1 1Vei 16.34; 2Vei 5.13; 2Vei 7.3; Esera 3.11; Same 100.5; Same 106.1; Same 118.1; Same 136.1; Jere 33.11 Dou ia vei Jiova na vakavinavinaka, ni sa yalovinaka ko koya;
ni sa sega ni mudu na nona loloma.
2Me ra kaya vakakina ko ira sa vakabulai ira oti ko Jiova,
o ira sa vakabula oti ko koya mai na liga ni meca
3ka sa soqoni ira vata mai na veivanua,
mai na tokalau, mai na ra talega,
mai na mata ni vualiku, kei na mata ni ceva.
4Era a lako sese voli e na vanua lala e na sala e sega ni lakovi,
era sega ni kunea na koro me ra tiko kina;
5a ra sa viakana ka viagunu,
ka sa waicala e lomadra na yalodra.
6Era sa qai tagi vei Jiova e na nodra rarawa,
ka sa vakabulai ira mai na nodra rarawa.
7Sa tuberi ira e na sala dodonu,
me ra lako ki na koro me ra tiko kina.
8Me ra ia mada na vakavinavinaka vei Jiova e na vuku ni nona yalololoma,
kei na nona cakacaka mana vei ira na luve ni tamata!
9Ni sa vakamamautaka na yalo sa daugagadre,
ka vakamamautaka na yalo e viakana e na ka vinaka.
10O ira era sa tiko e na butobuto kei na yaloyalo ni mate,
ni ra sa vesuki e na rarawa kei na kaukamea;
11ni ra sa talaidredre ki na vosa ni Kalou,
ka ra beca nai vakavuvuli i Koya sa Cecere Sara.
12O koya sa vakamalumalumutaka kina na lomadra e na cakacaka bibi;
era bale sobu, ka sa sega e dua me vukei ira.
13Era sa qai tagi vei Jiova e na nodra vakaloloma,
ka sa vakabulai ira mai na nodra rarawa.
14Sa kauti ira tani mai na butobuto kei na yaloyalo ni mate,
ka musulaka na kedrai vesu.
15Me ra ia mada na vakavinavinaka vei Jiova e na vuku ni nona yalololoma,
kei na nona cakacaka mana vei ira na luve ni tamata!
16Ni sa musulaka nai sogo ni matamata-ni-koro parasa,
ka tamusuka laivi nai sogo-lawalawa kaukamea.
17Na tamata lialia, e na vuku ni nodra talaidredre,
kei na nodra i valavala ca, era sa tauvi mate.
18Sa cata na kakana kecega na lomadra;
a ra sa torova na matamata-ni-koro ni mate.
19Era sa qai tagi vei Jiova e na nodra rarawa,
ka sa vakabulai ira mai na nodra vakaloloma.
20Sa tala na nona vosa, ka vakabulai ira,
ka kauti ira tani mai na ka era rusa kina.
21Me ra ia mada na vakavinavinaka vei Jiova e na vuku ni nona yalololoma,
kei na nona cakacaka mana vei ira na luve ni tamata!
22Ia me ra cabora nai madrali ni vakamolimoli,
ka marau ni ra tukuna na nona cakacaka.
23O ira era sa soko voli e na wasawasa e na waqa vanua,
ka kitaka na nodra cakacaka e na wai levu;
24o ira oqo era raica na cakacaka i Jiova,
kei na nona ka e veivakurabuitaki e na wai titobu.
25Ni sa vosa ko koya, ka vakayacora mai na cava,
ka sa tubu kina na kena biau.
26Era sa lako cake ki lomalagi, era sa lako sobu vakatitobu sara;
sa waicala na lomadra e na nodra tiko vakaca.
27Era suaigelegele ka yatayata me vaka na tamata sa mateni,
a ra sa leqa sara.
28Era sa qai tagi vei Jiova e na nodra rarawa,
ka sa vakabulai ira mai na nodra vakaloloma.
29Sa vakaruruya na cava,
ka sa vakamaravutaka na kena biau.
30Era sa qai marau ni ra sa vakacegu rawa;
ka sa kauti ira ko koya ki na toba era via tiko kina.
31Me ra ia mada na vakavinavinaka vei Jiova e na vuku ni nona yalololoma,
kei na nona cakacaka mana vei ira na luve ni tamata!
32Me ra vakalevulevui koya talega e na nodra i soqosoqo na tamata,
ka vakavinavinaka vua e na nodra tiko vata na qase.
33Sa vukica ko koya na uciwai me vanua dravuisiga,
kei na vanua vakavurevure wai me vanua maca sara;
34kei na vanua bulabula me vanua dravuisiga,
e na vuku ni nodra ca era tiko kina.
35Sa vukica na vanua dravuisiga me vanua veitobu wai,
kei na vanua maca me vanua dauvakavure wai.
36Ka sa lewa me ra tiko kina ko ira era dausiga,
me ra tara kina na koro me ra tiko kina;
37ka kaburaka na sila e na veiwere, ka tea na veiloga-ni-vaini,
me vuataka rawa na kena vuata.
38Ka sa vakalougatataki ira talega, ka ra sa vakalewevuqataki vakalevu;
ka sa sega ni vakalailaitaka na nodra manumanu.
39Ia era sa qai vakalailaitaki tale, ka vakamalumalumutaki
e na veivakasaurarataki, kei na tauvi mate, kei na ka rarawa.
40Sa beci ira vakalevu na turaga ko koya,
ka sa vakasevi ira me ra lako sese e na vanua lala, sa sega kina na sala.
41Sa vueta cake na dravudravua mai na ka rarawa,
ka sa cakava me vakamataqali me vaka na qele ni sipi.
42Ena raica, ka reki, ko ira na yalododonu;
ia ena galu nai valavala ca kecega.
43Ko ira era sa vuku, ka vakanananu ki na veika oqo,
era na kila na yalololoma i Jiova.
Who We AreWhat We EelieveWhat We Do
2025 by iamachristian.org,Inc All rights reserved.
