1“Oqo nai lesilesi kei na lewa, mo ni vakabauta ka cakava e na vanua sa solia vei kemuni ko Jiova na Kalou ni nomuni qase, mo ni taukena, e na veisiga kecega ko ni sa bula kina e vuravura.
2Mo ni vakacacana sara na tikina kecega era a qarava kina na nodra kalou na veimatanitu ko ni na taukena, e dela ni veiulunivanua cecere, kei na dela ni veivanua cecere, kei na ruku ni kau drokadroka kecega.
3Vrua 7.5Ia mo ni vakacacana talega na nodra i cabocabo-ni-soro, ka musulaka na nodra matakau, ka vakama na nodra kalouyalewa ni veikau e na bukawaqa. Ia mo ni taya sobu na matakau ni nodra kalou sa ceuti, ka vakaotia na yacadra mai na yasana ko ya.
4Ia mo ni kakua ni kitaka vakakina vei Jiova na nomuni Kalou.
5Ia e na tikina ga sa digitaka ko Jiova na nomuni Kalou mai na nomuni veiyavusa kecega, me vakatikora kina na yacana, io, na nona i tikotiko mo ni dauqarava, ka dausoqoni kina.
6E kea mo ni kauta kina na nomuni soro kama kei na nomuni manumanu sa na vakacabori, kei na nomuni katini kei nai solisoli, kei nai soro mo ni lavelaveta kei na veika ko ni a bubului kina, kei nai soro sa lomamuni ga mo ni vakacabora kei na ulumatua ni nomuni bulumakau, kei na nomuni sipi.
7Ia ko ni na kana mai kea e na mata i Jiova na nomuni Kalou, koi kemuni, kei ira na nomuni lewe-ni-vuvale, ka rekitaka na ka kecega sa cakava na ligamuni, ka sa vakalougatataki kemuni kina ko Jiova na nomuni Kalou.
8“Mo ni na kakua ni cakava me vaka na ka kecega eda sa cakava eke e na siga oqo, ka ni sa cakava na tamata yadua na ka kece sa vinaka vua,
9ni ko ni se sega ni yaco mai ki nai vakavakacegu kei nai votavota sa solia vei kemuni ko Jiova na nomuni Kalou.
10Ia ni ko ni sa yaco ki tai kadua ni Joritani, ka tiko e na vanua sa solia vei kemuni mo ni taukena ko Jiova na nomuni Kalou, ka sa solia na vakacegu vei kemuni mai vei ira kecega na nomuni meca sa vakavolivoliti kemuni, ka ko ni tiko vakacegu kina,
11ia mo ni qai kauta mai kina na ka kecega ka'u sa vakarota vei kemuni ki na vanua sa digitaka ko Jiova na nomuni Kalou me vakatikora tikoga kina na yacana: na nomuni soro kama kei na nomuni manumanu sa vakacabori, kei na nomuni katini, kei nai soro ni ligamuni e lavelaveti, kei na ka talei kecega ko ni sa bubului kina vei Jiova.
12Ia ko ni na reki e na mata i Jiova na nomuni Kalou, koi kemuni, kei ira na luvemuni tagane, kei ira na luvemuni yalewa, kei ira na nomuni tamata, kei ira na nomuni vada; kei na Livai sa tiko e na nomuni lomanibai, ka ni sa sega na nona tikina se nona i votavota vata kei kemuni.
13Mo ni qarauni kemuni mo ni kakua ni vakacabora na nomuni soro kama e na yasana kecega ko ni sa raica,
14ia e na yasana ga sa digitaka ko Jiova e na dua na nomuni yavusa—mo ni vakacabora kina na nomuni soro kama, ka cakava mai kina na ka kecega ka'u sa vakarota vei kemuni.
15“Ia sa tara ga mo ni vakamatea ka kania na lewe ni manumanu e na nomuni lomanibai kecega, a ka kecega sa garova na yalomuni, me vaka nai loloma i Jiova na nomuni Kalou, sa solia ko koya vei kemuni. Me kania ga ko koya sa sega ni savasava kei koya sa savasava, me vaka sa daulaukana na kaseli kei na dia.
16Vteki 9.4; Vsoro 7.26,27; 17.10-14; 19.26; Vrua 15.23Ia na dra ga mo ni kakua ni kania; ni livia ga ki na qele me vaka na wai.
17E sega ni tara mo ni kania e na nomuni lomanibai nai katini ni nomuni sila, se na nomuni waini, se na nomuni waiwai, se na ulumatua ni nomuni bulumakau kei na nomuni sipi, se dua na ka ko ni sa bubului kina, se nai soro sa lomamuni ga mo ni vakacabora, se nai soro ni ligamuni e lavelaveti;
18ia mo ni kania ga e na mata i Jiova na nomuni Kalou e na yasana sa digitaka ko Jiova na nomuni Kalou, koi kemuni, kei na luvemuni tagane, kei na luvemuni yalewa, kei na nomuni tamata, kei na nomuni vada, kei ira na Livai ka tiko e na nomuni lomanibai. Ia ko ni na reki e na mata i Jiova na nomuni Kalou e na ka kecega sa cakava na ligamuni.
19Mo ni qarauni kemuni mo ni kakua ni guilecavi ira na Livai e na nomuni siga kecega e vuravura.
20“Ni sa vakalevutaka na nomuni vanua ko Jiova na nomuni Kalou, me vaka ka yalataka vei kemuni, ka ko ni sa kaya, ‘Au na kana lewe ni manumanu’, ni ko ni sa garova na lewe ni manumanu, ka ko ni kana lewe ni manumanu e na gauna ga ko ni sa gagadre kina.
21Kevaka sa yawa vei kemuni na vanua sa digitaka ko Jiova na nomuni Kalou me vakatikora kina na yacana, sa qai tara mo ni vakamatea eso na nomuni bulumakau kei na nomuni sipi ka sa solia vei kemuni ko Jiova na nomuni Kalou, me vaka ka'u sa vakarota vei kemuni, ka mo ni na kania e na nomuni lomanibai na ka kecega ko ni sa gagadre kina.
22Me vaka na kena daulaukana na kaseli kei na dia, mo ni kania vakakina; ko koya sa sega ni savasava kei koya talega sa savasava me kana kina.
23Vsoro 17.10-14Ia mo ni qarauna vinaka ga mo ni kakua ni kania na dra; ni sa kena bula na dra, ka sa tabu mo ni kania vata na kena bula kei na lewena.
24Mo ni kakua ni kania; mo ni livia ki na qele me vaka na wai.
25Mo ni kakua ni kania, me yacovi kemuni kina na ka vinaka, kei ira na luvemuni era sa muri kemuni, ni ko ni sa caka dodonu e na mata i Jiova.
26Ia na nomuni veika ga e tabu, kei na veika ko ni sa bubului kina, mo ni kauta, ka lako ki na yasana sa na digitaka ko Jiova.
27Mo ni vakacabora na nomuni soro kama, na lewena kei na dra, e na dela ni cabocabo-ni-soro i Jiova na nomuni Kalou. Ena liviraki talega na dra ni nomuni soro e dela ni cabocabo-ni-soro i Jiova na nomuni Kalou, ia na lewena mo ni kania.
28Mo ni nanuma ka talairawarawa ki na vosa kecega oqo ka'u sa vakarota vei kemuni, me yacovi kemuni kina na ka vinaka, kei ira na luvemuni era na taravi kemuni, ka sega ni mudu, ni ko ni sa caka dodonu ka vinaka vei Jiova na nomuni Kalou.
Ai Vakasala me Kakua na Qaravi Kalou Matakau29“Ni sa muduka tani e matamuni ko Jiova na nomuni Kalou na veimatanitu ko ni sa lako kina mo ni taukena, ka ko ni sa kedrai sosomi ka tiko e nodra vanua,
30mo ni qarauni kemuni mo ni kakua ni tacori mo ni vakamurimuri ira, ni ra sa vakarusai oti e matamuni; mo ni kakua ni vakatarotaroga na nodra kalou, ka kaya, ‘Era dau qarava vakaevei na nodra kalou na veimatanitu oqo? Au na via kitaka vakakina ko au.’
31Mo ni kakua sara ni kitaka vakakina vei Jiova na nomuni Kalou, ni ra sa kitaka ki na nodra kalou na ka kecega sa vakasisilataka ko Jiova, ka sa cata ko koya, ni ko ira na luvedra tagane kei na luvedra yalewa era sa dauvakama e na bukawaqa ki na nodra kalou.
32 Vrua 4.2; Vtaki 22.18,19 “A ka kecega ka'u sa vakarota vei kemuni, mo ni vakabauta ka cakava. Mo ni kakua ni kuria se kauta tani kina e dua na ka.
Who We AreWhat We EelieveWhat We Do
2025 by iamachristian.org,Inc All rights reserved.
