Vosa Vakaibalebale 6 - Ai Vola Tabu (Vakadewa Makawa Vakavoutaki 2021)（FRV21）

Nai Vakasala Eso

1Na luvequ, kevaka ko sa yalayala mo kenai sosomi ni kai nomu,

ka sa ia na veiyalayalati kaya na kai tani,

2ko sa coriti e na vosa ni gusumu,

ko sa vauci e na vosa ni gusumu.

3Mo ia mada na ka oqo, na luvequ, ka mo sereki iko,

ni ko sa lutu ki na ligana na kai nomu;

lako mada, mo mani vakayalomalumalumutaki iko,

ka mo vakamasuti koya na kai nomu.

4Kakua ni solia me moce na matamu,

se me sosovu na dakudaku-ni-matamu;

5vakabulai iko me vaka na kaseli mai na ligana na dauvakasasa, manumanu

kei na manumanu vuka mai na ligana na daubiri dai.

6Mo lako vua na qasikalolo, ko iko na dauvucesa;

mo nanuma mada na nona i valavala, mo vuku.

7Sa sega e dua me tuberi koya

se vakaraica, se lewa vua,

8ia sa vakarautaka na kena e na vula i katakata,

ka kumuna na kena kakana e na vula i matua.

9Me vakaevei na kena dede na nomu moce, ko iko na dauvucesa?

Ko na duri ninaica mai na nomu moce?

10 Vbale 24.33,34 Me vakalailai tale na moce, vakalailai na sosovu,

vakalailai na roqoveinu me moce,

11ia na nomu vakadravudravuataki ena lako mai me vaka na tamata dauveilakoyaki,

kei na nomu viakana tiko, me vaka na tamata i valu.

12A tamata wale io, na daucaka ca,

sai valavala tiko ko koya e na gusu takelo,

13sa sauriva e na matana, sa vosa tiko e na yavana,

sa vakavuvuli e nai qaqalo ni ligana,

14sa tiko e lomana na ka cala, sa vakanananu ca tikoga,

sa kaburaka na veileti;

15o koya ena yaco vakidacala kina vua na ka ca;

ena musuki vakidacala ko koya, ka sega ni vakabulai.

16Sa ono na ka sa cata ko Jiova,

io, e vitu sa ka vakasisila ki na yalona:

17na mata viavialevu, na yame daulasu,

kei na liga sa vakadave-dra sa sega ni cala,

18na yalo e veinanuyaka na ka ca,

na yavai koya sa kusarawa ni ciciva na ca,

19na dautukutuku vakailasu sa dauvosataka na ka lasu,

kei koya sa kaburaka na veileti vei ira era veiwekani.

Nai Vakasala me Kakua na Veibutakoci

20Na luvequ, mo vakabauta nai vakaro i tamamu,

ka kakua ni biuta na vunau i tinamu.

21Vauca tikoga ki lomamu,

bukia ki domomu.

22Ni ko sa lako voli, ena tuberi iko;

ni ko sa moce koto, ena maroroi iko;

ia ni ko sa yadra cake, ena veivosaki kei iko.

23Ni sa cina nai vakaro, ka rarama talega na vunau,

ka sa kena sala ni bula nai vakavuvuli ni vunau,

24me maroroi iko mai na yalewa ca,

kei na nona vosaveicavilaki na yalewa tani.

25Kakua ni domona e lomamu na nona matavinaka,

me kakua talega ni rawai iko ko koya e na dakudaku-ni-matana;

26e na vuku ni yalewa dautagane sa kena walega na tagane e dua bauga na tiki ni madrai:

ia na yalewa dautagane sa segata me ca na bula talei.

27Me mokota li e dua na tagane na bukawaqa ki lomaserena,

ka sega ni kama kina na nona i sulu?

28Me dua li e butuka na qilaiso sa waqa tu

ka na sega ni qesa na yavana?

29Sa vakakina ko koya sa mocera na watina na kai nona;

ena sega sara ni donu ko koya sa tarai koya.

30Sa sega e dua e cati koya na butako kevaka sa butako

me mamau kina ni sa viakana.

31Ia kevaka sa kune, ena sauma vakavitu;

ena solia na ka kecega e nona vale.

32Ia ko koya sa ia na veibutakoci sa yali na nona vuku;

ko koya sa kitaka sa vakarusa na yalona.

33Ena mavoa kina ka na rogo ca ko koya,

ia na kenai rogorogo ca ena sega ni bokoci rawa.

34Ni sa kena vu ni nona cudru dina na tagane na vuvu,

ia ena sega ni vosota e na siga ni veisausaumi.

35Ena sega ni ciqoma e dua na ka me saumi lesu vua,

ka sega ni taura nai solisoli ni veivaqumi, ka veitalia na kena levu.