2 Timoci 1 - Ai Vola Tabu (Vakadewa Makawa Vakavoutaki 2021)（FRV21）

1Koi au ko Paula, nai apositolo i Karisito Jisu e na lewa ni Kalou, e na vuku ni bula ka yalataki, sa tu vei Karisito Jisu,

2 Caka 16.1 Kivei Timoci, na noqu gone ni toko:

Me nomu na loloma, na yalololoma, kei na vakacegu mai vua na Kalou ko Tamada kei Karisito Jisu na noda Turaga.

Na Vakavinavinaka kei na Veivakayaloqaqataki

3Au sa vakavinavinaka vua na Kalou—o koya ka'u sa qarava e na yalodina me vaka na nodra i valavala na qase eliu—ni'u sa daunanumi iko wasoma e na noqu masu e na bogi kei na siga.

4Au sa gadreva vakalevu me'u raici iko, ni'u sa nanuma na wai ni matamu, me'u vakasinaiti kina e na reki.

5Caka 16.1Ni'u sa vakananumi e na vakabauta dina sara sa tu vei iko, ka tu eliu vei Loi na bumu, vei Unaisi talega na tinamu, au sa dinata sa tu talega vei iko.

6O koya oqo ka'u sa vakananumi iko kina mo uqeta nai solisoli ni Kalou sa yaco vei iko e na veitabaki ni ligaqu,

7ni sa sega ni solia mai vei keda na Kalou na yalo ni rere, a yalo ni kaukauwa ga, kei na loloma, kei na yalomatua.

8O koya mo qai kakua ni maduataka na kenai tukutuku ni noda Turaga, se koi au na nona tamata sa vesu tu, ia mo vosota na veivakararawataki e na vuku ni tukutuku-vinaka me vaka na kaukauwa ni Kalou,

9o koya sa vakabulai keda, ka sa kacivi keda me da yalosavasava, a sa sega ga e na vuku ni noda cakacaka, e na vuku ni sa nona i naki ga kei na loloma walega ka soli vei keda eliu, e na vuku i Karisito Jisu ni bera ni vakatekivutaki ko vuravura,

10ia ka sa qai vakaraitaki mai ni sa rairai mai na noda i Vakabula ko Karisito Jisu, o koya sa vakaotia na mate, ka vakavotuya na bula kei na tawa mate rawa e nai tukutuku-vinaka.

111Timo 2.7E na vuku ni tukutuku-vinaka, au a lesi kina me'u dauvunau, me'u apositolo talega, kei na nodra i vakavuvuli na veimatanitu,

12o koya talega ka'u sa vosota kina na veika oqo. Ia ka'u sa sega ni madua kina, ni'u sa kilai koya ka'u a vakararavi kina, ia ka'u sa kila dina sara ni sa rawata ko koya me maroroya na ka ka'u sa solia vua ka yacova na siga ko ya.

13Mo taura matua nai vakarau ni vosa dina ko a rogoca mai vei au, e na vakabauti Karisito Jisu kei na loloma.

14A ka vinaka sa soli vei iko mo taura matua, ni sa vukei iko na Yalo Tabu sa tu vei keda.

15A ka oqo ko sa kila, ni sa biuti au ko ira kecega na kai Esia, sa vakakina ko Faijelo kei Erimojini.

16Me yalololoma mada na Turaga ki na vuvale i Onisivoro, ni sa vakacegui au wasoma ka sa sega ni maduataki au ni'u sa vesu tu;

17ia ni sa tiko mai Roma, sa vakasaqarai au matua, ka sa kunei au

18—me solia mada vei koya na Turaga me kune yalololoma mai vua na Turaga e na siga ko ya! Ka ko sa kila vinaka sara na kena levu ni ka sa qaravi au kina ko koya mai Efeso.