Aisea 56 - Ai Vola Tabu (Vakadewa Makawa Vakavoutaki 2021)（FRV21）

Na Veivakabulai ni Kalou vei Ira Taucoko era Talairawarawa

1Sa kaya vakaoqo ko Jiova:

“Dou vakabauta na lewa, ka cakava nai valavala dodonu;

ia sa voleka ni yaco na veivakabulai ka'u na cakava;

kei na noqu lewa dodonu sa voleka ni vakatakilai.

2Sa kalougata na tamata ena cakava oqo;

kei na luve ni tamata sa na taura matua,

ni sa vakatabuya na Siga ni Vakacecegu, me kakua ni vakacacana;

ni sa tarova talega na ligana, me kakua ni cakava e dua na ka ca.”

3Ia na kai tani sa torovi Jiova, me kakua ni vosa ko koya, ka kaya,

“Ena tawasei au tani sara ko Jiova mai vei ira na nona tamata;”

me kakua talega ni kaya ko koya na mata,

“Raica, koi au ka'u sa kau madu.”

4Ni sa kaya vakaoqo ko Jiova:

“Vei ira na mata era sa vakatabuya na noqu Siga ni Vakacecegu,

ka digitaka na ka ka'u sa rekitaka,

ka taura matua na noqu veiyalayalati,

5ka'u na solia me nodra e na noqu vale kei na noqu lomanibai

na tikina kei na yaca e vinaka,

ka ca me so na luvedra tagane kei na luvedra yalewa;

ka'u na solia vei ira na yaca rogo ka sega ni mudu,

ena sega ni takali.

6“Ia ko ira na kai tani era sa torovi Jiova,

me ra qaravi koya, ka lomana na yaca i Jiova,

me ra nona tamata,

ka ra dui vakatabuya na Siga ni Vakacecegu, me kakua ni vakacacana,

ka ra taura matua na noqu veiyalayalati—

7 Maciu 21.13; Mari 11.17; Luke 19.46 ka'u na kauti ira mai ki na noqu ulunivanua tabu,

ka vakamarautaki ira e na noqu vale ni masu;

a nodra i soro kama kei na nodra i madrali

ena vakadonui e na noqu i cabocabo-ni-soro;

ni na vakatokai na noqu vale me nodra vale ni masu

na tamata kecega.”

8Sa kaya na Turaga ko Jiova,

ko koya sa vakasoqoni ira vata mai na Isireli era vakasevi,

“Ka'u na ia tale me'u vakasoqoni ira na tani vei koya,

me kedrai kuri era sa vakasoqoni rawa mai.”

Na Nodra Leqa na Veiliutaki e Isireli

9Koi kemudou kece na manumanu kila,

dou mai kana, io koi kemudou kece na manumanu ni veikau!

10Ko ira na nodra i vakatawa era sa mataboko kecega,

era sa sega ni vuku;

ko ira kecega era sa koli galu,

era sa sega ni kodrokodro rawa;

era tadra, era davo,

era vinakata na moce.

11Ia na koli oqo era sa daukana,

era sa sega ni mamau rawa.

Ia ko ira sai vakatawa era sega ni vuku rawa;

ko ira kece era sa dui gole ga ki na nona sala,

na tamata yadua ki na nona i yau, era sa vakakina ko ira kecega.

12Era sa kaya, “Tou ia, ka'u na la'ki kauta mai na waini;

ia me tou gunuva vakalevu sara na yaqona;

ena vaka na siga edaidai na siga e na mataka,

ia ena vinaka vakalevu cake sara ga.”