Dauveilewai 16 - Ai Vola Tabu (Vakadewa Makawa Vakavoutaki 2021)（FRV21）

Ko Samisoni kei Tilaila

1A sa lako ki Qasa ko Samisoni, ka raica kina e dua na yalewa dautagane, ka sa curu vua.

2Sa tukuni vei ira na kai Qasa, “Sa lako mai ki ke ko Samisoni.” A ra sa vakavolivolita, ka vuni me ra waraki koya koto e na bogi ka sigavaka mai na matamata-ni-koro. A ra sa tiko lo e na bogi, ka kaya, “Me da waraka me yacova ni sa rarama cake na mataka; eda na qai vakamatei koya.”

3Ia sa davo koto ko Samisoni me yacova ga na lomaloma ni bogi. Ia ni sa lomaloma ni bogi sa cavu tu, ka taura nai sogo ni matamata-ni-koro, kei na kena duru ruarua, ka cavuta tani, kei nai sogo-lawalawa talega, ka viria ki na nona i colacola, ka colata cake ki na dela ni ulunivanua sa donui Epironi.

4Ia e muri, sa lomana ko koya e dua na yalewa, na yacana ko Tilaila, mai na buca ko Soreki.

5A ra sa lako cake mai vua ko ira na turaga ni kai Filisitia, ka kaya vua, “Mo temaki koya, mo kila kina se cava na vu ni nona kaukauwa levu, ka cava na ka keitou na rawai koya kina, me keitou vesuki koya ka vakamalumalumutaka. Ia koi keitou yadua keitou na solia vei iko e dua na udolu ka dua na drau na tiki ni siliva.”

6A sa kaya vei Samisoni ko Tilaila, “Mo tukuna mada vei au, se cava ka vu ni nomu kaukauwa levu, ka cava ko na vesuki rawa kina mo malumalumu mai.”

7A sa kaya vua ko Samisoni, “Kevaka era sa vesuki au e na dali vau drokadroka e vitu, sa segai ni sigani oti, au na qai malumalumu, ka'u na tautauvata kei na tamata walega.”

8A ra sa kauta vei Tilaila ko ira na turaga ni kai Filisitia e vitu na dali vau drokadroka, sa sega ni sigani oti, a sa vesuki koya kina ko koya.

9Ia ni ra sa tiko e na vale ni moce eso era vuni ka wawa koto, a sa kaya vua ko Tilaila, “I Samisoni, era sa sikiti iko na kai Filisitia!” A sa drutia na dali vau ko koya, me vaka sa drutilaki na wavulovulo ni sa coroga na bukawaqa. A sa sega kina ni kilai na ka vuni ni nona kaukauwa.

10A sa kaya vei Samisoni ko Tilaila, “Raica, ko sa vakalialiai au ga, ka vosa lasu vei au. Mo tukuna mada mai vei au oqo se cava ko na vesuki rawa kina.”

11A sa kaya vua ko koya, “Kevaka era sa vesuki au e na dali vou eso, sa sega ni taurivaki oti, au na qai malumalumu, ka'u na tautauvata kei na tamata walega.”

12A sa kauta eso na dali vou ko Tilaila, ka vauci koya kina, ka kaya vua, “I Samisoni, era sa sikiti iko na kai Filisitia!” (A ra sa tiko e na vale ni moce ko ira sa vuni ka wawa koto.) Ia sa drutilaka ga ko koya na dali mai na ligana me vaka na wa ni culacula.

13A sa kaya vei Samisoni ko Tilaila, “O sa vakalialiai au tikoga, ka yacova na siga oqo, ka vosa lasu vei au. Mo tukuna mada vei au se cava ko na vauci rawa kina.” A sa kaya vua ko koya, “Kevaka ko sa talia vata kei na vulovulo na tobe vituvitu ni uluqu, ka vakadreta vakaukauwa e na pini, au na qai malumalumu, ka'u na tautauvata kei na tamata walega.”

14Ni sa moce ko Samisoni, a sa taura na vitu na tobe ni uluna ko Tilaila ka talia vata na vulovulo ka vakadreta e na pini, ka kaya vua, “I Samisoni, era sa sikiti iko na kai Filisitia!” A sa yadra cake mai na nona moce ko koya, ka dreta tani na pini, kei na vulovulo, kei na tobe.

15A sa kaya vua na yalewa, “O sa kaya vakacava, ‘Au sa lomani iko’, ni sa sega ni tiko dina vei au na yalomu? O sa vakalialiai au vakatolu, ka sa sega ni tukuna mai vei au se na cava na vu ni nomu kaukauwa levu.”

16Ia ni sa vakasosataki koya e na veisiga kecega ko koya e na nona vosa, ka cikevi koya matua sara, a sa voleka ni ciba kina ko koya.

17Sa qai tukuna vua ko koya na yalona taucoko, ka kaya vua, “Sa sega nai tasi sa tara na uluqu, ni'u sa tawasei me nona na Kalou mai na kete i tinaqu. Kevaka ka'u sa tasivori, ena qai yali kina vei au na noqu kaukauwa; ia ka'u na malumalumu mai, ka'u na qai tautauvata kei na tamata walega.”

18Ia ni sa kunea ko Tilaila ni sa tukuna vua ko koya na yalona taucoko, sa talaki me kacivi ira na turaga ni kai Filisitia, ka kaya, “Dou lako tale mada mai vakadua, ni sa qai tukuna vei au ko koya na yalona taucoko.” A ra sa lako cake vua ko ira na turaga ni kai Filisitia, ka kauta mai nai lavo e na ligadra.

19A sa vakamoceri koya e na duruna ko koya. A sa kaciva e dua na tamata, ka tasia na tobe vituvitu ni uluna, ka sa vakatekivu me vakamalumalumutaki koya, ka sa lako tani vua na nona kaukauwa.

20A sa kaya ko koya, “I Samisoni, era sa sikiti iko na kai Filisitia.” A sa yadra mai na nona moce ko koya, ka kaya, “Au na lako ga yani me vaka ka'u sa daukitaka, ka kureitaki au meu galala kina.” Ia sa sega ni kila ko koya ni sa biuti koya ko Jiova.

21A ra sa tauri koya ko ira na kai Filisitia ka leuta na matana, ka kauti koya sobu ki Qasa, ka vesuka e nai vesu parasa; a sa dauqaqi sila ko koya e na valeniveivesu.

22Ia sa tekivu me tubu tale vakamalua na drau ni uluna ni sa tasivori oti.

Na Mate nei Samisoni

23Era sa qai soqoni vata mai ko ira na turaga ni kai Filisitia me ra vakacabora e dua nai madrali levu vei Tekoni na nodra kalou, ka me ra reki; a ra sa kaya, “Sa solia na noda kalou na noda meca ko Samisoni ki na ligada.”

24Ia ni ra sa raici koya ko ira na tamata, era sa vakacaucautaka na nodra kalou, ka kaya, “A noda kalou sa solia na noda meca ki na ligada, o koya ka vakacacana talega na noda vanua, ka vakamatea e lewe vuqa vei keda.”

25Ia ni sa marau na yalodra, era sa kaya, “Me kacivi ko Samisoni, me mai vakadredrei keda.” A ra sa kacivi Samisoni mai na valeniveivesu; a ra sa dredrevaka ni sa tu e matadra ko koya; a ra sa vakatikora e na tadrua ni duru lelevu ni vale.

26A sa kaya ko Samisoni vua na cauravou sa tubera na ligana, “Laivi au mada me'u tara na duru lelevu sai vakadei ni vale oqo, me'u bau ravi mada kina.”

27Ia sa oso sara na vale e na tagane kei na yalewa. Era sa tiko kina na turaga kecega ni kai Filisitia, ka sa tiko talega e dela ni vale e lewe tolu beka na udolu na tagane kei na yalewa, ka ra sarasara tiko mai ni sa vakavuna na dredre ko Samisoni.

28A sa masu vei Jiova ko Samisoni, ka kaya, “I Jiova na Turaga, mo ni nanumi au, ka vakaukauwataki au tale mada oqo vakadua, na Kalou, me'u sauma lesu kina na noqu cudru vei ira na kai Filisitia e na vuku ni mataqu ruarua.”

29A sa taura ko Samisoni na duru lelevu ruarua e lomadonu ni vale, ka sa vakatauca kina na kena bi taucoko, e dua e na ligana i matau, ka dua e na ligana i mawi.

30A sa kaya ko Samisoni, “Me'u mate vata ga kei ira na kai Filisitia.” A sa vakacuva ulu ka solia na nona kaukauwa taucoko, ka sa baleti ira na turaga kei ira kecega na tamata era tiko kina na vale. A sa lewe lailai sa vakamatea ko koya ni sa bula tiko, ka lewe levu sa vakamatea ko koya e na nona mate.

31A ra sa qai lako sobu mai na tacina kei ira kece na lewe-ni-vuvale i tamana, ka colati koya, ka kauta yani, ka buluta e na maliwa i Sora kei Esitaoli, e nai bulubulu nei Manoa na tamana. A sa lewai ira na Isireli ko koya ka yabaki ruasagavulu.