2 Veigauna 29 - Ai Vola Tabu (Vakadewa Makawa Vakavoutaki 2021)（FRV21）

Sa Tui Juta ko Esekaia(2 Tui 18.13)

1Sa ruasagavulu ka lima na yabaki i Esekaia ni sa buli me tui, a sa lewa tiko e Jerusalemi ka yabaki ruasagavulu ka ciwa. Ia na yaca i tinana ko Apaija, na luve i Sakaraia.

2A sa caka dodonu ko koya e na mata i Jiova, me vaka na ka kecega ka kitaka ko Tevita na nona qase.

Sa Vakasavasavataki na Vale i Jiova

3Sa dolava ko koya na katuba ni vale i Jiova, ka vakavinakataka, e nai matai ni yabaki ni nona lewa, e nai matai ni vula.

4Ka sa kauti ira mai na bete kei ira na Livai, ka vakasoqoni ira vata ki na sala sa donuya na tokalau,

5ka sa kaya vei ira, “Dou rogoci au, oi kemudou na Livai, dou vakasavasavataki kemudou edaidai, ka vakasavasavataka na vale i Jiova na Kalou ni nomudou qase, ka kauta tani na ka dukadukali mai na tikina tabu.

6Ni ra sa caka cala ko ira na noda qase, ka cakava na ka ca e na mata i Jiova na noda Kalou, a ra sa biuti koya, ka vagolea tani na matadra mai na vale i Jiova, ka vuki vakanadaku.

7Era sa sogota talega na katuba ni varada, a ra sa bokoca na cina, ka ra sa sega ni vakama na ka boi vinaka, se vakacabora nai soro kama, ki na Kalou i Isireli e na tikina tabu.

8E na vuku ni ka oqo, sa tiko vei ira na Juta kei Jerusalemi na cudru i Jiova, a sa soli ira me ra vakararawataki, me ra vakidacalataki, ka me ra vakatasiusiutaki, me vaka dou sa raica oqo.

9Io, raica, sa bale ko ira na noda qase e nai seleiwau, ka sa vakabobulataki tiko na luveda tagane, kei na luveda yalewa, kei na watida, e na vuku ni ka oqo.

10Ia sa tiko e lomaqu me'u ia na veiyalayalati kei Jiova na noda Kalou na Isireli, me saumaki tani kina vei keda na nona cudru waqawaqa.

11Oi kemudou na luvequ, dou kakua ni wele, ni sa digitaki kemudou ko Jiova mo dou tu e matana, me qaravi koya, ka kitaka na nona cakacaka, ka vakama na ka boi vinaka.”

12Sa qai tucake ko ira na Livai, ko Meaci na luve i Amasai, kei Joeli na luve i Asaraia, mai vei ira na luvedra tagane na Koaca; mai vei ira talega na tagane na luve i Mirari, o Kisi na tagane na luve i Apiti, kei Asaraia na tagane na luve i Jialelieli; mai vei ira talega na luve i Kerisoni ka tagane, ko Joa na luve i Sima ka tagane, kei Iteni na luve i Yoa ka tagane;

13mai vei ira talega na luve i Ilisavani na tagane, ko Simiri kei Jieli; mai vei ira talega na tagane na luve i Esava, ko Sakaraia kei Matanaia;

14mai vei ira talega na tagane na luve i Imani, ko Jieli kei Semeai; mai vei ira talega na luve i Jitucuni, ko Semaia kei Usieli ka tagane.

15A ra sa vakasoqoni ira na wekadra, ka ra sa vakasavasavataki ira, ka lako mai, me vaka nai vakaro ni tui, e na vuku ni cakacaka i Jiova, me ra vakasavasavataka na vale i Jiova.

16Ka ra sa curu ki na loqi ni vale i Jiova ko ira na bete, me ra vakasavasavataka, a ra sa kauta mai ki tautuba na duka kecega era sa kunea e na vale i Jiova ki na rara ni vale i Jiova. Sa ra qai kauta tani ko ira na Livai, ka biuta ki na soniwai ko Kitironi.

17A ra sa vakatekivu e na kenai matai ni siga e nai matai ni vula, me ra vakasavasavataka, a ra sa yaco e na kenai kawalu ni siga ki na varada i Jiova. Sa bogi walu na nodra vakasavasavataka tiko na vale i Jiova, ka ra sa tinia e na kenai katinikaono ni siga e nai matai ni vula.

Sa Vakacabori Tale na Vale ni Kalou

18Era sa qai lako vei Esekaia na tui, ka kaya, “Keitou sa vakasavasavataka na vale taucoko i Jiova, kei nai cabocabo-ni-soro kama, kei na kenai yaya kecega, kei na tepeli ni madrai dauraici, kei na kenai yaya kecega.

19Ai yaya kece talega sa biuta e na nona caka cala ko Easi na tui ni sa lewa tiko, keitou sa vakarautaka ka vakasavasavataka, ka raica, sa tu e mata ni cabocabo-ni-soro i Jiova.”

20Sa qai sou ko Esekaia na tui, ka vakasoqoni ira vata era sa lewa e na koro, ka lako cake ki na vale i Jiova.

21Ka ra sa kauta mai e vitu na bulumakau tagane, ka vitu na sipi tagane, ka vitu na luve ni sipi, ka vitu na me tagane, mei soro e na vuku ni valavala ca ni matanitu, ka e na vuku ni vale-ni-soro, e na vukudra talega na Juta. Ka sa vakarota vei ira na bete na luve i Eroni, me ra vakacabora e nai cabocabo-ni-soro i Jiova.

22A ra sa vakamatea na bulumakau, ka kauta na dra ko ira na bete, ka kureitaka ki nai cabocabo-ni-soro; ia ni ra sa vakamatea oti na sipi tagane, era sa kureitaka na dra e dela ni cabocabo-ni-soro; era sa vakamatea talega na luve ni sipi, a ra sa kureitaka na dra e dela ni cabocabo-ni-soro.

23Ia era sa kauta mai na me tagane e matadra na tui kei nai soqosoqo, mei soro ni valavala ca; a ra sa tabaka e na ligadra.

24A ra sa vakamatea ko ira na bete, ka ra sa ia na veivinakati e na nodra dra e na dela ni cabocabo-ni-soro, me sorovaki ira kecega na Isireli. Ni sa vakarota ko koya na tui me caka nai soro kama kei nai soro ni valavala ca e na vukudra kecega na Isireli.

25A sa lesi ira na Livai me ra tu e na vale i Jiova, ka me ra taura na sibali kei na soliteri, kei na api, me vaka nai vakaro i Tevita kei Kata na nona daurai na tui, kei Necani na parofita, ni sa vakakina na vosa i Jiova e na gusudra na parofita.

26A sa tu ko ira na Livai, ka taura na ka domo vinaka i Tevita, kei ira na bete era sa taura na davui.

27A sa vakarota ko Esekaia me ra vakacabora nai soro kama e na dela ni cabocabo-ni-soro. Ia ni sa vakatekivu nai soro kama, sa vakatekivu na sere vei Jiova kei na uvu davui, kei na veika domo vinaka sa lesia ko Tevita na tui Isireli.

28A ra sa cuva ko ira nai soqosoqo taucoko, ka sere ko ira na dausere, ka uvu davui ko ira na kena dau. Sa ia tiko na ka kecega oqo ka me oti mada nai soro kama.

29Ia ni ra sa vakaotia na vakacaboisoro, sa cuva sobu ka lotu na tui kei ira kecega era sa tiko kaya.

30A sa vakarota ko Esekaia na tui kei ira na nona tamata turaga kivei ira na Livai, me ra seretaka na vakavinavinaka vei Jiova e na vosa i Tevita, kei Esava na daurai. A ra sa seretaka na vakavinavinaka e na marau, ka ra sa vakacuva na uludra ka lotu.

31Sa qai vosa ko Esekaia, ka kaya, “Ni dou sa qai vakatabui kemudou oti me nei Jiova, dou qai toro voleka mai ka kauta mai eso nai soro, ka so nai madrali ni vakavinavinaka, ki na vale i Jiova.” Era sa qai kauta mai nai soro ko ira nai soqosoqo, ka so nai madrali ni vakavinavinaka; kei nai soro kama ko ira sa lomadra kina.

32Ia nai wiliwili ni soro kama ka ra kauta mai ko ira nai soqosoqo, sa vitusagavulu na bulumakau, e dua na drau na sipi tagane, e rua na drau na luve ni sipi; nai soro kama kecega oqo kivei Jiova.

33Ia na ka sa vakatabui, sa ono na drau na bulumakau, ka tolu na udolu na sipi.

34Ia era sa lewe lailai ga ko ira na bete, ka ra sa sega ni drudruga rawa nai soro kama kecega, ka sa vukei ira kina na wekadra na Livai, ka yacova nai vakataotioti ni cakacaka kei na gauna era sa vakasavasavataki ira rawa kina ko ira na bete—ni ra sa yalodina cake ko ira na Livai vei ira na bete e na nodra dauvakasavasavataki ira.

35Me i kuri ni soro kama e vuqa, sa tiko talega na kedra uro nai soro ni veivinakati, kei nai madrali gunuvi sa ia vata kei nai soro kama yadua. A sa vakadodonutaki kina na cakacaka ni vale i Jiova.

36Ka sa reki ko Esekaia, kei ira kecega na tamata, ni sa vakarautaki ira na tamata ko koya na Kalou, ni sa caka vakasauri na ka oqo.