Aisea 3 - Ai Vola Tabu (Vakadewa Makawa Vakavoutaki 2021)（FRV21）

Sa Cudruvi ko Jerusalemi kei Juta

1Raica, na Turaga ko Jiova-ni-lewevuqa

sa kauta tani mai Jerusalemi kei Juta

na ka kece sara sa bula kina—

na madrai kecega sa bula kina,

kei na wai kecega sa bula kina—

2na tamata qaqa kei na tamata i valu,

na turaganilewa kei na parofita,

na daurairai kei na qase,

3na turaga-ni-valu ni lewe limasagavulu

kei koya na tamata sa vakaitutu cecere,

na lewe ni matabose kei na kena-dau ni daucaka mana

kei koya na kena-dau e na vosa.

4Ia ka'u na lesi ira na gone me nodra turaga,

ia na gone lalai ena lewai ira.

5A ra na dui ia na veivakasaurarataki

na tamata yadua vua e dua tale,

vua talega na kai nona;

era na cakacaka vakavosalevu na gone vua na qase,

kei na tamata tawa vanua vua na tamata turaga.

6E dua na tamata ena qai goleva na tacina

e na vale i tamana, ka kaya,

“Sa tu vei iko nai sulu;

mo neitou turaga mada,

ia na ca oqo mo vakatulewa ga kina.”

7E na siga ko ya ena dulaki liga mai ko koya, ka kaya,

“Au na sega ni dauveivakabulai;

ni sa sega na madrai se nai sulu e noqu vale;

dou kakua sara ni lesi au

me'u lewai ira na tamata.”

8Ni sa rusa ko Jerusalemi,

ka sa bale ko Juta,

ni sa duatani na nodra vosa kei na nodra i valavala vei Jiova,

ka vakararawataka na matana vakaiukuuku.

9Ai rairai ni matadra sa beitaki ira ni ra ca;

ia na nodra i valavala ca era sa vakavotuya me vakataki Sotoma,

era sa sega ni vunia.

Ena ca ko ira oqo!

Ni ra sa vakacacani ira vakataki ira ga.

10Dou kaya vua na yalododonu ena yaco ga vua na vinaka,

ni ra na kania na vua ni nodra i valavala.

11Ena ca ko ira na tamata ca! Ena yaco ga vua na ca,

na ka sa cakava na ligana ena caka talega vua.

12Na noqu tamata—era sa gone ga ko ira era sa vakasaurarataki ira,

ka sa lewai ira ko ira na yalewa.

Oi kemudou na noqu tamata, dou sa vakacalai vei ira na liutaki kemudou

ka vakacacana na sala ko ni sa lako kina.

13Sa tu mai ko Jiova me ia na veitotaki;

sa tu me lewai ira na tamata.

14Ena ia na lewa ko Jiova vei ira na qase ni nona tamata

kei iratou na nodra turaga:

Ni sai kemudou ka kania oti na loga-ni-vaini;

na ka sa kovea mai vei ira na dravudravua sa tu ga e na nomudou veivale.

15A cava dou sa butuki ira sobu kina na noqu tamata,

ka butuqaqia na matadra na dravudravua?

sa taroga na Turaga ko Jiova-ni-lewevuqa.

Ai Vakasala Vei Ira na Goneyalewa ni Saioni

16A sa kaya talega ko Jiova:

Ni ra sa qaciqacia na goneyalewa ni Saioni,

ka sa vakateqateqa na nodra i lakolako,

ka sa dauvere na matadra,

ka sa lako vakaivukivuki,

ka sa tataqiriqiri tu na vesa ni yavadra;

17o koya ena lewa kina na Turaga

me tubura na buradeladra na goneyalewa ni Saioni na mate,

ka na vakaluvawaletaki ira ko Jiova.

18E na siga ko ya ena luvata tani kina na Turaga na nodra vesa lagilagi, kei na lawa ni drau ni uludra, kei na nodra i taube civa;

19na sau ni daligadra, kei na qato, kei nai ubi,

20nai sala, kei na sinucodo ni vesa, kei nai vau, kei na tavaya ka boi vinaka, kei nai vakadaro ni ca,

21na mama, kei nai sau ni ucu;

22nai sulu vakaiukuuku, kei na curucuru, kei na sole, kei na taga ni lavo,

23na iloilo, kei nai sulu lineni matailalai, kei nai sala, kei nai ubi levu mamare.

24Ia ena yaco mei sosomi kei nai saluaki na ka e bona;

ka mei sosomi ni vau vakaiukuuku na dali;

kei nai sosomi ni ulu sa talitali vinaka na ulu cou;

kei nai sosomi ni i sulu sau levu nai sulu taga;

kei na madua mei sosomi ni matavinaka.

25A nomu tagane era na mate e nai seleiwau,

kei ira na nomu qaqa e nai valu.

26Ena levu na lele kei na vakaloloku e na nona matamata-ni-koro;

sa vakalalai tu, ka sa tiko sobu e na qele.