1Sa oti na veika oqo, sa dua na loga-ni-vaini nei Nepoci na kai Jesireli, ka tiko mai Jesireli, ka sa voleka ki na vale vakaturaga i Eapi na tui Samaria.
2A sa vosa vei Nepoci ko Eapi, ka kaya, “Mo solia vei au na nomu loga-ni-vaini, me noqu were ni kakana draunikau, ka ni sa voleka ki na noqu vale; ia ka'u na solia vei iko me kenai sau e dua na loga-ni-vaini e vinaka cake; ia kevaka ko sa vinakata me kenai voli nai lavo, ka'u na solia vei iko.”
3Ia sa kaya vei Eapi ko Nepoci, “Me kakua sara vei au e na vuku i Jiova, me'u solia vei iko na nodra i votavota na noqu qase.”
4A sa la'ki curu ki nona vale ko Eapi, ka sa yalo bibi ka yalo ca e na vuku ni vosa ka tukuna vua ko Nepoci na kai Jesireli, ni sa kaya ko koya, “Au na sega ni solia vei iko na nodra i votavota na noqu qase.” A sa davo sobu e na nona i mocemoce, ka vagolea tani na matana, ka sa bese ni kana.
5A sa lako mai vua ko Jesipeli na watina, ka kaya vua, “A cava e rarawa kina na lomamu, ka ko sa sega kina ni kana?”
6A sa kaya vua ko koya, “Ni ka'u a vosa vei Nepoci na kai Jesireli, ka kaya vua, ‘Mo solia vei au na nomu loga-ni-vaini me kenai sau nai lavo, ia kevaka ko sa vinakata, ka'u na solia vei iko e dua na loga-ni-vaini me kenai sau.’ A sa kaya ko koya, ‘Au na sega ni solia vei iko na noqu loga-ni-vaini.’ ”
7A sa kaya vua ko Jesipeli na watina, “O iko, ko sa sega li ni vakatulewa tiko e Isireli edaidai? Mo tucake mo kana, ka me marau na yalomu; koi au, au na solia vei iko na loga-ni-vaini nei Nepoci na kai Jesireli.”
8A sa vola ko Jesipeli e dua nai vola e na yaca i Eapi, ka dregata ka tabaka e na nona mama, ka vakauta nai vola kivei ira na qase kei ira na tamata turaga e na nona koro ka ra tiko vata kei Nepoci.
9A sa vola ko koya e nai vola, ka kaya, “Dou kacivaka e dua na lolo, ka vakatikori Nepoci e na tikina cecere vei ira na tamata.
10Ka dou lesia e le rua na tamata ka rau luve ni vu-ni-ca me tu e matana, ka me rau beitaki koya, ka kaya, ‘Ko sa vosavakacacataka na Kalou kei na tui.’ Ia dou qai kauti koya ki nai bili, ka vakavirika e na vatu, me mate sara ko koya.”
11Ia ko ira na nona lewe ni koro, kei ira na qase vata kei ira na tamata turaga era tiko e nona koro, era sa cakava me vaka sa talaki kina vei ira ko Jesipeli. Me vaka sa volai e nai vola ka vakauta vei ira ko koya,
12esa kacivaka e dua na lolo, ka vakatikori Nepoci e na tikina cecere vei ira na tamata.
13A rau sa qai curu yani na le rua na tamata ka rau luve ni vu-ni-ca, ka rau sa dabe e matana. Ka rau sa beitaki Nepoci koi rau na tamata ca e na matadra na tamata, ka rau kaya, “Sa vosavakacacataka na Kalou kei na tui ko Nepoci.” Era sa qai kauti koya ki nai bili ni koro, ka vakavirika e na vatu, ka sa mate kina ko koya.
14Era sa qai talaki vei Jesipeli, ka kaya, “Sa lauviri e na vatu ko Nepoci, ka sa mate ko koya.”
15Ia ni sa rogoca ko Jesipeli sa lauviri e na vatu ko Nepoci, ka sa mate, sa kaya vei Eapi ko Jesipeli, “Mo ia, mo la'ki taukena na loga-ni-vaini nei Nepoci na kai Jesireli, ko ya ka bese ni solia vei iko me kenai sau nai lavo; ni sa sega ni bula ko Nepoci, sa mate ga.”
16Ia ni sa rogoca ko Eapi sa mate ko Nepoci, sa ia ko Eapi me lako sobu ki na loga-ni-vaini i Nepoci na kai Jesireli, ka me taukena.
Sa Vakatauca ko Ilaijia na Lewa ni Kalou17A sa yaco vei Ilaijia na kai Tisipa na vosa i Jiova, ka vaka,
18“Mo ia, mo lako sobu mo tavaki Eapi na tui Isireli, o koya sa tiko mai Samaria; raica, sa tiko e na loga-ni-vaini i Nepoci, ko ya sa lako sobu kina me taukena.
19Ia mo vosa vua, ka kaya, ‘Sa vosa vakaoqo ko Jiova, “O sa ia oti na veivakamatei, ka qai lako mo taukena talega, oi?” ’ Ia mo vosa vua, ka kaya, ‘Sa kaya vakaoqo ko Jiova, “E na tikina era a dramica kina na dra i Nepoci na koli, era na dramica talega kina na nomu dra ko ira na koli, io na nomu dra.” ’ ”
20A sa kaya vei Ilaijia ko Eapi, “O sa kunei au beka, ko iko na noqu meca?” A sa kaya ko koya, “Io, au sa kunei iko, ni ko sa volitaki iko mo caka ca e na mata i Jiova.
21Raica, ka'u na vakayacora na ca vei iko, ka kauta tani na nomu kawa, ka muduka tani vei Eapi na tagane kecega, ko koya sa sogolati, kei koya sa lako voli, vei ira na Isireli.
22Ia ka'u na cakava na nomu vale me tautauvata kei na vale i Jeropoama, na luve i Nipati, ka tautauvata kei na vale i Pasa, na luve i Eaija, e na vuku ni nomu i valavala ko sa vakacudrui au kina, ka sa vakaivalavalacataki ira na Isireli.
232Tui 9.36Ia e na vuku i Jesipeli, sa vosa ko Jiova, ka kaya, ‘Ena kani Jesipeli mai na bai ni Jesireli ko ira na koli.’
24O koya sa mate vei Eapi e na koro, ena kania ko ira na koli; kei koya sa mate e na were, ena kania ko ira na manumanu vuka.”
25(Ia ka sa sega e dua me tautauvata kei Eapi, me volitaki koya me caka ca e na mata i Jiova, o koya ka vakauqeta ko Jesipeli na watina.
26A sa kitaka na ka vakasisila sara ko koya, ni sa muria na veimatakau, me vaka na ka kecega sa cakava ko ira na Amoraiti, o ira ka vakaseva ko Jiova e matadra na Isireli.)
27Ia ni sa rogoca na vosa oqo ko Eapi, sa dresulaka na nona i sulu, ka vakaisulutaki koya e nai sulu taga, ka lolo, ka koto e nai sulu taga, ka lako voli vakamalumalumu.
28A sa yaco mai na vosa i Jiova vei Ilaijia na kai Tisipa, ka kaya,
29“O sa raica, se segai, ni sa vakayalomalumalumutaki koya vei au ko Eapi? Ka me vaka ni sa vakayalomalumalumutaki koya vei au, ka'u na sega ni vakayacora kina na ca e na nona gauna; ia e na gauna ga nei luvena ka'u na qai vakayacora na ca vei ira na nona lewe-ni-vuvale.”
Who We AreWhat We EelieveWhat We Do
2025 by iamachristian.org,Inc All rights reserved.
