Same 61 - Ai Vola Tabu (Vakadewa Makawa Vakavoutaki 2021)（FRV21）

Vakataudeitaki Na Nona Veimaroroi na Kalou Vua nai liuliu: kei nai yaya ni vakatagi vaka-wa. A nei Tevita.

1Mo ni rogoca, na Kalou, na noqu tagi;

ni vakarorogo ki na noqu masu.

2Ni sa luvuci na lomaqu,

ka'u na tagi vei kemuni mai nai yalayala kei vuravura.

Mo ni tuberi au ki na uluvatu

sa cecere vei au;

3ni kemuni sa noqu i vakaruru eliu,

na noqu koro kaukauwa, mai vua na meca.

4Au na tiko ga e na nomuni vale ka sega ni mudu,

au na vakararavi e na ruku ni tabamuni. Sela

5Ni kemuni sa rogoca oti, na Kalou, na noqu bubului;

ko ni sa solia vei au na nodra i votavota era rerevaki kemuni.

6O ni na vakabalavutaka na nona bula na tui;

kei na nona yabaki, ena vaka nai tabatamata e vuqa.

7Ena tiko ga e na mata ni Kalou ka sega ni mudu;

mo ni vakayacora na loloma kei na dina, me rau vakabulai koya tiko.

8Me'u vakacaucautaka kina na yacamuni ka sega ni mudu,

me'u vakayacora kina e na veisiga na ka ka'u sa bubului kina.