Sakaraia 10 - Ai Vola Tabu (Vakadewa Makawa Vakavoutaki 2021)（FRV21）

Sa Yalataka na Kalou na Nodra Vakabulai na Juta kei na Isireli

1Dou kerea vei Jiova na uca

e na gauna ni uca taumuri;

sa cakava na livaliva, ko Jiova,

ia ena solia vei ira na uca tau bi,

kei na co ki na tamata yadua e na vanua veico.

2 Maciu 9.36; Mari 6.34 Ia sa cavuta na ka wale na matakau,

ko ira na daurairai talega era sa raica na ka lasu;

era sa tukuna na tadra vakailasu,

ka sa sega ni yaga na nodra veivakacegui.

O koya oqo era lako sese kina me vaka na qele ni sipi;

era sa rarawa, ni sa sega nai vakatawa.

3“Sa waqa na noqu cudru vei ira nai vakatawa,

ka'u sa cudruva talega na me tagane;

ni sa lako mai ko Jiova-ni-lewevuqa vei ira na nona qele-ni-sipi na vale i Juta,

ka sa vakayacori ira me ra vaka na nona ose vakaiukuuku e nai valu.

4Ia mai vei koya ena yaco mai na vatu ni tutu,

ka mai vei koya nai vako,

ka mai vei koya na dakai ni valu,

ka mai vei koya talega ko ira kecega era lewa.

5Ia era na vakataki ira na qaqa,

era na buturaka sobu na meca e na oruoru e na saqata e nai valu;

ka ra na ia nai valu, ni sa tiko vata kei ira ko Jiova,

ka ra na vakamaduataki ko ira era vodo ose.

6“Ia ka'u na vakaukauwataka na vale i Juta,

ka vakabula talega na vale i Josefa.

Ka'u na kauti ira tale mai ni'u sa lomani ira,

ia na nodra tiko oqo ena tautauvata kei na nodra tiko eliu ni'u a sega ni biuti ira tani;

ni sai au ko Jiova na nodra Kalou, ia ka'u na rogoci ira.

7A ra na vaka na qaqa ko ira na Ifereimi,

ka na marau na yalodra me vaka ni ra gunu waini.

Ia na luvedra ena raica, ka marau,

ia na yalodra ena rekitaki Jiova.

8“Au na kaluvi ira mai ka vakasoqoni ira,

ni'u a voli ira,

ka ra na tubu me lewe vuqa me vaka na nodra tubu eliu.

9Ke'u a duibiubiuti ira ki na veimataqali,

era na vakananumi au mai na veivanua vakayawa,

ka ra na bula vata kei na luvedra, ka lesu tale mai.

10Ia ka'u na kauti ira tale mai na vanua ko Ijipita,

ka vakasoqoni ira mai Asiria;

ia ka'u na kauti ira ki na vanua ko Kiliati kei Lepanoni,

ena sega talega na yasana e kune me na rauti ira.

11Ia ena lako yani ko koya e na loma ni wasawasa ni veivakararawataki,

ena yavita talega na biau ni wasawasa,

ena di kece talega na tikina titobu ni uciwai na Naile.

Ena vakasivoi talega na viavialevu ni Asiria,

ia na toko ni sau nei Ijipita ena takali tani.

12Ia ka'u na vakaukauwataki ira vei Jiova,

ia na yacana era na lako voli kina,”

sa kaya ko Jiova.