Aisea 44 - Ai Vola Tabu (Vakadewa Makawa Vakavoutaki 2021)（FRV21）

Na Veivakacegui ni Kalou vei Isireli

1“Ia oqo mo vakarorogo, Jekope, na noqu tamata,

ko iko Isireli, ka'u sa digitaka!

2Sa vosa vakaoqo ko Jiova ka vakatuburi iko,

ka buli iko mai na kete ka na vukei iko:

Mo kakua ni rere, i Jekope, na noqu tamata,

ko iko talega Jesuruni, ka'u sa digitaka.

3Ni'u na sovaraka na wai vua sa viagunu,

kei na wai drodro ki na qele mamaca;

au na sovaraka na Yaloqu ki na nomu kawa,

kei na noqu ka ni veivakalougatataki kivei ira sa tubu mai vei iko.

4Ka ra na tubu me vaka e na loma ni veico,

me vaka na veiwilou e na bati ni wai drodro.

5Ena kaya e dua, ‘Koi au na nei Jiova;’

e dua tale ena vakatokai koya e na yaca i Jekope;

e duatani tale ena vola ki na ligana, ‘A nei Jiova,’

ka vakatokai koya e na yaca i Isireli.”

6 Aisea 48.12; Vtaki 1.17; 2.8; 22.13 Sa kaya vakaoqo ko Jiova na nodra tui na Isireli,

kei na nodra i Vakabula ko Jiova-ni-lewevuqa:

“Koi au na kenai liuliu, koi au na kenai murimuri talega;

ka sa sega tale na Kalou, koi au ga.

7Ia ko cei me na kaciva, ka tukuna,

ka tusanaka mai na ka ena yaco me vakataki au

mai na gauna ka'u a vakatikori ira kina na tamata eliu?

Ia na ka se bera ni yaco, kei na ka ena yaco mai muri,

me ra tukuna mai.

8Dou kakua ni domobula, se taqaya;

au a sega beka ni dautukuna vei iko mai na gauna ko ya, ka dauvakaraitaka?

Sai kemudou beka ga ena noqu i vakadinadina!

Sa dua tale beka na Kalou, se koi au ga?

Io, sa sega tale na Uluvatu; ka'u sa sega ni kila e dua.”

9Ko ira era cakava na matakau ceuceu era sa ka wale kecega; sa sega ni yaga na nodra ka daudomoni; era sa tukuni ira vakataki ira; era sa sega ni rai, se kila rawa, me ra madua kina.

10Ko cei sa cakava na kalou, ka ceuta na matakau sa sega ni yaga e na dua na ka?

11Raica, na kenai tokani era na madua kecega; ko ira na matai era sa tamata ga. Me ra soqoni vata kecega, me ra tucake; era na rere, era na madua vata ga.

12Na matai ni kaukamea sa taura e dua na matau, ka sa cakacaka e na qilaiso sa waqa, ka sa tulia e nai tukituki, ka sa qai kitaka e na kaukauwa ni ligana; io, sa viakana mai, a sa yali na nona kaukauwa; sa sega ni gunuva na mena wai, ka sa malumalumu mai.

13Na matai ni kau sa dreta na nona wa i vakarau; sa vola e na peni kau; sa qai civia e na veleko, ka sa vola e nai vakarau me momokiti, ka sa cakava me ucuya na tamata, me matavinaka vakatamata; me tu ga e na vale.

14Sa taya sobu na sitari me nona, ka sa kauta na nokonoko kei na oki, sa vakaukauwataka me yaga vua na kau ni veikau. Sa tea e dua na paini, ia na uca sa vakatubura.

15Ena qai yaga ki na tamata me buka. A sa kauta mai e dua, ka sa tatalai kina; io, sa vakawaqa, ka sa vavia kina na madrai. Io, ka sa cakava e dua na kalou ka sa qarava; sa cakava me matakau ceuceu, ka sa cuva kina.

16E dua na tikina sa vakama e na bukawaqa; e na dua na tikina sa kania na lewe ni manumanu; sa tavuna na kena, ka sa mamau. Sa tatalai talega, a sa kaya, “Vinaka, ka'u sa katakata, ka'u sa raica na bukawaqa!”

17Ia na tikina sa vo sa cakava ko koya me kalou, io me nona matakau ceuceu, sa cuva sobu kina, ka sa soro kina, ka masuta, ka sa kaya, “Mo vakabulai au, ni sai iko na noqu kalou!”

18Era sa sega ni kunea, era sa sega talega ni kila, ni sa tabonaki na matadra, me ra sega ni kunea; kei na lomadra, me ra sega ni kila.

19Ka sa sega e dua sa vakasara ki lomana, ka sa sega ni vuku se yalomatua me kaya mai, “E dua na tikina ka'u sa vakama e na bukawaqa; ka'u sa vavia talega na madrai e na kena qilaiso; ka'u a tavuna na lewe ni manumanu, ka kania. Me'u sa qai cakava li na kena vo me ka vakasisila? Me'u cuva sobu li ki na dulumi ni kau?”

20Sa kana dravusa ko koya; sa vakaisini na lomana, ka sa vakacalai koya tani, a sa sega ni vakabulai koya rawa, se kaya mada, “Sa sega li ni tiko e na ligaqu i matau e dua na ka lasu?”

E Sega ni Guilecavi ko Isireli

21Mo nanuma na ka oqo, ko iko Jekope,

kei Isireli, ni ko sa noqu tamata;

ka'u a buli iko, sai iko na noqu tamata;

ko iko Isireli, ka'u na sega ni guilecavi iko.

22Au sa kauta vakatikitiki na nomu caka cala me vaka na o,

kei na nomu i valavala ca me vaka na tegu;

mo lesu mai vei au, ni'u sa voli iko.

23Mo ia na sere, na lomalagi, ni sa vakayacora oti oqo ko Jiova;

dou kaila, na boto ni vuravura e ra;

dou lagata mai na sere, na veiulunivanua,

na veikau, kei na kau yadua sa tu kina!

Ni sa voli Jekope ko Jiova,

ka sa vakarokorokotaki e Isireli.

24Sa kaya vakaoqo ko Jiova, na nomu i Vakabula,

ko koya ka buli iko mai na kete:

“Koi au ko Jiova ka'u sa cakava na ka kecega,

ka tevuka duaduaga na lomalagi,

ka tevuka talega vakataki au ga na vuravura;

25 1Kori 1.20 ka'u sa vakatawayagataka na nodra cakacaka mana na daulasu wale,

ka'u sa vakalialiai ira na daurairai;

ka vakalesui ira ki muri na vuku,

ka vukica na nodra vuku me lialia;

26ka'u sa vakadinadinataka na nona vosa na noqu tamata;

ka vakayacora na nodra i vakavuvuli na noqui talai;

ka'u sa kaya ki Jerusalemi, ‘Ko na tawa;’

ki na veikoro talega vaka-Juta, ‘Dou na tara tale,

ia na kena tikina sa ca ka'u na vakavinakataka tale;’

27ka'u sa kaya ki na wasawasa, ‘Mo di mai—

ia ka'u na vakadiva na nomu veiuciwai;’

28 2Vei 36.23; Esera 1.2 ka'u sa kaya e na vuku i Sairusi, ‘Sai koya na noqu i vakatawa,

ia na ka kece ka'u sa vinakata ena vakayacora ga ko koya;’

io ena kaya ki Jerusalemi, ‘Ko na tara tale;’

ki na vale tabu talega, ‘Ko na tauyavutaki.’ ”