Isikeli 10 - Ai Vola Tabu (Vakadewa Makawa Vakavoutaki 2021)（FRV21）

Sa Biuti Jerusalemi na Lagilagi ni Kalou

1 Isi 1.26; Vtaki 4.2 Au a qai vakararai, ka raica e na kabu ni maliwa lala e cake e na uludratou na jerupi ni votu mai e dua na ka sa vaka na vatu safaia, ka rairai me vaka nai vakatakarakara ni tikotiko vakaturaga.

2Vtaki 8.5A sa vosa ko koya vua na tamata sa vakaisulu e na lineni, ka kaya, “Mo curu mada ki na maliwa ni yava ni qiqi e ruku ni jerupi, ka yakuta e na ligamu na qilaiso sa waqa tu mai na kedratou maliwa na jerupi, ka kaburaka yani ki na koro.”

A sa curu kina ni'u sa raica tiko.

3Ia na jerupi eratou sa tu e na yasa ni vale ki nai matau, ni sa curu kina na tamata; ia sa sinai na lomanibai e loma e na o.

4Ka sa lako cake mai nai ukuuku i Jiova mai na jerupi, ki dela ni lago ni vale; ka sa vakasinaiti na vale e na o, ia na lomanibai sa sinai e na serau ni ukuuku i Jiova.

5Ia na rorogo ni tabadratou na jerupi sa yaco yani ki na lomanibai ki sau, me vaka na domo ni Kalou Kaukauwa ni sa vosa ko koya.

6Ia ni sa vakarota ko koya na tamata sa vakaisulu e na lineni e na nona kaya, “Mo kauta na bukawaqa mai na maliwa ni yava ni qiqi, mai na maliwa ni jerupi”, a sa curu ki loma ko koya ka duri volekata na yava ni qiqi.

7A sa dodoka na ligana e dua na jerupi mai na kedratou maliwa na jerupi, ki na bukawaqa e na maliwa ni jerupi, ka laveta, ka tauca ki na liga i koya sa vakaisulu e na lineni, ka sa taura ko koya, ka curu ki tautuba.

8A sa votu mai vei iratou na jerupi e dua na ka sa vaka na liga ni tamata e na ruku ni tabadratou.

9 Isi 1.15-21 Ia ka'u sa vakararai, ka raica e va na yava ni qiqi sa tu vata kei iratou na jerupi, e dua na yava ni qiqi sa tu vata kei na dua na jerupi, ka dua tale na yava ni qiqi sa tu kei na dua tale na jerupi; ia na kedratou i rairai na yava ni qiqi sa vaka na roka ni vatu perili.

10Ia na kedratou i rairai, sa tautauvata va-va, ka sa vaka e tu e dua na yava ni qiqi e na veimama ni dua na yava ni qiqi.

11Ni ratou sa lako, eratou sa lako e na batidratou va-va; eratou sa sega ni veigoleyaki ni ratou sa lako, ia na yasana sa vakanamata kina na uludratou eratou sa muri kina; eratou sa sega ni veigoleyaki ni ratou sa lako tu.

12Vtaki 4.8Ia na yagodratou taucoko, kei na dakudratou, kei na ligadratou, kei na tabadratou, kei na yava ni qiqi—sa vakamatana sara—ka volita talega na yava ni qiqi va-va.

13Ia sa kacivaki e daligaqu na yava ni qiqi me vakatokai “na qiqi toqiliqili.”

14Isi 1.10; Vtaki 4.7Ka sa tau ya-va na matadratou: na kenai matai ni mata na mata ni jerupi, na kenai karua na mata ni tamata, na kenai katolu na mata ni laione, na kenai kava na mata ni ikeli.

15A ratou sa duri cake na jerupi. Oqo ko ira na ka bula ka'u a raica mai na uciwai ko Kipa.

16Ia ni ratou sa lako yani na jerupi, sa lako vata talega na yava ni qiqi ka tu vata. Ni ratou sa vakatetaba ko iratou na jerupi me vuka cake tani mai delai vuravura, sa sega talega ni vuki tani na yava ni qiqi ko ya vei iratou.

17Ni ratou sa tu vakadua, sa tu vakadua talega oqo; ni ratou sa laveti cake oqori, sa laveti cake talega oqo; ni sa tiko vei ira na yalo ni ka bula.

18Sa qai lako tani nai ukuuku i Jiova mai nai lago ni vale, ka tu ki dela ni jerupi.

19A ratou sa qai vakatetaba ko iratou na jerupi, ka sa vuka cake mai na delai vuravura e mataqu ni ratou sa lako yani, ka sa lako vata kei iratou na yava ni qiqi. Ka ratou sa la'ki tu e na matamata-ni-koro ni vale i Jiova vaka ki na tokalau, ka sa ubi ira nai ukuuku ni Kalou i Isireli.

20Oqo na ka bula ka'u a raica e ruku ni Kalou ni Isireli mai na uciwai ko Kipa; ia ka'u a kila ni sai iratou oqo na jerupi.

21Sa tau ya-va na matadratou, ka tau ya-va na tabadratou; a sa dua na ka e vaka na liga ni tamata sa tiko e ruku ni tabadratou.

22Ia nai tovo ni matadratou, sai koya ga ka'u a raica mai na uciwai ko Kipa, na kedratou i rairai talega kei iratou dina. Eratou sa dui lako vakadodonu ga ki liu.