Emosi 1 - Ai Vola Tabu (Vakadewa Makawa Vakavoutaki 2021)（FRV21）

1 2Tui 15.1-7; 2Vei 26.1-23; 2Tui 14.23-29 A vosa i Emosi, e dua vei ira nai vakatawa ni sipi mai Tikoa, na ka sa raica ka sa baleti ira na Isireli, e na gauna i Usaia na tui Juta, kei na gauna i Jeropoama na luve i Joasa na tui Isireli, ni sa vo e rua na yabaki ka qai tavuki na vanua.

Na Nodra Cudruvi na Veimatanitu Era Vakavolivoliti Isireli

2 Joeli 3.16 A sa kaya ko koya:

“Ena kurukuru mai Saioni ko Jiova,

ia mai Jerusalemi, ena tabalaka na domona;

ena tagi kina na nodra i tikotiko nai vakatawa,

ka na malai na dela i Kameli.”

3 Aisea 17.1-3; Jere 49.23-27; Saka 9.1 Sa kaya vakaoqo ko Jiova:

“Ni sa qai vakatolu na talaidredre i Tamasiko,

io, ni sa vakava, ka'u na sega kina ni vakadaroya na kena cudruvi;

ka ni ra sa samuti Kiliati

e nai samu-yara kaukamea.

4Ia ka'u na biuta na bukawaqa ki na vale i Eseeli,

ena vakama na veivale vakaturaga mai Peni-etati.

5Au na musuka talega na bai mai Tamasiko,

ka muduki koya tani sa tiko mai na buca ko Eveni,

kei koya sa taura nai titoko vakaturaga mai Peci-iteni;

ka ra na kau vakabobula na kai Siria ki Kiri,”

sa kaya ko Jiova.

6 Aisea 14.29-31; Jere 47.1-7; Isi 25.15-17; Joeli 3.4-8; Sefa 2.4-7; Saka 9.5-7 Sa kaya vakaoqo ko Jiova:

“Ni sa qai vakatolu na talaidredre i Qasa,

io, ni sa vakava, ka'u na sega kina ni vakadaroya na kena cudruvi;

ka ni ra sa kauti ira kece vakabobula,

me ra soli ira yani ki Itomi.

7Ia ka'u na biuta na bukawaqa ki na bai mai Qasa,

ena vakama na kena veivale vakaturaga.

8Au na muduki koya tani sa tiko mai Asitoti,

kei koya sa taura nai titoko vakaturaga mai Asikiloni;

au na qai dodoka na ligaqu ki Ekironi,

ka ra na rusa ko ira na kena vo ni kai Filisitia,”

sa kaya na Turaga ko Jiova.

9 Aisea 23.1-18; Isi 26.1—28.19; Joeli 3.4-8; Saka 9.1-4; Maciu 11.21,22; Luke 10.13,14 Sa kaya vakaoqo ko Jiova:

“Ni sa qai vakatolu na talaidredre i Taia,

io, ni sa vakava, ka'u na sega kina ni vakadaroya na kena cudruvi;

ka ni ra sa soli ira kece me ra bobula ki Itomi,

ka sa sega ni nanuma na veiyalayalati vakaveitacini.

10Ia ka'u na biuta na bukawaqa ki na bai mai Taia,

sa na vakama na kena veivale vakaturaga.”

11 Aisea 34.5-17; 63.1-6; Jere 49.7-22; Isi 25.12-14; 35.1-15; Ope 1.1-14; Mala 1.2-5 Sa kaya vakaoqo ko Jiova:

“Ni sa qai vakatolu na talaidredre i Itomi,

io, ni sa vakava, ka'u na sega kina ni vakadaroya na kena cudruvi;

ni sa vakasavi koya na tacina e nai seleiwau,

ka sa bese ni yalololoma;

ka sa dauveibasuraki tiko e na nona cudru,

ia na nona yalo ca sa tu ga ka tawa mudu.

12Ia ka'u na biuta na bukawaqa ki Temani,

ka na vakama na veivale vakaturaga mai Posira.”

13 Jere 49.1-6; Isi 21.28-32; 25.1-7; Sefa 2.8-11 Sa kaya vakaoqo ko Jiova:

“Ni sa qai vakatolu na nodra talaidredre na kawa i Amoni,

io, ni sa vakava, ka'u na sega kina ni vakadaroya na nodra cudruvi;

ka ni ra sa dresulaki ira na yalewa ni Kiliati era bukete tiko,

me ra toroya yani nai yalayala ni nodra vanua.

14Ia ka'u na vakawaqaca na buka e na bai mai Rapa,

ka na vakama na kena veivale vakaturaga,

ka ia vata kei na kaila e na siga ni valu,

kei na cava e na siga ni covulaca;

15ena vakabobulataki talega na nodra tui,

o koya vata kei na nona tamata turaga,”

sa kaya ko Jiova.