Same 71 - Ai Vola Tabu (Vakadewa Makawa Vakavoutaki 2021)（FRV21）

A Masu ni Tamata Yalododonu sa Vakararawataki

1I Jiova, au sa vakararavi vei kemuni;

kakua ni laivi au me'u vakamaduataki e na dua na gauna.

2Mo ni vakabulai au e na nomuni yalododonu, ka me'u dro rawa;

mo ni vakatu daligamuni kivei au, ka vakabulai au.

3Mo ni noqu vale kaukauwa,

me'u dro tikoga kina, o ni sa vosa oti me'u vakabulai;

ni kemuni sa noqu uluvatu kei na noqu koro vakabai.

4Mo ni vakabulai au, na noqu Kalou, mai na ligana na tamata i valavala ca,

mai na ligana na tamata sa sega ni dodonu ka sai valavala vakaukauwa.

5Ni sai kemuni ga, na Turaga Jiova, ka'u sa nuinui tiko kina,

oi kemuni ga ka'u a vakararavi kina ni'u a cauravou ka yacova na gauna oqo.

6O ni a tokoni au mai na siga ka'u a sucu kina;

oi kemuni ga ka kauti au mai na kete i tinaqu.

Au na vakavinavinaka tikoga e na vukumuni.

7Au sa vaka na ka e dauveivakidacalataki vei ira na lewe vuqa,

ia koi kemuni ga na noqu i drodro kaukauwa.

8Me sinai na gusuqu e na vakavinavinaka vei kemuni,

kei na vakacaucautaki kemuni e na siga ka bogi.

9Kakua ni biuti au e na gauna ka'u sa qase mai kina;

kakua ni laivi au ni sa oti na noqu kaukauwa.

10Ni ra sa vosavakacacataki au ko ira na noqu meca,

a ra sa bose vata ko ira era sa lawakitaka na yaloqu.

11Ka kaya, “Sa biuti koya na Kalou,

dou vakasavi koya ka vesuka;

ni sa sega e dua me vakabulai koya.”

12Na Kalou, mo ni kakua ni vakayawa vei au;

noqu Kalou, mo ni kusarawa ni vukei au!

13Me ra vakamaduataki ka vakarusai ko ira era sa meca ni yaloqu;

Me ra vakarogocataki vakalevu ka me ra sega ni dokai

ko ira sa segata na ka me'u ca kina.

14Ia koi au, ka'u na vakanuinui tikoga,

ka vakavinavinaka vakalevu cake tiko vei kemuni.

15A gusuqu, ena tukuna tikoga na nomuni cakacaka dodonu,

kei na bula sa mai vei kemuni e na siga ka bogi;

ni'u sa sega ni kila na kenai wiliwili.

16Au na lako tu ga e na kaukauwa ni Turaga ko Jiova,

au na tukuna na nomuni cakacaka dodonu, io, na nomuni duaduaga.

17O ni a vakavulici au, na Kalou, ni'u a gone,

ka yacova na gauna oqo ka'u sa tukuna tiko na nomuni cakacaka e veivakurabuitaki.

18Oqo talega, ni ka'u sa qase ka sika mai,

mo ni kakua ni laivi au na Kalou,

ka me'u vakatakila mada eliu na nomuni kaukauwa

vei ira nai tabatamata oqo,

kei na nomuni qaqa vei ira kecega era na tubu mai muri.

19A nomuni yalododonu talega, na Kalou,

sa ka cecere sara.

O ni sa cakava oti na ka vakaidina,

kemuni na Kalou, o cei sa vakataki kemuni?

20Oi kemuni ko ni sa vakatakila mai vei keimami na ka rarawa vakalevu ka ca sara,

o ni na vakabulai keimami tale;

ka kauti keimami cake tale

mai na wai titobu e vuravura.

21O ni na vakalevulevui au,

ka vakacegui au e na veiyasana kecega.

22Au na seretaki kemuni talega e na soliteri

io na nomuni yalodina, na noqu Kalou;

au na sere vei kemuni e na api,

oi kemuni na Yalosavasava ni Isireli.

23Ena marau vakalevu na tebenigusuqu

ni'u sa sere vei kemuni;

kei na yaloqu, o koya ko ni sa vakabula.

24A yamequ talega, ena tukuna tikoga na nomuni cakacaka dodonu e na siga kecega ka bogi,

ni ra sa vakamaduataki,

ni ra sa vakarogocataki ko ira era sa segata me'u vakacacani.