Lele i Jeremaia 5 - Ai Vola Tabu (Vakadewa Makawa Vakavoutaki 2021)（FRV21）

Na Masu ni Kere Veivosoti

1Mo ni nanuma, Jiova, na ka sa yacovi keimami;

ni vakasama, ka raica na neimami vakalialiai!

2A neimami vanua, sa soli me nodra na kai tani;

a neimami veivale, sa soli me nodra na vulagi.

3Keimami sa luveniyali ka sega ni vakatamani,

sa vaka na yada na tina i keimami.

4Keimami sa volia e nai lavo na wai keimami sa gunuva;

a neimami buka, sa volitaki vei keimami.

5Sa bitaki na domo i keimami;

keimami sa oca, ka sega ni vakacegu.

6Keimami sa solia na liga i keimami vei ira na kai Ijipita,

vei ira talega na kai Asiria, me keimami mamau e na madrai.

7Era sai valavala ca ko ira na tama i keimami; a ra sa yali ga;

ia keimami sa saumi e na vuku ni nodra caka cala.

8Ko ira na tamata wale, era sa veitaliataki keimami;

sa sega e dua me vakabulai keimami mai na ligadra.

9Keimami bolea na mate ka qai rawa kina na keimami kakana,

e na vuku ni seleiwau mai na vanua lala.

10Na kuli i keimami, sa loaloa mai me vaka na lovo,

ni sa ka rerevaki na dausiga.

11Era sa yarataki ira na yalewa ni Saioni;

kei ira na goneyalewa e na veikoro vaka-Juta.

12Era sa rubeci ira na turaga e na ligadra;

a matadra na qase sa sega ni dokai.

13Era kauti ira na cauravou me ra qaqi sila;

kei ira na gone, era cola buka era sa bale.

14Ko ira na qase, era sa sega tale ni tiko mai na matamata-ni-koro;

ko ira na cauravou, era sa mudu ni qiri lali.

15Sa mudu na marau e na loma i keimami;

sa vuki me tagi na neimami meke.

16Sa lutu tani nai sala vakaturaga mai na ulu i keimami;

ulei koi keimami oqo, ni keimami sai valavala ca!

17E na vuku ni ka oqo sa bibi kina na loma i keimami;

e na vuku ni ka oqo sa butobuto kina na mata i keimami.

18E na vuku ni Ulunivanua ko Saioni, ni sa lala tu,

sa lako voli e delana na fokisi.

19Sai kemuni, Jiova, ka tiko ga ka tawa mudu;

kei na nomuni tikotiko vakaturaga mai nai tabatamata e dua ki nai tabatamata e dua.

20A cava ko ni sa guilecavi keimami kina ka tawa mudu,

ka sa biuti keimami vakadede sara?

21Mo ni vakalesui keimami vei kemuni, i Jiova, me keimami vakataudeitaki tale;

mo ni vakavouya tale mada na neimami gauna me vaka e na gauna eliu—

22ka vakavo ga kevaka ko ni sa biuti keimami vakadua,

ka sa cudruvi keimami vakasivia.