Jope 41 - Ai Vola Tabu (Vakadewa Makawa Vakavoutaki 2021)（FRV21）

Sa Tukuna na Livaiacani na Kalou

1 Same 74.14; 104.26; Aisea 27.1 “Ko sa yavia rawa beka mai na Livaiacani e na siwa,

se vesuka na yamena e na dali?

2Ko na daramaka rawa beka e dua na dali ki na ucuna

se cula basika na galegalena e nai qila?

3Ena vakamasuti iko vakalevu beka ko koya?

Ena tauca beka vei iko na vosa malumu?

4Ena ia beka na veiyalayalati kei iko

mo kauti koya kina me nomu dauveiqaravi ka tawa mudu?

5Drau na qito kaya beka me vaka ko dauqito vata kei na manumanu vuka,

se ko na vauca me nodra na nomu goneyalewa?

6Era na veivolitaki koya beka ko ira na dauveivoli?

Era na vidavidai koya beka ka vota vei ira nai taukei ni bisinisi?

7Ko rawa li ni vakila na kuli ni yagona e na saisai kaukamea,

se na uluna e na moto ni ika?

8Mo tabaki koya e na ligamu;

nanuma nai valu; ko na sega ni kitaka tale!

9Raica, na vakanuinuitaki ni nona rawai e na ka ni rarawa sara;

ka sega beka li ni ra malumalumu talega na veikalou ni ra sa raica?

10Sa sega e dua sa doudou me via vakacudruya.

Ia ko cei sa yatedei me tu rawa e matana?

11Ko cei li e na rawa ni veisaqasaqa kaya ka qai sega ni vakaleqai?

—ko cei beka, e na ruku i lomalagi taucoko?

12“Au na sega ni galutaka na veika me baleta na yavana,

se na nona kaukauwa, se na nona vatukai vinaka.

13Ko cei li e na luvata rawa na nona i sulu e sau?

Se ko cei me torova na nona i tarovi sa taqarua?

14Ko cei li me dolava rawa nai sogo ni matana?

Sa ka rerevaki tu na batina ka tu volita.

15Na dakuna sa buli e nai sasabai sa tuvai vakavinaka,

sa cokocokoti vata ka sogo e na drega.

16Sa veivolekati e dua na tikina ki na dua tale

me dredre kina ni curuma na cagi.

17Sa sema vata e dua na tikina ki na kenai sa;

sa veikabiti ga, me dredre kina ni tawase.

18Ni sa suru ko koya, sa cila mai kina na rarama,

kei na matana sa vaka na kida cake ni mata-ni-siga.

19Sa lako mai na gusuna na yameyame ni buka;

sa lidi mai kina na mata ni bukawaqa.

20Sa kuvu mai na ucuna na kubou,

me vaka mai na kuro sa kere se na lovo.

21A nona i cegu sa vakawaqaca na qilaiso ni buka,

ka sa lako mai na gusuna na yameyame ni buka.

22Sa tiko e domona na kaukauwa,

ka sa vuki na rarawa me reki e matana.

23Na uwa ni lewena sa veikabiti vata;

sa kaukauwa tu ka sa sega ni yavalati rawa.

24Sa kaukauwa na lomana me vaka na vatu,

io, sa kaukauwa me vaka na tiki ni vatu-i-qaqi e ra.

25Ni sa tucake ko koya, era sa rere na qaqa;

ni sa yavala, sa yali na yalodra.

26Ka dina ga ni sa yacovi koya nai seleiwau, ia sa sega ga ni cakacaka,

sa sega talega ni cakacaka na moto, se nai wau, se na saisai.

27Sa okata ga na kaukamea me co,

kei na parasa me kau vuca.

28Ena sega ni dro rawa e na vuku ni gasau ni dakaititi;

ki vua, na vatu sa daurabotaki sa vukici me qa-ni-sila.

29Nai wau sa okata ko koya me vu-ni-sila;

sa dredrevaka ko koya na rorogo ni moto.

30Na veitiki ni yagona e rukuna sa vaka na caca ni kuro gagata;

sa tevuki tu me vaka na vatu ni tatamusuki e na vanua lolobo.

31Sa vakerea na wai titobu me vaka na kuro;

sa vakayavalata na waitui me vaka na kuro waiwai.

32Na mawe ni nona i lakolako e biuta tu mai sa caucaudre;

ena nanumi kina na wai titobu me ulu-vula.

33Sa sega e vuravura me tautauvata kaya,

e dua na ka buli ka sa sega ni rere rawa.

34Sa dauraica sobu na ka cecere kecega;

sa turaga ko koya vei ira kecega sa viavialevu.”