1 Veigauna 22 - Ai Vola Tabu (Vakadewa Makawa Vakavoutaki 2021)（FRV21）

Nai Tuvatuva Vakarautaki ni Vale i Jiova

1Sa qai kaya ko Tevita, “Oqo na vale i Jiova na Kalou, oqo talega nai cabocabo-ni-soro kama nei Isireli.”

Sa Vakavakarau ko Tevita ki na Tara ni Valenisoro

2A sa vakarota ko Tevita me ra sa vakasoqoni vata ko ira na vulagi sa tiko e na nodra vanua na Isireli, a sa lesia eso na matai ni vatu, me taya na veivatu sa vakarautaki me tara kina na vale ni Kalou.

3A sa vakarautaka vakalevu ko Tevita na kaukamea mei vako ni sogo ni matamata-ni-koro kei nai sema; sa ka levu talega na parasa, sa sega ni vakatovolei na kena bibi;

4na vu ni sitari talega sa sega ni wili na kena levu—ni sa ka levu na vu ni sitari era sa kauta tiko mai kivei Tevita ko ira na kai Saitoni kei ira na kai Taia.

5A sa kaya ko Tevita, “Sa gone ga ka malumalumu ko Solomoni na luvequ tagane, ia na vale ena caka me nei Jiova, ena vakaiukuukutaki vakaidina, me rogo ka lagilagi e na veivanua kecega. Au na vakarautaka na ka me yaga kina.” A sa vakarautaka vakalevu kina ko Tevita ni se bera na nona mate.

Sa Vakaroti Solomoni kei Ira na Qase ni Isireli ko Tevita

6Sa qai kacivi Solomoni na luvena, ka vakaroti koya me tara e dua na vale me nei Jiova na nodra Kalou na Isireli.

72Samu 7.1-16; 1Vei 17.1-14A sa kaya vei Solomoni ko Tevita, “Na luvequ, sa tu e lomaqu me'u tara e dua na vale ki na yaca i Jiova na noqu Kalou.

8Ia sa yaco mai vei au na vosa i Jiova, ka vaka, ‘Ko a vakadavea vakalevu na dra, ka dauia nai valu levu. Ko na sega ni tara na vale ki na yacaqu, ni sa levu na dra ko sa vakadavea ki na soso e mataqu.

9Raica, ena sucu mai e dua na luvemu tagane, ena tamata ni tiko veisaututaki ko koya. Ia ka'u na solia vua me tiko vakacegu vata kei ira kecega na nona meca e vakavolivolita; ia ena yacana ko Solomoni, ia ka'u na solia na vakacegu kei na vakadigagalu kivei ira na Isireli e na nona gauna.

10Ena tara na vale ki na yacaqu ko koya; ena luvequ talega ko koya, ia ka'u na tamana koi au; au na vakataudeitaka talega nai tikotiko vakaturaga ni nona matanitu vei ira na Isireli ka me tawa mudu.’

11“Ia, na luvequ, me tiko vata kei iko ko Jiova; ia mo cakacaka yaco, ka mo tara na nona vale ko Jiova na nomu Kalou, me vaka na nona vosa me baleti iko.

12Me solia ga vei iko ko Jiova na vuku kei na yalomatua, ka vakaroti iko e na vukudra na Isireli, mo muria rawa na vunau i Jiova na nomu Kalou.

13Josua 1.6-9O na qai tamata yaco, kevaka ko sa vakananuma ka cakava nai lesilesi kei na lewa sa vakarota ko Jiova kivei Mosese e na vukudra na Isireli. Mo kaukauwa ga, ka yalodoudou. Kakua ni rere, se taqaya.

14Ia, raica, au sa vakarautaka ni'u sa rarawa tiko, me yaga ki na nona vale ko Jiova, na koula e dua na drau na udolu na taledi, kei na siliva sa udolu vakaudolu na taledi; kei na parasa kei na kaukamea sa sega ni kilai na kena bibi, ni sa ka levu sara; na kau talega, kei na vatu, au sa vakarautaka. Ia mo kuria ga oqori.

15Sa lewe vuqa talega na tamata cakacaka sa tiko kei iko, ko ira na dautata, kei ira na matai ni vatu kei na kau, kei na tamata vuku e na cakacaka kecega.

16Sa sega ni wili na koula, na siliva, kei na parasa, kei na kaukamea. Mo ia ga, ka cakacaka, ka me tiko vata kei iko ko Jiova.”

17Sa vakarota talega ko Tevita vei ira kecega na nodra turaga na Isireli, me ra vukei Solomoni na luvena, ka vaka,

18“Sa sega li ni tiko vata kei kemudou ko Jiova na nomudou Kalou? Ka sa sega li ni vakasaututaki kemudou e na veiyasana kecega? Ni sa soli ira oti na lewe-ni-vanua ki na ligaqu; ka sa vakamalumalumutaki na vanua e na mata i Jiova, kei na matadra na nona tamata.

19Dou qai vagolea na lomamudou kei na yalomudou me vakasaqarai Jiova na nomudou Kalou, ka mo dou ia, ka tara na nona vale tabu ko Jiova na Kalou, me kau rawa mai kina na kato ni veiyalayalati i Jiova, kei nai yaya tabu ni Kalou, ki loma ni vale ena tara ki na yaca i Jiova.”