Lako Yani 9 - Ai Vola Tabu (Vakadewa Makawa Vakavoutaki 2021)（FRV21）

Nai Kalima ni Mate Ca: Nodra Mate na Manumanu

1A sa kaya vei Mosese ko Jiova, “Mo lako kivei Fero, ka kaya vua, ‘Sa vosa vakaoqo ko Jiova na nodra Kalou na Iperiu: Mo laivi ira na noqu tamata me ra lako, me ra la'ki qaravi au.

2Ia kevaka ko sa bese tiko ni laivi ira me ra lako, ka ko sa tauri ira tiko,

3raica, sa na yavita na nomu manumanu sa tiko mai na veico na liga i Jiova: io, na ose, na asa, na kameli, na bulumakau, kei na sipi; ka na tauvi ira e dua na mate dauveiveitauvi ka rerevaki sara.

4Ia ena cakava e dua na ka ko Jiova me wasea kina na nodra manumanu na Isireli mai na nodra manumanu na kai Ijipita, ka na sega sara kina ni mate e dua na nodra manumanu na Isireli.’ ”

5A sa lokuca na kena siga ko Jiova, ka kaya, “E na mataka, ena kitaka kina na ka oqo ko Jiova e na vanua.”

6A sa cakava na ka ko ya ko Jiova e na siga ka tarava; a ra sa mate na manumanu kecega ni Ijipita, ia sa sega ga ni mate e dua na nodra manumanu na Isireli.

7A sa vakatataro ko Fero, ka sa raica ni sa sega sara ni mate e dua na nodra manumanu na Isireli. Ia sa kaukauwa tikoga na loma i Fero, ka sa sega ni laivi ira na tamata me ra lako.

Nai Kaono ni Mate Ca: Na Bo

8A sa kaya vei Mosese kei Eroni ko Jiova, “Drau yakuta eso na dravusa mai na matadravu, ka me kaburaka ko Mosese vaka ki lomalagi e na mata i Fero.

9Ena qai vuki me kuvu-ni-soso matailalai e na vanua taucoko ko Ijipita, ka na vakavuna na bo sa tetela ka vidikoso mai vei ira na tamata, kei na manumanu e na vanua taucoko ko Ijipita.”

10Vtaki 16.2A rau a qai kauta na dravusa mai na matadravu, ka tu e na mata i Fero, ka sa kaburaka ko Mosese vaka ki lomalagi; a sa vakavuna na bo sa tetela ka vidikoso mai e na tamata kei na manumanu.

11A ra sa sega ni tucake rawa e na mata i Mosese ko ira na daucaka-mana e na vuku ni bo, ni sa tauvi ira na daucaka-mana na bo, kei ira kecega na kai Ijipita.

12Ia sa vakaukauwataka ga na loma i Fero ko Jiova, ka sa sega ni vakarorogo kina vei rau, me vaka ga na ka sa kaya oti vei Mosese ko Jiova.

Nai Kavitu ni Mate Ca: Kurukuru kei na Uca Cevata

13A sa kaya vei Mosese ko Jiova, “Mo sou e na mataka, ka la'ki tu e na mata i Fero, ka kaya vua, ‘Sa vosa vakaoqo ko Jiova na nodra Kalou na Iperiu: Mo laivi ira na noqu tamata me ra lako, me rawa ni ra la'ki qaravi au.

14Ni'u na tala e na gauna oqo na noqu mate rerevaki kecega kivei iko, vei ira talega era qaravi iko, kei ira na nomu tamata; mo kila kina ni sa sega ni dua tale me tautauvata kei au e vuravura taucoko.

15Ni sa rawa vei au oqo me'u dodoka yani na ligaqu ka yaviti iko, kei ira na nomu tamata e na mate rerevaki, ka mo ni sa muduki tani kina mai vuravura.

16Roma 9.17Ia sai koya oqo na vuna ka'u sa vakabulai iko tiko kina: me'u vakatakila vei iko na noqu kaukauwa, ka me rogo talega na yacaqu e vuravura taucoko.

17Ko sa vakalevulevui iko tikoga vei ira na noqu tamata, ka sega ni laivi ira me ra lako.

18Raica, e na mataka, e na tiki-ni-siga oqo, au na vakatauca mai na uca-cevata rerevaki sara ka se sega e tautauvata kaya e Ijipita mai na gauna sa tauyavutaki kina ka yacova na gauna oqo.

19O koya oqo mo talatala kina, ka mo maroroya na nomu manumanu kei na nomu ka kecega e na were; ni ra na mate na tamata kecega kei na manumanu sa tiko e tautuba ka sega ni vakarurugi ni sa tau vei ira na uca-cevata.’ ”

20Ko ira nai vakalesilesi nei Fero sa rerevaka na vosa i Jiova era sa kauti ira na nodra tamata bobula kei na nodra manumanu ki na veivale.

21Ko ira sa sega ni vakadinata na vosa i Jiova era sa laivi ira ga na nodra tamata kei na nodra manumanu e na vanua lala.

22A sa kaya vei Mosese ko Jiova, “Mo dodoka na ligamu vaka ki lomalagi, me tau na uca-cevata e na vanua taucoko ko Ijipita, ki na tamata kei na manumanu, kei na co kecega ni vanua e na vanua ko Ijipita.”

23A sa dodoka na nona i titoko ko Mosese vaka ki lomalagi, ka sa vakatala mai na kurukuru ko Jiova kei na uca-cevata, ka sa cici voli e dela ni vanua na bukawaqa. A sa vakatauca ko Jiova na uca-cevata e dela ni vanua ko Ijipita.

24Vtaki 8.7; 16.21A sa tau vata mai na uca-cevata kei na bukawaqa, a ka rerevaki sara, ka sega e tautauvata kaya e na vanua ko Ijipita mai na gauna e tauyavu kina me dua na matanitu.

25Ia na uca-cevata sa vakacataka na ka kecega sa tiko e na were, a tamata kei na manumanu, e na vanua taucoko ko Ijipita; na uca-cevata sa yavita talega na co kecega ni vanua, ka sa musumusulaka na kau kecega ni vanua.

26Ia e na vanua duaduaga ko Koseni, ka ra tiko kina na Isireli, sa sega kina na uca-cevata.

27A sa talatala ko Fero, ka kacivi Mosese kei Eroni, ka kaya vei rau, “Au sai valavala ca e na gauna oqo; sa dodonu ga ko Jiova, ia koi au kei ira na noqu tamata keimami sai valavala ca.

28Mo drau vakamasuti Jiova! Me sa rauta na kurukuru mai vei koya na Kalou kei na uca-cevata! Au sa na laivi kemuni mo ni lako; ka kemuni na sega ni tiko tale.”

29A sa kaya vua ko Mosese, “Ni'u sa yaco ki nai bili ni koro, au na dodoka cake na ligaqu vei Jiova; ena qai mudu na kurukuru, ka sega tale ni tau na uca-cevata; mo ni kila kina ni sa nei Jiova ko vuravura.

30Ia koi kemuni kei ira na nomuni vakailesilesi, au sa kila ni se bera ga ni ko ni rerevaki Jiova na Kalou.”

31(A sa vakacacani na laino kei na barile, ni sa vakasola mai na barile, a sa vaqana na laino.

32Ia na witi kei na sila vuti, sa sega ni vakacacani, ni sa sega ni tubu cake.)

33A sa lako tani vei Fero ki nai bili ni koro ko Mosese, ka sa dodoka yani na ligana vei Jiova; a sa qai mudu na kurukuru kei na uca-cevata, ka sa sega ni tau tiko mai ki vuravura na uca.

34Ia ni sa raica ko Fero ni sa mudu na uca kei na uca-cevata kei na kurukuru, sa qai kuria tale na nona i valavala ca, ka vakaukauwataka na lomana, ko koya kei ira na nona vakailesilesi.

35A sa kaukauwa na loma i Fero, ka sa bese ni laivi ira na Isireli me ra lako, me vaka ga na ka sa kaya oti ko Jiova vei Mosese.