Tiko mai na Lekutu 28 - Ai Vola Tabu (Vakadewa Makawa Vakavoutaki 2021)（FRV21）

Nai Soro me Qaravi e na Veisiga(Lako Yani 29.38-46)

1A sa vosa vei Mosese ko Jiova, ka kaya,

2“Mo vakaroti ira na Isireli, ka kaya vei ira, ‘Nai madrali vei au, na qau kakana kei na veika sa vakacabori vei au e na bukawaqa, me ka boi vinaka vei au, dou nanuma mo dou vakacabora ga vei au e na kena gauna sa lokuci.’

3Ia mo kaya vei ira: Oqo na ka sa vakacabori e na bukawaqa dou na vakacabora vei Jiova; e rua na lami sa yabaki yadua sa sega na kena ca, e na veisiga, mei soro kama sa ia tikoga.

4Mo vakacabora e dua na lami e na mataka, ka vakacabora na kenai karua ni lami e na yakavi;

5kei na omeri madrai droka vinaka mei madrali laukana, sa veiwaki vata kei na waiwai sa lauvutu e rua na paidi ka levu cake.

6Nai soro kama sa ia tikoga, sa lesi mai na Ulunivanua ko Saineai me ka boi vinaka, na ka sa vakacabori e na bukawaqa vei Jiova.

7Ia na kenai madrali liviraki e rua na paidi ka levu cake ki na lami e dua. Mo liviraka e na tikina tabu na waini mei madrali liviraki vei Jiova.

8Ia na lami kadua mo vakacabora e na yakavi. Mo vakacabora me vaka nai madrali laukana vakamataka, kei na kenai madrali liviraki, me ka sa vakacabori e na bukawaqa, na ka boi vinaka vei Jiova.

Nai Soro e na Siga ni Vakacecegu

9“Ia e na Siga ni Vakacecegu me rua na lami sa yabaki yadua sa sega na kena ca, ka rua na omeri madrai droka vinaka, sa veiwaki vata kei na waiwai, mei madrali laukana, kei na kenai madrali liviraki—

10oqo nai soro kama ni Siga ni Vakacecegu kecega, mei kuri ni soro kama sa ia tikoga, kei na kenai madrali liviraki.

Nai Soro Kama e na Veivula Vou

11“Ia e nai vakatekivu ni nomudou veivula dou na vakacabora nai soro kama vei Jiova; e rua na bulumakau sa gone, ka dua na sipi tagane, e vitu na lami sa yabaki yadua sa sega na kena ca;

12ka tolu na omeri madrai droka vinaka, sa veiwaki vata kei na waiwai, mei madrali laukana kei na bulumakau yadua; ka rua na omeri madrai droka vinaka, sa veiwaki vata kei na waiwai, mei madrali laukana kei na sipi tagane e dua;

13me yadua talega na omeri madrai droka vinaka, sa veiwaki vata kei na waiwai, mei madrali laukana kei na lami e dua—ko ya nai soro kama, me ka boi vinaka, me ka sa vakacabori e na bukawaqa vei Jiova.

14Ia na kedrai madrali liviraki me waini e lima na paidi ki na bulumakau, ka tolu na paidi ka levu cake ki na sipi tagane, ka rua na paidi ka levu cake ki na lami. Oqo nai soro kama e na vula yadua, e na yabaki taucoko.

15Ka dua na luve ni me mei soro ni valavala ca me vakacabori vei Jiova, kei na kenai madrali liviraki, mei kuri ni soro kama sa ia tikoga.

Nai Soro ni Lako-sivia(Vunau ni Soro 23.5-24)

16 Lako 12.1-13; Vrua 16.1,2 “Ia e nai katinikava ni siga ni matai ni vula me caka na solevu ni Lako-sivia i Jiova.

17Lako 12.14-20; 23.15; 34.18; Vrua 16.3-8Ia e nai katinikalima ni siga ni vula oqo me ia na kana vata. Me laukana e na siga e vitu na madrai sa sega ni vakalevenitaki.

18Me dua na soqoni tabu e nai matai ni siga; dou kakua ni cakava kina na nomudou cakacaka ni veisiga.

19Ia dou vakacabora na ka e na bukawaqa, mei soro kama vei Jiova: e rua na bulumakau sa gone, ka dua na sipi tagane, ka vitu na lami sa yabaki yadua; me ra nomudou ka e sega na kena ca.

20Ia na kedrai madrali laukana me madrai droka vinaka, sa veiwaki vata kei na waiwai; dou vakacabora vata e tolu na omeri kei na dua na bulumakau, ka rua na omeri kei na dua na sipi tagane;

21dou na vakacabora e dua na omeri kei na lami yadua vei ira na lami vituvitu;

22ka dua na me tagane me kenai soro ni valavala ca, me sorovaki kemudou kina.

23Dou vakacabora na veika oqo, mei kuri ni soro kama vakamataka, ko ya nai soro kama sa ia tikoga.

24Dou vakacabora vakaoqo e na veisiga, e na siga e vitu, na kakana vata kei na ka sa vakacabori e na bukawaqa, na ka boi vinaka vei Jiova. Me vakacabori oqo kei na kenai madrali liviraki, mei kuri ni soro kama sa ia tikoga.

25Me dua talega na nomudou soqoni tabu e nai kavitu ni siga; dou kakua ni cakava kina na nomudou cakacaka ni veisiga.

Nai Soro ni Solevu ni Veiwiki(Vunau ni Soro 23.15-22)

26 Lako 23.16; 34.22; Vrua 16.9-12 “E na siga talega sa ia kina nai sevu, ni dou sa kauta e dua nai madrali laukana vou vei Jiova e na nomudou solevu ni veiwiki, me vakayacori e dua na nomudou soqoni tabu. Dou kakua ni cakava kina na nomudou cakacaka ni veisiga.

27Ia dou vakacabora ga nai soro kama, me ka boi vinaka vei Jiova: e rua na bulumakau sa gone, e dua na sipi tagane, e vitu na lami, sa yabaki yadua.

28Ia na kedrai madrali laukana me madrai droka vinaka, sa veiwaki vata kei na waiwai, e tolu na omeri kei na bulumakau e dua, e rua na omeri kei na sipi tagane e dua,

29me dua na omeri kei na lami yadua, vei ira na lami vituvitu,

30e dua na luve ni me, me sorovaki kemudou kina.

31Dou na vakacabora mei kuri ni soro kama sa ia tikoga, kei na kenai madrali laukana, kei na kedrai madrali liviraki. Qarauna me kakua ni ca e dua na ka.