo; a sa veivosaki kei ira ko Mosese.

32Sa oti era qai torova ko ira kece na Isireli, a sa vakaroti ira ko koya e na ka kecega ka vosataka vua ko Jiova mai na Ulunivanua ko Saineai.

33Ia ni sa oti na nona veivosaki kei ira ko Mosese, sa qai ubia na matana ko koya.

34Ia ni sa curu ko Mosese ki na mata i Jiova me vosa vua, sa luvata nai ubi, ka me curu mada mai ki tautuba. A sa qai curu tale mai ki tautuba ka tukuna vei ira na Isireli na ka sa vakaroti vua.

35A ra sa raica na mata i Mosese na Isireli, ni sa serau na kuli ni mata i Mosese. A sa ubia tale na matana ko Mosese, ka yacova na nona curu me vosa vei koya.