Josua 4 - Ai Vola Tabu (Vakadewa Makawa Vakavoutaki 2021)（FRV21）

Na Vatu ni Veivakananumi e Tinikarua

1Ia ni ra sa lakova oti na Joritani na matanitu taucoko, sa qai vosa vei Josua ko Jiova, ka kaya,

2“Mo lesia e le tinikarua na tamata mai vei ira na tamata, me tauyadua mai na veiyavusa,

3ka vakaroti ira, ka vakaoqo, ‘Dou kauta yani eke, e tinikarua na vatu, mai na loma ni Joritani, mai na tikina ka tudei kina na yavadra na bete, ka kauta vata kei kemudou ki na tai kadua, ka virinoca e na tikina dou na moce kina e na bogi oqo.’ ”

4A sa kaciva e le tinikarua na tamata ko Josua, ko ira ka lesia eliu ko koya mai vei ira na Isireli, me yadua na tamata mai na veiyavusa.

5A sa kaya vei ira ko Josua, “Ni liutaka na kato i Jiova na nomuni Kalou, ki loma ni Joritani, ka taura cake na tamata yadua e dua na vatu ka colata tu, me vaka nai wiliwili ni nodra veiyavusa na Isireli,

6ka me i vakatakilakila oqo vei kemuni. Ni gauna era na taroga kina na luvemuni e na gauna mai muri, ka kaya, ‘A cava na kenai balebale ni veivatu oqo vei kemuni?’

7ia mo ni qai kaya vei ira ni a muduki na kena drodro na wai na Joritani e na mata ni kato ni veiyalayalati i Jiova. Ni sa colati takoso e na Joritani, a sa muduki na drodro ni wai na Joritani. Sa yaco kina na veivatu oqo me kenai vakananumi vei ira na Isireli e na gauna kecega.”

8A sa kitaka vakaoqo ko ira na Isireli me vaka ka vakarota ko Josua, ka ra kauta e tinikarua na vatu mai na loma ni Joritani, me vaka ka kaya ko Jiova kivei Josua, me vaka nai wiliwili ni nodra veiyavusa na Isireli, ka ra a kauta ki na tai kadua, ki na tikina era moce kina, ka virinoca mai keri.

9Ia sa binia cake talega ko Josua e tinikarua na vatu e na loma ni Joritani, e na tikina ka tu kina na yavadra na bete ka colata na kato ni veiyalayalati; a sa tu mai kina ka yacova na siga oqo.

10A sa tu e na loma ni Joritani ko ira na bete ka colata na kato, me oti mada eliu na ka kece ka vakarota vei Josua ko Jiova me tukuna vei ira na tamata, me vaka na ka kecega ka kaya ko Mosese vei Josua. A ra sa lako vakatotolo na tamata ki tai kadua.

11Ia ni sa oti na tamata kecega ki tai kadua, sa qai colata ki tai kadua na kato i Jiova, ko ira na bete, me liutaki ira na tamata.

12Ia ko ira na yavusa i Rupeni, kei ira na yavusa i Kata, kei na yavusa-veimama i Manasa, era sa lako vakaiyaragi ka liutaki ira na Isireli, me vaka ka vosa vei ira ko Mosese.

13Era le vasagavulu beka na udolu sa vakaiyaragi ki nai valu, ka lako e na mata i Jiova ki tai kadua, ki na vanua veibuca mai Jeriko, me ra vala.

14E na siga ko ya sa vakalevulevui Josua kina ko Jiova e na matadra kecega na Isireli, ka ra rerevaki koya, e na veisiga kecega sa bula kina ko koya, me vaka era a rerevaki Mosese.

15A sa vosa vei Josua ko Jiova, ka kaya,

16“Mo vakaroti ira na bete era sa colata na kato ni vunau, me ra cabe cake mai na Joritani.”

17A sa vakaroti ira na bete ko Josua, ka kaya, “Dou cabe cake mai na Joritani.”

18Ia ni ra sa cabe cake mai na loma ni Joritani ko ira na bete ka colata na kato ni veiyalayalati i Jiova, ka sa butuka na qele mamaca na qeteqete ni yavadra na bete, sa qai lesu tale mai na wai ni Joritani ki na kena tikina, ka sa vuabale na batina kecega, me vaka eliu.

19A ra cabe cake mai na Joritani na tamata e na kenai katini ni siga e nai matai ni vula, ka ra tiko mai Kilikali, mai na yasana vaka ki na tokalau ki Jeriko.

20Ia na vatu e tinikarua ko ya, ka ra kauta mai na Joritani, sa binia ko Josua mai Kilikali.

21A sa vosa ko koya vei ira na Isireli, ka kaya, “Ni ra na tarogi kemuni na luvemuni e na gauna mai muri, ka kaya, ‘A cava nai balebale ni veivatu oqo?’

22mo ni qai vakatakila vei ira na luvemuni, ka kaya, ‘Era sa lako kosova oti na Joritani oqo ko ira na Isireli e na qele mamaca.’

23Ni sa vakadiva e matamuni ko Jiova na nomuni Kalou na wai ni Joritani, mo ni lako oti mada ki tai kadua, me vaka ka cakava ko Jiova na nomuni Kalou ki na Wasa Damudamu, ko ya ka vakadiva ko koya e matada me yacova ni da sa lako takoso oti ki tai kadua,

24me ra kila kina na lewe ni veivanua kecega ni sa kaukauwa na liga i Jiova, ka mo ni rerevaki Jiova kina na nomuni Kalou e na veigauna kecega.”