Vosa Vakaibalebale 24 - Ai Vola Tabu (Vakadewa Makawa Vakavoutaki 2021)（FRV21）

1Mo kakua ni vuvutaki ira na tamata ca,

kakua talega ni ko via tiko vata kei ira;

2ni sa vakanananu na lomadra ki nai valavala kaukauwa,

ka sa vosataka na ca na tebenigusudra.

3Na vuku ga sa tara rawa kina na vale,

kei na yalomatua sa vakataudeitaki kina;

4kei na kila-ka ena oso kina na kena veiloqi

e nai yaya kecega sa talei ka vinaka.

5Sa kaukauwa na tamata vuku,

ia na tamata daukila-ka sa vakaikuritaka na kaukauwa;

6ni ko sa bosea vakavuku ko na qai ia rawa kina na nomu i valu,

ka sa rawa na tiko vinaka ni ra lewe vuqa na daubose.

7Sa cecere na vuku vua na lialia;

sa sega ni vosa rawa e na matamata-ni-koro.

8O koya sa dauvakananuma me caka ca

ena vakatokai me vuni ca.

9Na nanuma ni lomana na lialia nai valavala ca,

ka sa ka vakasisila vei ira na tamata na dauveivakalialiai.

10Kevaka ko sa gu ca e na siga ni rarawa,

sa lailai na nomu kaukauwa.

11Kevaka ko sa sega ni vakabulai ira era sa yarataki me mate,

ko ira era sa voleka me ra moku;

12kevaka ko kaya, “Raica, keitou a sega ni kila oqo”—

sa sega li ni nanuma kina ko koya sa dikeva na yalo?

Sa sega beka ni kila ko koya sa maroroya na yalomu?

Ka na sega beka ni sauma ko koya na tamata yadua me vaka na nona cakacaka?

13Na luvequ, mo kania na oni, ni sa ka vinaka,

kei na qa-ni-oni, ni sa kamikamica ki na gusumu.

14Ena vakakina na kila vuku ki na yalomu;

ni ko sa qai kunea, ena dua kina na kenai sau,

ia na ka ko nuitaka ena sega ni muduki tani.

15Ko iko, na tamata ca, kakua ni ko lawavaka na nona i tikotiko na yalododonu;

kakua ni vakacacana na nona lomanibai;

16ni sa bale vakavitu na tamata yalododonu, ia sa na tucake tale;

ia ko ira na tamata ca era na vukici sara e na ka ca.

17Ni sa bale na nomu meca kakua ni ko reki kina,

ia ni sa tidara me kakua ni marau na yalomu,

18de sa kunea ko Jiova, ka sa ca vua,

ka sa vakasuka tani vua na nona cudru.

19Kakua ni ko rarawa e na vukudra na tamata ca.

Mo kakua talega ni vuvutaki ira na tamata ca;

20ni na sega na kenai sau vinaka vua na tamata ca;

a nodra cina na tamata ca ena bokoci.

21Na luvequ, mo rerevaki Jiova kei na tui,

kakua ni veiriti kei ira era dauveivukiyaki;

22ni na yaco vakidacala na nodra ca,

ia nai valavala ni dui nodra rusa kecega ko cei me kila?

Nai Vosavosa ni Vuku Tale Eso

23A veivosa talega oqo sa nodra na vuku:

Sa sega ni vinaka me vinakati ira loa na tamata ni ia na veilewai.

24O koya ka kaya vua na tamata ca, “Ko iko ko sa dodonu”;

ena cati koya ko ira na tamata, ka ra na vakasisilataki koya ko ira na lewe ni veivanua;

25ia ko ira era vunauci koya ena nodra kina na reki,

ena yacovi ira na vosa ni veivakalougatataki vinaka.

26O koya sa solia nai sau ni taro dina

sa reguca na tebenigusu.

27Mo vakarautaka mai nai bili na nomu cakacaka,

ka vakarautaka mai veikau me yaga vei iko;

ka oti, mo qai tara na nomu vale.

28Mo kakua ni beitaki koya wale na kai nomu,

kakua talega ni ko ia na veivakacalai e na tebenigusumu.

29Kakua ni ko kaya, “Me vaka na nona i valavala vei au, ka'u na kitaka vakakina vua;

ka'u na sauma lesu vua na tamata ko ya me vaka na ka sa cakava.”

30Au a lako voli yani ki nona were na vucesa,

kei na nona loga-ni-vaini na tamata sa sega ni vakayalo;

31ka raica, sa robota sara na wa-votovotoa,

ka sa ubi na delana e na kau votovotoa,

a kena bai vatu talega sa kabasu.

32Au a qai raica ka vakasamataka vakavinaka;

au a vakaraica ka'u sa vakavulici kina.

33 Vbale 6.10,11 Me vakalailai tale na moce, ka vakalailai na sosovu,

ka vakalailai na roqoveinu me moce,

34ia na nomu dravudravua ena qai lako mai me vaka e dua sa lako tu,

kei na nomu viakana, me vaka na tamata i valu.