Same 46 - Ai Vola Tabu (Vakadewa Makawa Vakavoutaki 2021)（FRV21）

Na Veitaqomaki ni Kalou vei Ira na Nona Tamata Vua nai liuliu ni sere. A nodra na luve i Kora. A Sere, me vaka na Alamoca.

1A noda i drodro kei na noda kaukauwa na Kalou,

sa voleka sara me vukei keda ni da sa rarawa.

2O koya oqo eda na sega kina ni rere, kevaka sa kau tani ko vuravura,

ka sa kau yani ki na loma ni wasa liwa na veiulunivanua;

3ka sa vadugu na kena wai ka vakatubu ua,

ka yavala na veiulunivanua ni sa tubu na kena biau. Sela

4Sa dua na uciwai, na kena soniwai sa vakamarautaka na koro ni Kalou,

na tikina tabu e nai tikotiko i Koya sa Cecere Sara.

5Sa tiko e na kena loma-ni-koro na Kalou; ena sega ni vakayavalati;

ena sou na Kalou e na mataka me vukei koya.

6Sa cudru na veivanua, sa yavala na veimatanitu;

sa vosa yani ko koya, sa waicala ko vuravura.

7Sa tiko vata kei keda ko Jiova-ni-lewevuqa;

a noda i drodro na Kalou i Jekope. Sela

8Dou mai raica na cakacaka i Jiova,

ni sa ia na veivakarusai e loma i vuravura.

9Sa vakaotia nai valu mai nai yalayala kei vuravura;

sa musuka na dakai-titi ko koya, ka vakarusa na moto,

ka sa vakama na qiqi-ni-valu e na bukawaqa.

10“Dou tiko lo, ka dou kila ni'u sa Kalou!

Ka'u na vakalevulevui e na veimatanitu,

ka'u na vakalevulevui e vuravura.”

11Sa tiko vata kei keda ko Jiova-ni-lewevuqa;

a noda i drodro na Kalou i Jekope. Sela