Aisea 55 - Ai Vola Tabu (Vakadewa Makawa Vakavoutaki 2021)（FRV21）

Na Veisureti ki na Bula Cecere ka Vakaibalebale

1 Vtaki 21.6; 22.17 “Oi kemudou vakaaduaga sa viagunu,

dou lako mai ki na wai;

io ko koya sa sega vua nai lavo,

me lako mai, ka volia, ka kania!

Lako mai, ka mai volia na waini kei na sucu

ka segai e nai lavo se na kenai voli.

2A cava dou sa vakayagataka kina na nomudou i lavo e na ka sa sega ni kakana,

kei na nomudou cakacaka e na ka sa sega ni veivakacegui?

Dou vakarorogo vinaka sara vei au, ka kania na ka e vinaka,

ka marautaka e yalomudou na kakana uasivi.

3 Caka 13.34 Dou vakatu daligamudou, ka lako mai vei au;

dou vakarorogo, ka mo dou na bula kina.

Ka'u na ia kei kemudou na veiyalayalati e sega ni mudu,

io na ka vinaka sa yalataki dina vei Tevita.

4Raica, ka'u sa vakayacori koya me i vakadinadina vei ira na veimataqali,

me nodra i liuliu kei na nodra turaga-ni-valu na veimataqali.

5Raica, ko na kaciva na matanitu ko sa sega ni kila,

kei na matanitu sa sega ni kilai iko ena cici mai vei iko,

e na vuku i Jiova na nomu Kalou, na Yalosavasava ni Isireli,

ni sa dokai iko ko koya.

6“Dou vakasaqarai Jiova ni sa kune rawa,

dou masuti koya ni sa voleka tiko;

7me biuta mada na nona i tovo na tamata ca,

kei na nona vakanananu na tamata daucaka cala;

me lesu mai ko koya vei Jiova, ka me na yalololoma ko koya ki vua,

io vei koya na noda Kalou, ni na gugumatua ko koya me veivosoti.

8Ni sa duatani na noqu vakanananu ka duatani na nomudou vakanananu,

ka sa duatani na noqu i valavala ka duatani na nomudou i valavala, sa kaya ko Jiova.

9Me vaka na kena cecere cake na lomalagi ki vuravura,

sa cecere cake vakakina na noqu i valavala ki na nomudou i valavala,

kei na noqu vakanananu ki na nomudou vakanananu.

10 2Kori 9.10 “Me vaka sa tau sobu na uca kei na uca-vulavula mai lomalagi,

ka sa sega ni lesu tale yani kina, ia sa vakasuasuataka mada ga na qele,

ka vakabulabulataka ka me kubu,

me vuataka kina na sila vua sa kaburaka kei na madrai vua sa kania,

11ena vaka talega kina na noqu vosa sa lako yani mai gusuqu;

ena sega ni lesu lala mai vei au,

ia ena vakayacora mada ga na ka ka'u sa nakita,

ka daucaka yaco e na ka ka'u a tala kina.

12“Ni dou na marau, ni dou sa lako yani;

ka vakacegu, ni dou sa tuberi yani;

na veiulunivanua kei na veiulu-ni-koro ena lagata na sere e matamudou,

ia na kau kecega ni vanua ena ia na vakasausau.

13Ena tubu mai na damanu me kenai sosomi ni soni,

ka na tubu mai na mateli me kenai sosomi ni salato;

ia na ka oqo ena rogo kina na yaca i Jiova,

ka na kenai vakananumi e sega ni mudu ena sega ni takali rawa.”