Jope 31 - Ai Vola Tabu (Vakadewa Makawa Vakavoutaki 2021)（FRV21）

Nai Otioti ni Kerekere nei Jope

1“Au sa ia oti na veiyalayalati kei na mataqu;

me'u na qai vakaraica vakacava li e dua na goneyalewa?

2Me qai cava na noqu i votavota mai vua na Kalou mai lagi,

ka cava na ka ka'u na taukena mai vei Koya sa Kaukauwa mai cake?

3Sa sega beka ni yacovi ira nai valavala ca na rusa,

kei na cudruvi sa duatani vei ira sa cakava nai valavala ca?

4Sa sega beka ni raica na noqu i lakolako ko koya,

ka wilika kecega nai cavucavu ni yavaqu?

5“Kevaka ka'u a muria na ka lasu,

ka sa kusarawa na yavaqu me'u ia na veivakaisini—

6me'u qai vakatovolei mada e nai vakarau dodonu,

ka me kila na Kalou ni'u sa sega ni cala!—

7kevaka sa vakatikitiki tani mai na sala na yavaqu,

ka sa muria na mataqu na lomaqu,

ka kevaka sa kabita na ligaqu e dua na ka qeleqelewa;

8me'u qai teitei koi au, ka dua tale me kania;

ka me cavuivuvu na veika sa bula e na vukuqu.

9“Kevaka sa gole vakatani na lomaqu vua e dua na yalewa,

ka'u sa wawa vakavuni koto mai na nona katuba na kai noqu,

10me qai qaqi sila na watiqu vua e dua tale,

ka me ra koto vata kaya ko ira na tani.

11Ni sa dua na cala levu sara oqo;

io, nai valavala ca me cudruva na mataveilewai;

12ni oqori sa vaka na bukawaqa sa kama sobu ki Eli,

ka na kama rusa kece kina na noqu i yau.

13“Kevaka ka'u a beca na noqu tamata se na noqu vada,

ni rau sa veileti kei au;

14ka'u na qai vakaevei ni sa tucake na Kalou?

Ia ni sa cudru ko koya, a cava me'u kaya vua?

15Ko koya sa buli au e na kete, sa sega beka ni buli koya talega?

Sa sega beka ni duabau ga sa vakatuburi keirau e na kete?

16“Kevaka ka'u sa bese ni solia na ka era gadreva na dravudravua,

se vakavuna me vakaleqai na matana na yada,

17se'u kania duadua na qau tiki ni kakana,

ka sa sega ni kana kina na luveniyali—

18ni sa tubu vata kei au na luveniyali mai na gauna ka'u a cauravou kina, me vaka sa tubu kei tamana,

ia ka'u sa tuberi koya na yada mai na siga ka'u a sucu kina—

19kevaka ka'u sa kunea e dua sa mate ni sa sega na nona i sulu,

se dua na dravudravua sa sega na ka me tutuvitaki kina,

20kevaka sa sega ni vosavakalougatataki au na yagona,

ka sega ni katakata ko koya e na vutika ni noqu sipi,

21kevaka ka'u sa dodoka cake vakaca na ligaqu vei ira na luveniyali,

ni'u sa kila sa tiko na noqu kaukauwa mai na matamata-ni-koro,

22me qai lutu tani na ligaqu mai na civaciva ni tabaqu,

ka me ramusu na ligaqu mai na suina.

23Ni'u a domobula de vakarusai au na Kalou,

ni sa cecere cake ko koya ka'u sa sega ni rawata e dua na ka.

24“Kevaka ka'u a vakararavi ki na koula,

se'u kaya ki na koula talei, ‘Ka'u sa vakadinati iko’;

25kevaka ka'u a reki ni'u sa vutuniyau sara,

se sa rawata nai yau levu na ligaqu,

26kevaka ka'u a raica na mata-ni-siga ni sa cila mai,

se na vula ni sa totoka vakaoti na nona i tosotoso,

27ka ni sa veretaki lo na lomaqu,

ka sa reguca na ligaqu na gusuqu,

28oqo talega nai valavala ca me cudruva na mataveilewai,

n'u a qai cakitaki koya na Kalou mai cake.

29“Kevaka ka'u a reki ni sa rusa ko koya sa cati au,

se vakalevulevui au ni sa kune ka ca ko koya—

30ia ka'u a sega ni laiva na gusuqu me vosa cala,

ni'u a vatonaka na yalona—

31kevaka era sa sega ni kaya ko ira e na nona vale,

‘Ko cei sa kunea e dua e sega ni vakamamautaki e na kena kakana?’

32(sa sega ni moce e na gaunisala na vulagi;

au sa dolava na noqu vale vua sa dauveilakoyaki),

33kevaka ka'u sa vunia na noqu talaidredre me vakataki Atama,

ni'u sa vunia na noqu i valavala ca e lomaserequ,

34ni'u sa rerevaki ira na lewe vuqa,

ka sa vakadomobulataki au na nodra be na veimataqali,

me'u tiko lo kina, ka sega ni curu yani ki tautuba—

35Isa, me dua mada me rogoci au!

(Sai koya oqo na noqu saini! Me vosa mada mai vei au ko Koya sa Kaukauwa!)

Isa, sa vola talega e dua nai vola ni veibeitaki na noqu meca!

36Sa dina sara ni'u na colata e na usouso ni tabaqu,

ka'u na vauca vei au me vaka nai sala vakaturaga.

37Ka'u na qai tukuna vua nai wiliwili ni cavucavu ni yavaqu;

ka'u na toro voleka vua me vaka na luve ni tui.

38“Kevaka sa beitaki au na noqu vanua

ka sa tagi vata kei na kenai yatu qele ni teitei,

39kevaka ka'u sa kania na vuana ka sega ni volia,

ka vakavuna na nodra mate na kenai taukei,

40me qai tubu na kau votovotoa ka sega ni witi,

kei na co ca ka sega ni barile.

Sa qai oti na vosa i Jope.