Isikeli 24 - Ai Vola Tabu (Vakadewa Makawa Vakavoutaki 2021)（FRV21）

Na Kuro sa Kere Vakavinaka Tu

1Sa yaco tale vei au na vosa i Jiova e nai kaciwa ni yabaki, e nai katini ni vula, e nai katini ni siga ni vula, ka vaka:

22Tui 25.1; Jere 52.4“Ko iko na luve ni tamata, mo vola me tu vei iko na yaca ni siga, na siga dina oqo. Sa vakarau me vala kei Jerusalemi ko tui Papiloni e na siga dina oqo.

3Ia mo cavuta na vosa vakatautauvata ki na matatamata dautalaidredre, ka kaya vei ira, Sa kaya vakaoqo na Turaga ko Jiova:

“Mo viritoka e dua na kuro, viritoka ga,

ka sova kina na wai;

4mo qai biuta kina na lewena na tikina vinaka kecega,

na sagana, kei na tabana;

vakasinaita e na sui digitaki;

5mo kauta na sipi sa uro,

ka vakama talega na suina e rukuna;

me sa kere vakavinaka sara,

me ra vakasaqa talega na kena sui e loma ni kuro.

6“O koya oqo sa kaya kina na Turaga ko Jiova:

Ena ca na koro sa vakadave-dra,

na kuro sa tu kina na kena de-ni-kuro,

na kena de-ni-kuro sa sega ni takali mai kina!

Me kau vakatikina mai na lewena;

me kakua kina na vakawiri madigi.

7E na vuku ni kena dra ni sa tu ga vua;

sa tauca ko koya e na dela ni vatu;

sa sega ni livia ki na qele,

me ubia e na kuvu-ni-soso;

8me na vakatubura kina na cudru me ia na veicudruvi;

au sa tauca na kena dra e na dela ni vatu,

me kakua kina ni tabonaki.

9O koya oqo sa kaya kina na Turaga ko Jiova;

Ena ca na koro sa vakadave-dra!

Io koi au, ka'u na binia me levu nai kelekele buka.

10Kelea na buka, vakawaqa na buka;

mo vakabuta vakavinaka na lewe ni kuro,

ka vakaboivinakataka e na boro,

me kama talega na sui.

11Me qai toka ni sa lala e na kena qilaiso sa waqa,

me katakata, ka kama na kena parasa,

ka vakawaicalataki e loma ni kuro na kena duka,

me yavu na kena de-ni-kuro.

12Sa vakaocataki wale ko koya,

a sa sega ni takali tani vua na kena de-ni-kuro levu.

Me tiko ga e na bukawaqa na kena de-ni-kuro.

13Sa ka velavela na nomu dukadukali ni ka'u a vakasavasavataki iko,

ia ko a bese ga ni savasava;

ko na sega kina ni vakasavasavataki tale mai na nomu dukadukali,

ka'u na vakayacora mada vei iko na noqu cudru.

14Oi au ko Jiova ka'u sa cavuta; ena yaco ga, ni'u na cakava, ka'u na sega ni suka ki muri, ka'u na sega talega ni vosota, ka'u na sega talega ni veivutuni; me vaka na nomu i tovo, ka vaka na nomu i valavala, era na lewai iko, sa kaya na Turaga ko Jiova.”

Na Vakaloloku Mate nei Isikeli

15Sa yaco tale vei au na vosa i Jiova, ka vaka:

16Ko iko na luve ni tamata, raica, au sa kauta tani vakasauri mai vei iko o koya ko sa dauvinakata vakalevu; ia mo kakua ga ni yaso se tagicaka, me kakua talega ni tiri na wai ni matamu.

17Mo kakua ni qoqolou, mo kakua talega ni tagicaka na mate, mo vakaisala ga, ka daramaka vei iko na nomu i vava, kakua ni ubia na tebenigusumu, ka mo kakua ni kana e na burua.

18Ia ka'u a vosa vei ira na tamata e na mataka, a sa ciba na watiqu e na yakavi. Ia ka'u sa kitaka e na mataka me vaka na ka sa vakaroti vei au.

19A ra sa kaya vei au ko ira na tamata, O na sega li ni tukuna vei keimami se bale vakacava vei keimami na ka oqo, ko sa cakava?

20Au a qai kaya vei ira, “Sa yaco mai vei au na vosa i Jiova, ka vaka:

21‘Mo kaya ki na vale i Isireli, Sa kaya vakaoqo na Turaga ko Jiova: Raica, au na vakacacana na noqu vale tabu, o koya na nomudou kaukauwa dou sa dokai kemudou kina, ka sa daumaka kina na matamudou, ka sa dau lomana talega na yalomudou; ia na luvemudou tagane kei na luvemudou yalewa, ko ira dou a laiva yani, era na bale e nai seleiwau.

22Ia dou na kitaka me vaka na ka ka'u sa kitaka; dou na sega ni ubia na tebenigusumudou, ka dou na sega ni kana e na burua.

23Ena vakaisala talega na ulumudou, ka vakaivava na yavamudou; dou na sega ni yaso se tagi, ia sa na lutu sobu na yagomudou e na vuku ni nomudou i valavala ca, ka dou na dui vutugu vakataki kemudou.

24Ia ko Isikeli, ena kemudou i vakatakilakila; na ka kece ka cakava ko koya dou na cakava vakakina. Ia ni sa yaco na ka oqo, dou na qai kila ni sai au na Turaga ko Jiova.’

25“O iko talega, na luve ni tamata, ena sega beka ni yaco e na siga ka'u sa kauta tani kina vei ira na nodra kaukauwa, kei na nodra marau lagilagi, na ka era sa matalau kina, kei na ka sa lasa kina na yalodra, na luvedra tagane kei na luvedra yalewa,

26e na siga ko ya ena qai lako mai vei iko ko koya sa dro, me vakarogoya ki na daligamu?

27E na siga ko ya ko na vosa vei koya sa dro, io ko na vosa, ka sega ni galu tiko. Ia ko na yaco me kedrai vakatakilakila, ka ra na kila ni sai au ko Jiova.”